ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កម្ពុជា​ប្តេជ្ញា​បន្ត​ជួយ​បេសកកម្ម​រក្សា​សន្តិភាព​ UN ​តែ​ត្រៀម​ការពារ​ខ្លួន​ជាង​មុន


រូបឯកសារ៖ ទិដ្ឋភាពទូទៅនៃ​ពិធី​ជូន​ដំណើរ​ដល់​កង​កម្លាំង​មួក​ខៀវ​កម្ពុជា​ចំនួន​ ៤២៨​នាក់​ ដែល​នឹង​ចេញ​ដំណើរ​ទៅ​ចូលរួម​បេសកកម្ម​រក្សា​សន្តិភាព​ក្នុងប្រទេស​ម៉ាលី និង​ប្រទេស​ស៊ូដង់​ខាង​ត្បូង រាជធានី​ភ្នំ​ពេញ​ ថ្ងៃទី​៣ ខែ​ឧសភា​ ឆ្នាំ​២០១៨។ (អូន ឆេងប៉រ/VOA)

ក្រុម​រដ្ឋមន្ត្រី​ការពារជាតិ​នៅ​ទូទាំង​ពិភពលោក​បាន​មក​ជួប​ប្រជុំ​រយៈពេល​មួយថ្ងៃ​ នៅ​ទីក្រុង​ញូវយ៉ក​ កាលពី​ថ្ងៃសុក្រ ​ទី​ ២៩ ខែ​មីនា ​ដើម្បី​ស្វះស្វែង​រកវិធី​បង្កើន​បេសកកម្ម​ថែរក្សា​សន្តិភាព​របស់​អង្គការ​សហប្រជាជាតិ។

ប្រទេស​កម្ពុជា​បាន​ប្តេជ្ញា​បន្ត​បញ្ជូន​កងកម្លាំង​យោធា​របស់​ខ្លួន​ ដើម្បី​ចូលរួម​ក្នុង​ប្រតិបត្តិការ​ថែរក្សា​សន្តិភាព​របស់​អង្គការ​សហ​ប្រជាជាតិ​ ប៉ុន្តែ​ក៏បាន​អះអាង​ពី​ការ​ត្រៀមខ្លួន​ឱ្យ​បាន​ច្រើន​ជាង​មុន ​ដើម្បី​ស្វ័យ​ការពារ​នៅ​ពេល​ដែល​មាន​ការ​វាយ​ប្រហារ​កើត​ឡើង។​

លោក​ ទៀ បាញ់​ រដ្ឋ​មន្ត្រី​ការពារ​ជាតិ​កម្ពុជា​ បាន​បញ្ជាក់​ក្នុង​បទ​សម្ភាសន៍ពិសេស​ជាមួយ​នឹង VOA ​នៅ​ទីក្រុង​ញូវយ៉ក​ ក្នុង​ពេល​ចូលរួម​កិច្ច​ប្រជុំ​ថ្នាក់​រដ្ឋ​មន្ត្រី​ការពារ​ជាតិ​ស្តីពី​ប្រតិបត្តិការ​ថែរក្សា​សន្តិភាព​របស់​អង្គការ​សហប្រជាជាតិ​ កាលពី​ថ្ងៃសុក្រ​ថា៖

«ទោះ​ជា​កម្ពុជា​កំពុងតែ​ស្ថិត​ក្នុង​ស្ថានភាព​មួយ​កំពុង​លំបាក​លើ​បញ្ហា​ផ្ទៃក្នុង​ ក៏កម្ពុជា​នៅតែ​ប្តូរ​ផ្តាច់បញ្ជូន​កម្លាំង​ជា​បន្តបន្ទាប់ គឺជាង ១០ ឆ្នាំ​កន្លង​មក​នេះ​ដោយ​បាន​បំពេញ​យ៉ាង​ពេញ​លេញ​តាមសំណូមពរ​របស់​អង្គការ​សហប្រជាជាតិ។ ... ការ​អះអាង​ពី​ប្រមុខ​អ្នក​ដឹកនាំ​របស់​យើង​ខ្ញុំ​ គឺ​ថា​នឹង​ប្តូរផ្តាច់​ដើម្បី​បញ្ជូន​កម្លាំង​ទៅ​ប្រតិបត្តិការ​រក្សា​សន្តិភាព​ជា​បន្ត​ទៀត​ ទោះបី​ជា​មាន​ការ​លំបាក​យ៉ាង​ណា​ក៏ដោយ​ ក៏​យើង​នៅតែ​ប្តូរផ្តាច់​ដើម្បី​រួមចំណែក​តាម​លទ្ធភាព​ដែល​យើង​អាច​ធ្វើ​ទៅ​បាន»។

ក្រុម​រដ្ឋមន្ត្រី​ការពារជាតិ​នៅ​ទូទាំង​ពិភពលោក​បាន​មក​ជួប​ប្រជុំ​រយៈពេល​មួយថ្ងៃ​ នៅ​ទីក្រុង​ញូវយ៉ក​ កាលពី​ថ្ងៃសុក្រ ​ទី​ ២៩ ខែ​មីនា ​ដើម្បី​ស្វះស្វែង​រកវិធី​បង្កើន​បេសកកម្ម​ថែរក្សា​សន្តិភាព​របស់​អង្គការ​សហប្រជាជាតិ។

លោក​អគ្គលេខាធិការ​អង្គការ​សហប្រជាជាតិ​ អាន់តូនីញ៉ូ ហ្កោតឺរ៉េស (Antonio Guterres) បាន​បញ្ជាក់​ក្នុង​សុន្ទរកថា​បើក​សម័យ​ប្រជុំ​ថា៖

«ក្នុង​រយៈពេល​ជាច្រើន​ទសវត្សរ៍ ​ប្រតិបត្តិការ​ថែរក្សា​សន្តិភាព​របស់​យើង​បាន​ជួយ​ដល់​ប្រទេស​ជាច្រើន​តាំងពី​ លីបេរីយ៉ា​ និង​សេរ៉ាឡេអូន ​ដល់​ ទីម័រ​ខាងកើត​ និង​កម្ពុជា ​ធ្វើ​អន្តរកាល​ឈាន​ពី​ជម្លោះ​ទៅ​សន្តិភាព។ ប៉ុន្តែ​ដោយសារតែ​ជម្លោះ​កាន់តែ​មាន​ភាព​ស្មុគស្មាញ​និង​ប្រឈម​មុខ​ខ្លាំង​ គឺ​ប្រតិបត្តិការ​របស់​យើង​ក៏ត្រូវ​ដើរ​ឱ្យ​ទាន់​សភាព​ការណ៍​ផង​ដែរ‍»។

លោក​អគ្គលេខា​ធិការ​ក៏​បានអំពាវនាវ​ដល់​ប្រទេស​នានា​ឱ្យ​បំពេញ​កង្វះ​ខាត​រថពាសដែក ​ឧទ្ធម្ភាគចក្រសង្គ្រោះ​បន្ទាន់ ​ការ​ស៊ើបការណ៍ ​ការ​តាមដាន​មើល​សភាពការណ៍​ កងកម្លាំង​ប្រតិកម្ម​រហ័ស ​និង​ក្រុម​គ្រូពេទ្យ​សង្គ្រោះ​បន្ទាន់​ជាដើម​សម្រាប់​ប្រតិបត្តិការ​របស់​អង្គការ​សហប្រជាជាតិ។

ប្រទេស​កម្ពុជា​បាន​ចាប់ផ្តើម​បញ្ជូន​កម្លាំង​ចូលរួម​ក្នុង​ក្របខណ្ឌ​ថែរក្សា​សន្តិភាព​របស់​អង្គការ​សហ​ប្រជាជាតិ​តាំងពី​ឆ្នាំ​ ២០០៦​ ដោយ​បញ្ជូន​កម្លាំង​បាន​ជាង​ ៥០០០​ នាក់​ដែល​មាន​ជំនាញ​ដោះ​មីន យុទ្ធភណ្ឌ​មិន​ទាន់ផ្ទុះ ​វិស្វកម្ម​នៅ​ក្នុង​ប្រទេស​ជាច្រើន​ ដែល​មាន​ដូច​ជា​សាធារណរដ្ឋ​អាហ្វ្រិក​កណ្តាល ​ស៊ូដង់ ​ស៊ូដង់​ខាងត្បូង ​លីបង់ ​និង​ម៉ាលី​ជាដើម។

កង​កម្លាំង​កម្ពុជា​ក៏​រង​ការ​វាយប្រហារ​ពីរបីដងផង​ដែរ​ នៅ​ក្នុង​ប្រទេស​ដែល​ពួកគេ​ធ្វើ​ប្រតិបត្តិការ​ ដូចជា​នៅឆ្នាំ​ ២០១៧​ នៅ​សាធារណ​រដ្ឋ​អាហ្វ្រិក​កណ្តាល ដែល​បានបណ្តាល​ឱ្យ​មាន​ស្លាប់​បួន​នាក់។ ការ​វាយ​ប្រហារ​កាលពី​ដើមឆ្នាំ​ ២០១៨ នៅ​ប្រទេស​ម៉ាលី​មិនបណ្តាល​ឱ្យ​រង​របួស​កម្លាំង​កម្ពុជា​ទេ​ ប៉ុន្តែ​បាន​កម្ទេច​កន្លែង​ស្នាក់នៅ​របស់​ពួកគេ។

លោក​រដ្ឋមន្ត្រី​ ទៀ បាញ់ បាន​បន្ថែម​ថា៖

«មុន​នឹង​ទៅ​គឺ​ធ្វើ​តាម​លក្ខខណ្ឌ​ទាំងឡាយ​និយាម​ដែល​អង្គការ​សហប្រជាជាតិ​បាន​តម្រូវ​ ពីព្រោះ​យើង​ត្រូវ​បំពេញ​ទៅតាម​ហ្នុង។​ មាន​កន្លែង​ខ្លះ​ យើង​បំពាក់​អាវុធ​គួរសម​ដែរ ​គឺ​សំដៅ​ខ្លាំង​បំផុត​ដើម្បី​ការពារ​ខ្លួន​ជា​សំខាន់។ ​ឥឡូវនេះ​ដោយសារ​មាន​ហានិភ័យ​ខ្ពស់​ខ្លះ​ដែរ​នៅ​ប្រទេស​មួយ​ចំនួន។ ជាក់ស្តែង​ កន្លង​មក​នេះ​យើងបាន​ជួប​នូវ​ហានិភ័យ​អាហ្វ្រិក ក៏ដូច​ជា​នៅម៉ាលី ​ក៏​អីចឹងដែរ។ ឥឡូវនេះ​យើង​កំពុង​បំពេញ​បន្ថែម​នូវ​សមត្ថភាព​ការពារ​ខ្លួន ​ហើយ​និង​បង្កើន​សមត្ថភាព​របស់​យើង​ឱ្យ​កាន់តែ​មាន​ប្រសិទ្ធភាព​ថែម​ទៀត​ យើង​នឹង​លៃលក​បំពាក់​បន្ថែម​នូវ​ឧបករណ៍ ​ឬក៏​សម្ភារៈ​ដែល​អំណោយ​ឱ្យ​យើង​ក្នុង​ការ​ធ្វើ​ភារកិច្ច​ហ្នឹង​បាន​សម្រេច​ជោគជ័យ​ថែម​ទៀត‍»។

លោក​ ទៀ បាញ់ ​បន្ថែម​ថា​ ការណ៍​ដែល​កម្ពុជា​នៅ​បន្ត​ចូលរួម​ប្រតិបត្តិការ​ថែរក្សា​សន្តិភាព​ គឺ​ដើម្បីសងគុណ​ចំពោះ​អង្គការ​សហប្រជាជាតិ​ ដែល​ធ្លាប់​បាន​បញ្ជូន​កង​កម្លាំង​ថែរក្សា​សន្តិភាព​ទៅ​កម្ពុជា​នៅដើម​ទសវត្សរ៍ ១៩៩០ ​និងជា​ទឹក​ចិត្ត​រួមចំណែក​ជួយ​បណ្តា​ប្រទេស​ដែល​មាន​ការប៉ះទង្គិច​គ្នា ​ឬមិន​ទាន់​ឃើញ​មាន​សន្តិភាព​ដ៏​ពេញលេញ​នោះ​ ឱ្យ​បាន​សន្តិភាព​ពេញលេញ។​

វេទិកា​អនាគត​ដែល​ជា​ស្ថាប័ន​ស្រាវជ្រាវ​គោល​នយោបាយ​មួយ​បាន​បញ្ជាក់​នៅក្នុង​របាយការណ៍​ចេញផ្សាយ​ កាលពី​ខែ មករា​ ថា ការ​ដាក់​ពង្រាយ​អ្នក​ថែរក្សា​សន្តិភាព​ក្រោម​ឆ័ត្រ​របស់​អង្គការ​សហ​ប្រជា​ជាតិ​ គឺ​ជួយ​ដល់​ប្រទេស​កម្ពុជា​ក្នុង​ការព្យាយាម​បង្កើន​ឥទ្ធិពល​ការទូត និង​ការ​បង្ហាញ​ខ្លួន​ថា​ ជា​ប្រទេស​មួយ​ដែល​វិវត្តន៍​ពី​ប្រទេស​ដែល​ខ្ទេចខ្ទាំ​ដោយសារ​សង្គ្រាម​ និង​ជម្លោះ​ ទៅ​ជា​ប្រទេស​ដែល​មាន​សន្តិភាព​និង​សន្តិសុខ។

លោក​ ចាន់ សំអាត ​អ្នក​ស្រាវជ្រាវ​បាន​សរសេរ​ក្នុង​របាយការណ៍​ថា៖

«ផ្អែក​លើ​ហេតុផល​នេះ​ ការ​ប្រើប្រាស់​ធនធាន​ជាតិ​ដើម្បី​គាំទ្រឱ្យ​ប្រសើរ​ឡើង​បរិយាកាស​សន្តិសុខ​អន្តរជាតិ​ តាម​រយៈ​ការ​ចូលរួម​ក្នុង​ប្រតិបត្តិការ​ថែរក្សា​សន្តិភាព​គឺជា​ការ​ចាំបាច់​សម្រាប់​កម្ពុជា​បង្ហាញ​រូបភាព​ខ្លួន​ថា​ ជា​ប្រទេស​ដែល​មាន​ការ​ទទួល​ខុសត្រូវ​នៅ​ក្នុង​តំបន់​និង​ពិភពលោក។ ការ​ចូលរួម​របស់​កម្ពុជា​ជាមួយ​នឹង​អង្គការ​សហប្រជាជាតិ​និង​អាស៊ាន ​លើ​ការ​ថែរក្សា​សន្តិភាព​និង​សន្តិសុខ​ពិភពលោក​ និង​តំបន់​ ជា​ផ្នែក​មួយ​ដ៏​សំខាន់​ក្នុងការ​កសាង​អំណាច​ការ​ទូត​របស់​កម្ពុជា‍»៕

តួលេខនៃករណីឆ្លងជំងឺកូវីដ១៩

XS
SM
MD
LG