សម្លេងភ្លេងប្រគុំដោយកងកិត្តិយសត្រែទ័ព បានបន្លឺលាន់កងរំពង ពេញមូលដ្ឋានទ័ពអាកាសពោធិ៍ចិនតុង ក្នុងខណ្ឌពោធិ៍សែនជ័យ រាជធានីភ្នំពេញ ខណៈដែលកងកម្លាំងយោធា និងអាវុធហត្ថ ស្ថិតក្នុងឯកសណ្ឋានមួកខៀវ និងមានក្រវ៉ាត់ស្លាកសញ្ញា នៃកងរក្សាសន្តិភាពអង្គការសហប្រជាជាតិ បានបោះជំហានយ៉ាងស្វាហាប់នៅនឹងទីលានយន្តហោះយោធា ក្នុងពិធីជូនដំណើរជាកិត្តិយសមួយ កាលពីព្រឹកថ្ងៃព្រហស្បតិ៍។
កងកម្លាំងមួកខៀវកម្ពុជាចំនួន៤២៨នាក់ មកពីកងអង្គភាពចំនួនបីផ្សេងគ្នា នឹងត្រូវចេញដំណើរទៅចូលរួមបេសកកម្មរក្សាសន្តិភាពនៅប្រទេសពីរក្នុងទ្វីបអាហ្រ្វិកដែលញាំញីដោយសង្គ្រាម និងអំពើហិង្សា គឺប្រទេសម៉ាលី និងប្រទេសស៊ូដង់ខាងត្បូង។ក្នុងពិធីជូនដំណើរជាកិត្តិយសកាលពីព្រឹកថ្ងៃព្រហស្បតិ៍ ដែលមានអ្នកចូលរួមប្រមាណមួយពាន់នាក់ នឹងក្រោមអធិបតីរបស់នាយឧត្ដមសេនីយ៍ ប៉ុល សារឿន អគ្គមេបញ្ជាការនៃកងយោធពលខេមរភូមិន្ទ បានប្រព្រឹត្តិទៅក្រោមតំណក់ភ្លៀងធ្លាក់ជោគជាំ អមដោយកងកម្លាំង និងសាច់ញាតិបងប្អូនមកជូនដំណើរទាំងចិត្តអន្ទះអន្ទែង។
ការបញ្ជូនកងកម្លាំងបន្ថែមចំនួនបីអង្គភាពផ្សេងគ្នាទៅប្រទេសក្នុងទ្វីបអាហ្វ្រិកទាំងពីរ ធ្វើឡើងក្រោយពីមានការវាយប្រហារពីរលើកក្នុងរយៈពេលមួយឆ្នាំចុងក្រោយនេះ ទៅលើកងកម្លាំងរក្សាសន្តិភាពកម្ពុជា ក្នុងទ្វីបអាហ្រ្វិក។ កងមួកខៀវកម្ពុជាបួនរូបបានពលីជីវិត នៅក្នុងការវាយឆ្មក់មួយកាលពីខែឧសភា ឆ្នាំទៅមិញ ពីសំណាក់ក្រុមឧទ្ទាមក្នុងសាធារណរដ្ឋអាហ្វ្រិកកណ្ដាល។ រីឯកាលពីខែមីនា ដើមឆ្នាំ២០១៨នេះ មូលដ្ឋានរបស់កងរក្សាសន្តិភាពកម្ពុជានៅក្នុងប្រទេសម៉ាលី ក៏ត្រូវបានក្រុមជីវពលវាយប្រហារដែរ តែជាភ័ព្វល្អមិនមានកងកម្លាំងណាម្នាក់រងគ្រោះឡើយ។
លោកនាយឧត្ដមសេនីយ៍ ប៉ុល សារឿន បាននិយាយប្រាប់អង្គពិធីថា កម្ពុជានៅបន្តការតាំងចិត្តចូលរួមនឹងអង្គការសហប្រជាជាតិ តាមរយៈបេសកកម្មរក្សាសន្តិភាពនៅបណ្ដាប្រទេសដែលហែកហួរដោយសង្គ្រាម។ ដោយផ្ដោតទៅលើសុន្ទរកថាដែលបានរៀបចំទុក ថ្នាក់ដឹកនាំកំពូលនៃកងទ័ពកម្ពុជា បានប្រកាសកាលពីព្រឹកថ្ងៃព្រហស្បតិ៍យ៉ាងដូច្នេះថា៖
«ទោះបីកងទ័ពកម្ពុជាត្រូវបានរង[ការ]វាយប្រហារពីក្រុមឧទ្ទាមនៅប្រទេសម៉ាលី ក៏ប៉ុន្តែកម្ពុជាមិនរាថយ កម្ពុជានៅតែតស៊ូប្ដូរផ្ដាច់ លះបង់សាច់ស្រស់ ឈាមស្រស់ ហើយកម្ពុជាបានប្ដេជ្ញាចិត្ត បង្កើនកម្លាំងបន្ថែមទៀត ដើម្បីចូលរួមបេសកកម្មរក្សាសន្តិភាព ក្នុងក្របខណ្ឌអង្គការសហប្រជាជាតិ ក្នុងបុព្វហេតុសន្តិភាព និងមនុស្សធម៌នៅក្នុងលោក»។
ការបង្ហាញការតាំងចិត្តរបស់មេបញ្ជាការកំពូលកងទ័ពកម្ពុជារូបនេះ មានលក្ខណៈស្រដៀងគ្នានឹងការថ្លែងរបស់លោកនាយករដ្ឋមន្ត្រី ហ៊ុន សែន កាលពីខែមីនា អំពីភាពមិនរាថយរបស់កម្ពុជាទៅនឹងការវាយប្រហារនានាពីសំណាក់កម្លាំងឧទ្ទាមម្ចាស់ស្រុក និងរក្សាការចូលរួមរក្សាសន្តិភាពនៅទីកន្លែងនានាក្នុងពិភពលោកជាមួយអ.ស.ប.បន្តទៅទៀត។
មកទល់នឹងឆ្នាំ២០១៨នេះ វាមានរយៈពេល១២ឆ្នាំមកហើយចាប់តាំងកងកម្លាំងមួកខៀវជំនាន់ទីមួយរបស់កម្ពុជា បានចូលរួមបេសកកម្មរក្សាសន្តិភាពក្នុងក្របខណ្ឌនៃអង្គការសហប្រជាជាតិជាលើកដំបូង ដែលមកទល់ពេលនេះកម្ពុជា ដែលធ្លាប់ទទួលកងរក្សាសន្តិភាពមករៀបចំការបោះឆ្នោតកាលពីឆ្នាំ១៩៩៣នោះ បានបញ្ជូនកងកម្លាំងសរុប ៥.២៥៧ នាក់ហើយ ទៅកាន់ប្រទេសនានាក្នុងទ្វីបអាហ្វ្រិក និងក្នុងតំបន់មជ្ឈឹមបូព៌ា។ នេះបើយោងតាមតួលេខរបស់អង្គការសហប្រជាជាតិ ដែលបញ្ជាក់ថាបច្ចុប្បន្ន មានកងកម្លាំងកម្ពុជាចំនួន៨១៣នាក់ កំពុងស្ថិតនៅឈរជើងរក្សាសន្តិភាពនៅប្រទេសចំនួន៥។
ភាពក្លាហានមោះមុតរបស់កងកម្លាំងកម្ពុជា នឹងផ្ដល់ជាគ្រឿងលើកទឹកចិត្តដល់មនុស្សជាតិក្នុងលោក ក្នុងតួនាទីដ៏សំខាន់សម្រាប់ប្រយោជន៍រួម។ នេះជាការលើកឡើងរបស់លោក Alexandre Huynh តំណាងរបស់អង្គការសហប្រជាជាតិដែលអង្គុយអមស្មើនឹងលោក ប៉ុល សារឿន ក្នុងពិធីរៀបចំជូនដំណើរកងកម្លាំងក្នុងខណ្ឌពោធិ៍សែនជ័យ។
«ការធ្វើដំណើររបស់កងកម្លាំងរក្សាសន្តិភាពនាពេលនេះ គឺជាការបោះជំហានចូលរួមនឹងសហគមន៍បណ្ដាប្រទេស រួបរួមគ្នា ដើម្បីស្វែងរកសន្តិភាព និងអនាគតដ៏ប្រសើរ សម្រាប់គ្រប់មនុស្សជាតិ ទាំងអស់។ ក្នុងតួនាទីនេះ អស់លោកគឺជាទាហានកម្ពុជា ក៏ប៉ុន្តែជាបងប្អូន។ ការប្ដេជ្ញាចិត្តក្នុងជួយដល់អ្នកដទៃ ព្រមទាំងចែករំលែកបទពិសោធ គឺជួយសង្គ្រោះអាយុជីវិតជាច្រើន ហើយជំនាញវិជ្ជាជីវៈ និងក្រមសីលធម៌ គឺជាប្រភពនៃការលើកទឹកចិត្តដល់មនុស្សជាច្រើននាក់»។
អង្គពិធីបានបន្តជាមួយនឹងការប្រគល់ទង់ជាតិនៃព្រះរាជាណាចក្រកម្ពុជា និងទង់អង្គការសហប្រជាជាតិដល់កងអង្គភាពកម្ពុជាទាំងបីកងដែលត្រូវចេញទៅបំពេញបេសកកម្ម ជាមួយនឹងសម្លេងសច្ចាប្រណិធានរួមរបស់កងកម្លាំងទាំងអស់យ៉ាងលាន់ឮពេញផ្ទៃមូលដ្ឋានទ័ពអាកាស ក្បែរអាកាសយានដ្ឋានអន្តរជាតិភ្នំពេញ មុននឹងចេញដំណើរ ដើរក្នុងជំហានស្រុះគ្នា ដៃលើកគំនាប់គណៈអធិបតី និងអ្នកសារព័ត៌មានជាកិច្ចបញ្ចប់នៃកម្មវិធី។
អនុសេនីយ៍ត្រី សៅ លីណា ដែលត្រូវចេញទៅបំពេញភារកិច្ចបម្រើផ្នែកថែទាំសុខភាពឱ្យកងវិស្វកម្មព្រលានយន្តហោះលេខ១៩៨ បានឱ្យដឹងថា នេះជាលើកទីពីរហើយដែលកញ្ញាត្រូវបានរាជរដ្ឋាភិបាលកម្ពុជាចាត់តាំងឱ្យចេញទៅបំពេញបេសកកម្មនៅប្រទេសម៉ាលីជាមួយអង្គការសហប្រជាជាតិ ហើយបេសកកម្មលើកមុនដែលបញ្ចប់កាលពីខែមីនានេះ នៅតែប៉ុន្មានថ្ងៃក្រោយពីមានការវាយប្រហារពីសំណាក់ក្រុមឧទ្ទាម។
ស្ថិតក្នុងឯកសណ្ឋានកងកម្លាំងរក្សាសន្តិភាព និងការរៀបចំយ៉ាងគត់មត់ និយាយរៀបរាប់ពីការវាយប្រហាររបស់ក្រុមឧទ្ទាមកាលពីខែមីនា យុវតីវ័យ២៦ឆ្នាំរូបនេះ បានប្រាប់VOAថា៖
«វាតែងតែមានហើយ ការអាក់ខានរបស់ក្រុមឧទ្ទាម។ ក៏ប៉ុន្តែកងកម្លាំងរបស់កម្ពុជាយើងគាត់ស្វាហាប់ គាត់មានភាពរហ័សរហួន គាត់ឥតមាននរណាមួយគ្រោះថ្នាក់ទេ។ ដូច្នេះហើយទឹកចិត្តរបស់ពួកគាត់ គឺតែងតែក្លាហាន មិនដែលគេចវេសពីទំនួលខុសត្រូវ ដែលយើងកំពុងតែធ្វើនៅនឹងដៃហ្នឹងទេ។ ចាស៎ យើងតាំងចិត្តខ្ពស់ ដូច្នេះហើយដែលយើងនៅតែស្រលាញ់ យើងនៅតែទៅ»។
ដោយឡែក លោក អ៊ុច ដារ៉ារ័ត្ន ដែលនៅក្បែរនោះ បាននិយាយដែរថា លោកធ្លាប់បានទៅបំពេញបេសកកម្មជាមួយអង្គការសហប្រជាជាតិបានពីរលើកហើយ នៅប្រទេសលីបង់ និងប្រទេសម៉ាលី ហើយក្នុងបេសកកម្មលើកទីបីនេះលោកត្រូវចេញទៅប្រទេសម៉ាលីសាជាថ្មី។
ពលទាហានវ័យ៣៣ឆ្នាំ ជាកងកម្លាំងក្នុងកងវិស្វកម្មព្រលានយន្តហោះរូបនេះ បានបង្ហាញនូវការតាំងចិត្តចូលរួមបំពេញភារកិច្ចជាបន្ត បើទោះបីជាមានការគំរាមកំហែងពីក្រុមឧទ្ទាមក៏ដោយ។ លោកបានប្រាប់VOAថា៖
«ការទៅលើកនេះ មានអារម្មណ៍ធម្មតា ព្រោះយើងធ្លាប់ចេញទៅMission[បេសកកម្ម]ហ្នឹងហើយអស់ហើយ! ប៉ុន្តែបើតាមការវាយប្រហាររបស់ពួកឧទ្ទាម មានមែន ចំណែកអារម្មណ៍របស់ខ្ញុំ ឥតមានការព្រួយបារម្ភអ្វីសោះ! ព្រោះធ្លាប់ ធ្លាប់ហើយ»។
ចំណែកលោកអនុសេនីយ៍ទោ យូ ណី អាយុ២៧ឆ្នាំ ដែលចេញទៅចូលរួមនឹងបេសកកម្មអង្គការសហប្រជាជាតិជាលើកដំបូង បាននិយាយថាភារកិច្ចរបស់ចម្បងរបស់លោក ដែលត្រូវឈរជើងនៅប្រទេសស៊ូដង់ខាងត្បូង គឺរក្សាការពារជនស៊ីវិល និងបណ្ដាជនភៀសសឹកដែលងាយរងគ្រោះ។
កងកម្លាំងនៃកងរាជអាវុធហត្ថលេខ៦៨១រូបនេះ បាននិយាយថា វាមានសារៈសំខាន់ណាស់ដែលកងកម្លាំងរក្សាសន្តិភាពរបស់កម្ពុជាមានកិច្ចសហប្រតិបត្តិការណ៍ល្អជាមួយនឹងកងកម្លាំងមួកខៀវប្រទេសដទៃ កងកម្លាំងម្ចាស់ស្រុក និងប្រជាជននៅមូលដ្ឋានដែលឈរជើង ក្នុងការការពារការវាយប្រហារពីសំណាក់ក្រុមឧទ្ទាម។
លោក យូ ណី ប្រាប់VOAថា៖
«សម្រាប់ពួកខ្ញុំ អារឿងហ្នឹងវាមានការព្រួយបារម្ភដែរ តែការប្ដេជ្ញាចិត្តត្រូវតែយកជោគជ័យជូនជាតិឱ្យបាន»។
កម្រងរូបភាព៖ ពិធីជូនដំណើរដល់កងកម្លាំងមួកខៀវកម្ពុជា
បងប្អូនសាច់ញាតិ ដែលមានការអាឡោះអាល័យ ស្រណោះចំពោះ ប្ដី កូន ប្រពន្ធ និងមិត្តភក្ដិ បានមកជូនដំណើរកងកម្លាំងមួកខៀវកម្ពុជាដែលត្រូវចេញទៅបំពេញបេសកកម្មសាជាថ្មីនេះ ដល់មូលដ្ឋានទ័ពអាកាសពោធិ៍ចិនតុង។
សម្រាប់អ្នកស្រី យន់ សៀក អាយុ៣៩ឆ្នាំ ការធ្វើដំណើរពីស្រុកកំពង់ត្រាច ខេត្តកំពតក្បែរព្រំដែនវៀតណាម មកជូនដំណើរស្វាមីដែលជាកងអនុសេនាធំកម្ទេចគ្រាប់មិនទាន់ផ្ទុះលេខ១៣២ ជាការជូនដំណើរលើកទីបួនហើយ ដ្បិតស្វាមីអ្នកស្រីធ្លាប់ចេញទៅបំពេញបេសកកម្មដោះមីនអស់បីលើករួចមកហើយ។
បើទោះបីជានេះមិនមែនជាលើកទីមួយដែលស្វាមីរបស់អ្នកស្រី ត្រូវចាកឆ្ងាយភូមិករទៅបំពេញការងារនៅឯនាយសមុទ្រ ចិត្តគំនិតរបស់អ្នកស្រី យន់ សៀក ដែលនៅផ្ទះមើលថែរក្សាកូនប្រុសស្រីតូចៗចំនួនពីរនាក់ នៅតែរក្សាក្ដីបារម្ភ និងតែងបន់ស្រន់ឱ្យស្វាមីទទួលបាននូវសុខសុវត្ថិភាព។
អង្គុយជាមួយកូនស្រីច្បង នៅមូលដ្ឋានទ័ពអាកាស អ្នកស្រី យន់ សៀក បានប្រាប់VOAថា៖
«ព្រួយបារម្ភដែរ ភ័យ! ចេះតែភ័យខ្លាចអ៊ីចឹងទៅ យើងមើលមិនឃើញ ខ្លាចគេមកធ្វើបាបយើងអត់ដឹងអត់អីអ៊ីចឹងណាពូ! ប្ដីទៅឆ្ងាយ ចេះដេកគិត ដេកបារម្ភអ៊ីចឹងទៅ»។
បើទោះបីជាមានក្ដីព្រួយបារម្ភ អ្នកស្រី យន់ សៀក បន្តថាអ្នកស្រីនៅតែគាំទ្រស្វាមីជាកងកម្លាំង ឱ្យបំពេញការងារក្នុងបុព្វហេតុដែលខ្លួនគិតថាត្រឹមត្រូវ និងមានផលប្រយោជន៍ដល់មនុស្សជាតិ។
យ៉ាងណាក៏ដោយ ឆ្លៀតឱកាសក្នុងពិធីបញ្ជូនកងកម្លាំងរក្សាសន្តិភាពកម្ពុជា ទៅក្រៅប្រទេស លោក ប៉ុល សារឿន ដែលជាសមាជិកជាន់ខ្ពស់គណបក្សប្រជាជនកម្ពុជាកំពុងកាន់អំណាច និងដែលធ្លាប់បញ្ចេញវោហាស័ព្ទព្រមានប្រើហិង្សា តបតនឹងការប៉ុនប៉ងនានាធ្វើបាតុកម្មប្រឆាំងនឹងរាជរដ្ឋាភិបាលកម្ពុជា ក៏បានយកវេទិកានៃការបញ្ជូនកងកម្លាំងនេះ បង្ហាញពីស្នាដៃនៃការផាត់ចេញដ៏ចម្រូងចម្រាសនៃគណបក្សសង្គ្រោះជាតិ និងមេដឹកនាំនៃបក្សនេះចេញពីឆាកសង្វៀននយោបាយកម្ពុជាផងដែរ ដោយលើកពីហេតុផលសន្តិភាព។
«ដូច្នេះក្នុងបុព្វហេតុថែរក្សាឱ្យបានរឹងមាំនូវសន្តិភាព ការពារខឿនសន្តិភាព ស្ថិរភាពនយោបាយ និងការពារភាពសុខដុមរមនានៃសង្គមជាតិ កម្ពុជាត្រូវបានអនុវត្តនូវវិធានការណ៍ច្បាប់ដ៏ម៉ឺងម៉ាត់ ទប់ស្កាត់ដោយជោគជ័យនូវឧបាយកលបដិវត្តន៍ពណ៌ របស់អតីតគណបក្សប្រឆាំង ដែលប៉ុនប៉ងផ្ដួលរំលំរាជរដ្ឋាភិបាលស្របច្បាប់»។
ការលើកឡើងរបស់នាយឧត្តមសេនីយ៍ផ្កាយមាសបួន ធ្វើឡើងបន្ទាប់ពីរាជរដ្ឋាភិបាលកម្ពុជា របស់លោកនាយករដ្ឋមន្ត្រី ហ៊ុន សែន បានធ្វើការបង្ក្រាប តាមរយៈការចាត់វិធានការច្បាប់ ទៅលើក្រុមរិះគន់រដ្ឋាភិបាល ស្ថាប័នព័ត៌មានមិនចំណុះនឹងរដ្ឋអំណាច និងបក្សជំទាស់ដ៏ធំនៅក្នុងប្រទេសជាមួយនឹងការចាប់ឃុំខ្លួនជាច្រើនផងដែរ។
បើមិនមានការប្រែប្រួលនោះទេ នៅពេលព្រហាមស្រាងៗព្រឹកថ្ងៃសុក្រ ទី០៤ ខែឧសភានេះ កងកម្លាំងទាំងបីកងអង្គភាព ទាំង៤២៨នាក់ នឹងត្រូវចាកចេញតាមជើងយន្តហោះពិសេស ទៅកាន់ទីកន្លែងឈរជើងរបស់ពួកគេរៀងៗខ្លួននៅប្រទេសម៉ាលី និងប្រទេសស៊ូដង់ខាងត្បូង៕
