រដ្ឋមន្រ្តីក្រសួងការបរទេសកម្ពុជាដែលជាម្ចាស់ផ្ទះនៃកិច្ចប្រជុំរដ្ឋមន្រ្តីការបរទេសអាស៊ាននៅថ្ងៃព្រហស្បតិ៍នេះបានថ្លែងថា សមាជិកបានពិភាក្សាគ្នាដោយស្ថាបនានិងផ្លែផ្កាលើផែនការការងារមួយឆ្នាំរបស់អាស៊ានហើយក៏មានការពិភាក្សាអំពីការពង្រឹងមជ្ឈភាពរបស់សមាគមនេះក្នុងពេលមានការប្រកួតប្រជែងភូមិសាស្រ្តនយោបាយ។
លោក ប្រាក់ សុខុន រដ្ឋមន្រ្តីក្រសួងការបរទេសកម្ពុជាបានថ្លែងបែបនេះនៅក្នុងសន្និសីទសារព័ត៌មានមួយដែលធ្វើឡើងកាលពីរសៀលថ្ងៃព្រហស្បតិ៍ក្រោយបញ្ចប់កិច្ចប្រជុំចង្អៀតរដ្ឋមន្រ្តីការបរទេសអាស៊ាននៅសណ្ឋាគារ Sofitel Phnom Penh Phokeethra នៅរាជធានីភ្នំពេញ។
លោកថ្លែងថារដ្ឋមន្រ្តីការបរទេសបានពិភាក្សាពីមធ្យោបាយនានាដើម្បីធ្វើឲ្យប្រសើរនូវការខិតខំប្រឹងប្រែងដើម្បីកសាងសហគមន៍អាស៊ានការកសាងសមត្ថភាពការពង្រឹងមជ្ឈភាពអាស៊ានការរួបរួមការភ្ជាប់ទំនាក់ទំនងជាមួយប្រទេសខាងក្រៅការស្តារស្ថានភាពក្រោយជំងឺកូវីដ១៩បញ្ហាទំនាក់ទំនងសេដ្ឋកិច្ចបញ្ហាសមុទ្រចិនខាងត្បូងនិងបញ្ហាប្រទេសមីយ៉ាន់ម៉ាជាដើម។
នៅក្នុងបញ្ហាការប្រកួតប្រជែងភូមិសាស្រ្តនយោបាយលោក ប្រាក់ សុខុន បានបញ្ជាក់ថា៖ «អ៊ីចឹងយើងបានពិភាក្សាគ្នាថា តើធ្វើម៉េច ដឹកនាំអាស៊ានដឹកនាំការកសាងសហគមន៍អាស៊ាននេះក្នុងកម្រិតណាដែលមិនត្រូវទទួលផលប៉ះពាល់ជាអវិជ្ជមានពីការប្រកួតប្រជែងនោះ។ នេះជារឿងសំខាន់។ អ៊ីចឹងហើយបានជារដ្ឋមន្រ្តីការបរទេសនានាបានលើកឡើងអំពីការពង្រឹងមជ្ឈភាពរបស់អាស៊ាន»។
បើតាមលោក ប្រាក់ សុខុន អាស៊ានក៏បន្តបារម្ភអំពីបញ្ហានៅប្រទេសមីយ៉ាន់ម៉ានិងអំពាវនាវឲ្យរបបយោធាមីយ៉ាន់ម៉ា«ចាត់វិធានការរឹងមាំ»ក្នុងការអនុវត្តកិច្ចព្រមព្រៀង៥ចំណុចដែលបានឯកភាពគ្នាកាលពីខែមេសាឆ្នាំ២០២១«ឲ្យឆាប់រហ័ស»។ លោកបន្ថែមថាការជជែកអំពីបញ្ហាប្រទេសមីយ៉ាន់ម៉ានេះគឺធ្វើឡើងក្នុងនាមជា«គ្រួសារអាស៊ាន» ហើយចង់ជួយប្រទេសមីយ៉ាន់ម៉ាឲ្យចាកផុតពីវិបត្តិនយោបាយ។ លោកបញ្ជាក់ថា បញ្ហាមីយ៉ាន់ម៉ា«ស្មុគស្មាញណាស់» ហើយវាទាមទារពេលវេលានិងការអត់ធ្មត់។
គួរបញ្ជាក់ថារដ្ឋមន្រ្តីការបរទេសអាស៊ាន៦រូបបានមកចូលរួមប្រជុំដោយផ្ទាល់នៅរាជធានីភ្នំពេញហើយ៣នាក់ទៀតបានចូលរួមតាមវីដេអូអនឡាញរួមមានរដ្ឋមន្រ្តីការបរទេសព្រុយណេវៀតណាម និងថៃ។ កិច្ចប្រជុំនេះមិនមានវត្តមានរដ្ឋមន្រ្តីការបរទេសរបស់របបយោធាមីយ៉ាន់ម៉ាឡើយដោយសារអាស៊ានសម្រេចមិនអញ្ជើញមន្រ្តីថ្នាក់នយោបាយក្រោយមិនមានការវិវឌ្ឍជាដុំកំភួននៃចំណុចព្រមព្រៀងទាំង៥កាលពីខែមេសាឆ្នាំ២០២១នោះ៕
