ប្រធានទីភ្នាក់ងារសហព័ន្ធអាកាសចរណ៍សហរដ្ឋអាមេរិក FAA បាននិយាយកាលពីថ្ងៃពុធ ទី២៨កុម្ភៈថា ក្រុមហ៊ុន Boeing ត្រូវតែបង្កើតផែនការទូលំទូលាយមួយដើម្បីដោះស្រាយ«បញ្ហាគ្រប់គ្រងគុណភាពជាប្រព័ន្ធ»ក្នុងរយៈពេល៩០ថ្ងៃ នៅក្រោយមានភាពអាសន្នពេលកំពុងហោះហើរកាលពីខែមករា ដែលនាំឱ្យមានកង្វល់ជាថ្មីអំពីបញ្ហាសុវត្ថិភាព។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
ប្រធានទីភ្នាក់ងារសហព័ន្ធអាកាសចរណ៍សហរដ្ឋអាមេរិក (FAA) បានទាមទារឱ្យមានផែនការនេះនៅក្នុងសេចក្តីថ្លែងការណ៍មួយរិះគន់ក្រុមហ៊ុនផលិតយន្តហោះនេះនៅក្រោយការប្រជុំមួយថ្ងៃជាមួយលោក Dave Calhoun ប្រធានកិច្ចការប្រតិបត្តិនៃក្រុមហ៊ុន Boeing កាលពីថ្ងៃអង្គារ ទី២៧ ខែកុម្ភៈ។
ប្រធានទីភ្នាក់ងារ FAA លោក Mike Whitaker បាននិយាយនៅក្នុងសេចក្តីថ្លែងការណ៍នេះថា «ក្រុមហ៊ុន Boeing ត្រូវតែប្តេជ្ញាធ្វើឱ្យមានការកែលម្អពិតប្រាកដនិងស៊ីជម្រៅ។ ការធ្វើឱ្យមានការផ្លាស់ប្តូរជាមូលដ្ឋាននឹងតម្រូវឱ្យមានការប្រឹងប្រែងពីពួកអ្នកដឹកនាំក្រុមហ៊ុន Boeing ហើយយើងនឹងដាក់ពួកគេឱ្យមានការទទួលខុសត្រូវខ្ពស់ក្នុងគ្រប់ជំហានទាំងអស់ ជាមួយការយល់គ្នាទៅវិញទៅមកនិងដោយមានការរំពឹងទុកជាមុន»។
លោក Calhoun បានថ្លែងនៅក្នុងសេចក្តីថ្លែងការណ៍មួយថាក្រុមមេដឹកនាំក្រុមហ៊ុន Boeing «មានការប្តេជ្ញាពេញទំហឹង»ដើម្បីដោះស្រាយកង្វល់របស់ FAA។
ក្រុមហ៊ុន Boeing បានប្រញាប់ប្រញាល់ពន្យល់និងពង្រឹងសុវត្ថិភាពនៅក្រោយផ្នែកនៃទ្វារមួយនៃយន្តហោះថ្មីមួយគ្រឿងរបស់ក្រុមហ៊ុនអាកាសចរណ៍ Alaska Airlines ធុន Boeing 737 MAX 9 បានរបើកនៅពេលកំពុងហោះកាលពីថ្ងៃទី៥ ខែមករា ដោយបង្ខំឱ្យអ្នកបើកយន្តហោះនោះចុះចតជាបន្ទាន់ នៅពេលអ្នកដំណើរបានស្ថិតក្នុងយន្តហោះនោះដែលមានប្រហោងមួយនៅកម្ពស់១ម៉ឺន៦ពាន់ feet ពីដី។
អត្រាផលិតរបស់ក្រុមហ៊ុន Boeing ត្រូវបានផ្អាកដោយពួកនិយតករនិងត្រូវបានត្រួតពិនិត្យដោយពួកសមាជិកសភានិងពួកអតិថិជននៅក្រោយឧប្បត្តិហេតុកាលពីថ្ងៃទី៥ ខែមករា ហើយសេចក្តីថ្លែងការណ៍ថ្មីនេះលើកសំណួរថ្មីៗអំពីថាតើការផ្អាកផលិតកម្មនឹងមានរយៈពេលត្រឹមណា។
លោក Whitaker ថាផែនការរបស់ក្រុមហ៊ុន Boeing ត្រូវតែមានបញ្ចូលលទ្ធផលនៃសវនកម្មរបស់ FAA អំពីខ្សែផលិតកម្មនិងការរកឃើញក្នុងរបាយការណ៍នៃគណៈកម្មាធិការពិនិត្យសើរើដែលត្រូវបានចេញផ្សាយកាលពីដើមសប្តាហ៍ចុងក្រោយបង្អស់នៃខែកុម្ភៈ។
របាយការណ៍នេះកាលពីដើមឆ្នាំ២០២៣ បានរិះគន់ខ្លាំងដល់ដំណើរការចាត់ចែងខាងសុវត្ថិភាពរបស់ក្រុមហ៊ុននេះ ដោយនិយាយថាក្រុមហ៊ុន Boeing មានបញ្ហាដោយសារ«ការអនុវត្តន៍មិនគ្រប់គ្រាន់និងដោយច្របូលច្របល់នៃវប្បធម៌សុវត្ថិភាពវិជ្ជមាន»។
កាលពីសប្តាហ៍ទីបីនៃខែកុម្ភៈ ក្រុមហ៊ុន Boeing បានដកលោក Ed Clark ប្រធាននៃកម្មវិធី 737 MAX ដែលមានបញ្ហា ជាផ្នែកមួយនៃការរុះរើក្រុមអ្នកចាត់ចែងកិច្ចការរបស់ក្រុមហ៊ុន។
ប្រធានទីភ្នាក់ងារ FAA លោក Mike Whitaker បានទៅមើលរោងចក្រក្រុមហ៊ុន Boeing នៅ Renton រដ្ឋ Washington ដែលយន្តហោះ737 MAX ត្រូវបានផលិត កាលពីថ្ងៃទី១២ ខែកុម្ភៈ។ មនុស្សពីរនាក់ដែលត្រូវបាននិយាយប្រាប់អំពីបញ្ហានេះបានប្រាប់ទីភ្នាក់ងារសារព័ត៌មាន Reuters ថាលោក Whitaker សម្តែងកង្វល់អំពីអ្វីដែលលោកបានឃើញនៅពេលលោកទៅមើលរោងចក្រនេះ។
បញ្ហារបស់ក្រុមហ៊ុនអាកាសចរណ៍ Alaska Airlines ជាវិបត្តិធំទីពីររបស់ក្រុមហ៊ុន Boeing ក្នុងរយៈពេលប៉ុន្មានឆ្នាំថ្មីៗនេះ ក្រោយមានការធ្លាក់យន្តហោះធុន MAX កាលពីឆ្នាំ២០១៨និងឆ្នាំ២០១៩សម្លាប់មនុស្ស៣៤៦នាក់ដែលនាំឱ្យខូចឈ្មោះក្រុមហ៊ុន Boeing។
ពួកអ្នកចាត់ចែងកិច្ចការប្រតិបត្តិនៃឧស្សាហកម្មអាកាសចរណ៍បានសម្តែងការថប់បារម្ភជាមួយការគ្រប់គ្រងគុណភាពរបស់ក្រុមហ៊ុន Boeing។ ក្រុមហ៊ុន Airbus របស់ប្រទេសបារាំង ដែលជាក្រុមហ៊ុនផលិតយន្តហោះពាណិជ្ជកម្មធំមួយទៀតបានរាយការណ៍កាលពីខែមករាអំពីការបញ្ជាទិញយន្តហោះប្រចាំឆ្នាំច្រើនមិនធ្លាប់មានពីមុន ហើយបានបញ្ជាក់អំពីកំណើន១១%នៃការប្រគល់យន្តហោះរបស់ក្រុមហ៊ុននេះក្នុងឆ្នាំ២០២៣ ដោយរក្សាទុកផលិតកម្មកំពូលលើក្រុមហ៊ុន Boeing ក្នុងឆ្នាំទី៥ជាបន្តបន្ទាប់។
ទីភ្នាក់ងារ FAA បានបញ្ជាមិនឱ្យយន្តហោះ MAX 9 ហោះហើរច្រើនសប្តាហ៍មកហើយក្នុងខែមករា ហើយបានផ្អាកការផលិតយន្តហោះធុន MAX នៅពេលខ្លួនធ្វើសវនកម្មការផលិតយន្តហោះរបស់ក្រុមហ៊ុន Boeing នៅក្រោយមានបញ្ហាខាងគុណភាពមួយចំនួន។
បើតាមរបាយការណ៍ដំបូងមួយនៅខែកុម្ភៈរបស់គណៈកម្មាធិការសុវត្ថិភាពខាងការដឹកជញ្ជូនជាតិរបស់អាមេរិកថាផ្នែកនៃទ្វារដែលរបើកពីយន្តហោះ MAX 9 ហាក់ដូចជាបាត់ប៊ូឡុងសំខាន់ៗបួន។ ទ្វារនេះមាននៅក្នុងយន្តហោះធុន 737 MAX 9s ខ្លះជំនួសទ្វារបន្ថែមមួយសម្រាប់គ្រាមានអាសន្ន។
បើតាមសេចក្តីរាយការណ៍នេះ ទ្វារដែលមានបញ្ហានេះត្រូវបានដកចេញដើម្បីជួសជុល ប៉ុន្តែគណៈកម្មាធិការ NTSB មិនបានរកឃើញភ័ស្តុតាងថាប៊ូឡុងទាំងនេះត្រូវបានដាក់ជាថ្មីទេ។
ការលាតត្រដាងនេះបានធ្វើឱ្យក្រុមហ៊ុនអាកាសចរណ៍ជាអតិថិជនរបស់ក្រុមហ៊ុន Boeing ខឹងសម្បារ។ ក្រុមហ៊ុនអាកាសចរណ៍ខ្លះ រួមមានក្រុមហ៊ុន Alaska Airlines ផងដែរ បានប្រកាសថាពួកគេនឹងត្រួតពិនិត្យអំពីគុណភាពយន្តហោះនៅមុនពេលយន្តហោះទាំងនោះចាកចេញពីរោងចក្រក្រុមហ៊ុន Boeing៕
ប្រែសម្រួលដោយលោក ឈឹម សុមេធ
វេទិកាបញ្ចេញមតិ