សហរដ្ឋអាមេរិកសម្រេចបញ្ចប់ឋានៈការពារបណ្តោះអាសន្នដល់ពលរដ្ឋហុងឌុយរ៉ាសចំនួន៥៧០០០នាក់ដែលបានរស់នៅក្នុងសហរដ្ឋអាមេរិកអស់រយៈពេលជិតពីរទសវត្សរ៍មកហើយ។
ប៉ុន្តែសេចក្តីប្រកាសរបស់ក្រសួងសន្តិសុខមាតុភូមិសហរដ្ឋអាមេរិកដែលបានចេញផ្សាយកាលពីថ្ងៃសុក្រក៏បានបញ្ជាក់ថាការអនុវត្តនឹងចូលជាធរមានក្នុងរយៈពេល១៨ខែទៀតគឺរហូតដល់ថ្ងៃទី៥ខែមករាឆ្នាំ២០២០ «ដើម្បីទុកពេលឱ្យធ្វើការផ្លាស់ប្តូរដោយត្រឹមត្រូវ»។
រដ្ឋាភិបាលហុងឌុយរ៉ាសនិយាយថាខ្លួនសោកស្តាយចំពោះសេចក្តីសម្រេចចិត្តរបស់សហរដ្ឋអាមេរិកហើយថាប្រទេសនេះមិនបានត្រៀមខ្លួនត្រឹមត្រូវដើម្បីទទួលជនមាតុភូមិនិវត្តន៍ដ៏ច្រើនដូចនេះទេ។
លោកស្រី Nancy Pelosi មេដឹកនាំក្រុមគណបក្សប្រជាធិបតេយ្យក្នុងរដ្ឋសភាជាតិបានចេញសេចក្តីថ្លែងការណ៍តបនឹងសេចក្តីសម្រេចនោះដោយបញ្ជាក់ថា «ការដកហូតឋានៈការពារបណ្តោះអាសន្ននិងបញ្ជូនចេញមនុស្សរាប់ម៉ឺនគ្រួសារនឹងកាន់តែធ្វើឱ្យការឈឺចាប់របស់ពលរដ្ឋហុងឌុយរ៉ាសកាន់តែធ្ងន់ធ្ងរឡើងព្រោះនៅទីនោះមានអស្ថិរភាពនយោបាយ កង្វះស្បៀងអាហារហើយអំពើហិង្សាបង្កឡើងដោយពួកក្រុមជនពាលនៅតែបន្តមានហើយបានបណ្តាលឱ្យពលរដ្ឋស្លាប់ជាច្រើននាក់»។
ពលរដ្ឋហុងឌុយរ៉ាសទាំងនោះទទួលបានឋានៈការពារបណ្តោះអាសន្ននេះតាំងពីឆ្នាំ១៩៩៩គឺបន្ទាប់ពីមានខ្យល់ព្យុះ Herricane Mitch ដែលបានបង្កឱ្យខូចខាតប្រទេសនេះ។
ការបញ្ចប់ឋានៈការពារបណ្តោះអាសន្នសម្រាប់ពលរដ្ឋហុងឌុយរ៉ាសក៏មានន័យថាពលរដ្ឋជាង៤០ម៉ឺននាក់មកពីប្រទេសជាច្រើនដែលរងគ្រោះដោយអំពើហិង្សានិងគ្រោះធម្មជាតិក៏កំពុងតែប្រឈមមុខនឹងការបណ្តេញចេញដែរចាប់ពីចុងឆ្នាំនេះទៅបើសិនជាពួកគេមិនទទួលបានសិទ្ធិរស់នៅស្របច្បាប់ដោយមធ្យោបាយណាផ្សេងទៀតទេ៕
