ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អត្ថបទចុងសប្តាហ៍

ថ្ងៃសុក្រ ១៩ មេសា ២០២៤

ប្រក្រតីទិន
ខែ មេសា ២០២៤
អាទិ. ច. អ. ពុ ព្រហ. សុ. ស.
៣១
១០ ១១ ១២ ១៣
១៤ ១៥ ១៦ ១៧ ១៨ ១៩ ២០
២១ ២២ ២៣ ២៤ ២៥ ២៦ ២៧
២៨ ២៩ ៣០
អ្នកស្រី Sakara Seng (កណ្ដាល) ដែល​ជា​កូនស្រី​របស់​លោក សៀង សេង បញ្ចប់​ការ​សិក្សា​​ជំនាញ​វេជ្ជសាស្ត្រ​ពី​សាកលវិទ្យាល័យ Stanford។ (រូបថត​ផ្ដល់​ឲ្យ​ដោយ​លោក សៀង សេង)
អ្នកស្រី Sakara Seng (កណ្ដាល) ដែល​ជា​កូនស្រី​របស់​លោក សៀង សេង បញ្ចប់​ការ​សិក្សា​​ជំនាញ​វេជ្ជសាស្ត្រ​ពី​សាកលវិទ្យាល័យ Stanford។ (រូបថត​ផ្ដល់​ឲ្យ​ដោយ​លោក សៀង សេង)

លោក​វេជ្ជបណ្ឌិត ​សៀង សេង ​បាន​ចាត់​ទុក​ខ្លួន​លោក​ថា​ជា ​«មនុស្ស​មាន​សំណាង»​ ម្នាក់ ដែល​លោក​និង​ភរិយា​ត្រូវ​បាន​ជ្រើសរើស​ពី​ក្នុង​ចំណោម​ជនភៀសខ្លួន​ជាច្រើន​ម៉ឺន​នាក់​នៅ​ក្នុង​ជំរំ​ខៅអ៊ីដាង​ឲ្យ​មក​រស់នៅ​សហរដ្ឋ​អាមេរិក​ក្នុង​ខែ​សីហា ឆ្នាំ​១៩៨០។ នោះ​គឺ​ជា​សំណាង​ដែល​លោក​ទទួល​បាន​បន្ទាប់​ពី​រង​ភាព​សោកសៅ​ដោយសារ​ការ​ស្លាប់​បាត់បង់​សមាជិក​គ្រួសារ​ជាច្រើន​នាក់​ក្នុង​របប​វាល​ពិឃាត​ខ្មែរក្រហម ​ដែល​ទើប​បាន​បញ្ចប់​កាលពី​ជាង​មួយ​ឆ្នាំ​មុន។​

លោកសៀង សេង​បាន​ចូល​មក​ដល់​ជំរំ​ខៅអ៊ីដាង ​ពេល​ដែល​ជំរំ​នេះ​ទើបតែ​បើក​បាន​ពីរ​ថ្ងៃ​ប៉ុណ្ណោះ​និង​បាន​រស់នៅ​ទីនោះ​ចំនួន ៧ ខែ ​ដោយ​ជួយ​ដល់​ក្រុម​គ្រូពេទ្យ​ស្ម័គ្រចិត្ត​របស់​គណៈកម្មាធិការ​ជនភៀស​ខ្លួន​អាមេរិកាំង​ (American Refugee Committee) ​ក្នុង​ជំរំ។ គ្រូពេទ្យ​ចិត្ត​ធម៌​ម្នាក់​បាន​ទាក់ទងអង្គការ​ជនភៀសខ្លួន​ហាវ៉ៃ (Hawaii Refugee Organization) ​ជួយ​ធានា​ និង​រៀបចំ​ឯកសារ​និង​ក៏​មាន​ឪពុកមា​ខាង​ប្រពន្ធ​ដែល​នៅ​សហរដ្ឋ​អាមេរិក​ស្រាប់​បាន​ជួយ​បន្ថែម។

លោក​បាន​រំលឹក​ប្រាប់​វីអូអេ​ក្នុង​បទសម្ភាស​ថា៖

«ពេល​យើង​ទៅ​ដល់​ភ្លាម​គឺ​អត់​មាន​បងប្អូន​ណា​ទាំងអស់​។ អត់​ស្គាល់​អ្នកណា​ទាំងអស់ ដូច្នេះ​ក្តី​សង្ឃឹម​គឺ​ថា​ពួកអ្នកសាសនា​ដែល​គេ​ទៅ​កន្លែងនោះ​នឹកថា​ប្រហែល​គេ​អាច​ជួយ​យើង​បាន​។ ប៉ុន្តែ​ខ្ញុំ​មាន​សំណាង​ដែល​បាន​ជួប​បងប្អូន​ដែល​ក្រោយ​មក​គាត់​សុខចិត្ត​ធានា​ឲ្យមកប្រទេស​គេ»។​

ជំរំខៅអ៊ីដាង​ដែល​អង្គការ​សហប្រជាជាតិ​គ្រប់គ្រង​រួមគ្នា​ជាមួយ​នឹង​រដ្ឋាភិបាល​ថៃ​បាន​បើក​ក្នុង​ខែ​វិច្ឆិកា ​ឆ្នាំ​១៩៧៩ គឺមានរយៈ​ពេល​មិនដល់មួយឆ្នាំ​ក្រោយពី​កងទ័ព​វៀតណាម​បាន​ចូលមក​ឈ្លានពាន​ប្រទេស​កម្ពុជា​និង​ផ្តួល​រំលំ​របប​ខ្មែរក្រហម​ដែលចិនកុម្មុយនីស្ត​គាំទ្រនៅដើម​ខែមករា​និង​បាន​លើក​បន្តុប​របប​មួយ​ដែល​រណបក្រុង​ហាណូយ។ ​

ជំរំ​ដែល​ហ៊ុំព័ទ្ធ​ដោយ​ដើម​ឫស្ស៊ី​នេះ​បាន​សាងសង់​ចម្ងាយ ​១២​គីឡូម៉ែត្រ​ ចូល​ក្នុង​ទឹក​ដី​ថៃ​ហើយ​មាន​ជនភៀសខ្លួន​ជាង​២០០.០០០​ នាក់​ បាន​ឆ្លងកាត់​ក្នុង​ពេល​ដំណើរការ​រយៈពេល​១៤ឆ្នាំនោះ​ ដោយ​អ្នក​ខ្លះ​បាន​បន្ត​ទៅ​ប្រទេស​ទីបី និង​អ្នក​ខ្លះ​បាន​វិល​ត្រឡប់​ទៅ​ប្រទេស​កម្ពុជា​វិញ​បន្ទាប់ពី​ភាគី​ជម្លោះ​ខ្មែរ​នានា​បាន​ព្រមព្រៀង​បញ្ចប់​សង្គ្រាម​ស៊ីវិល​នៅ​ចុង​ឆ្នាំ​១៩៩១។ នេះ​បើ​តាម​តួលេខ​របស់​អង្គការ​សហ​ប្រជាជាតិ​ទទួល​បន្ទុក​ជនភៀសខ្លួន (UNHCR)។

លោកវេជ្ជបណ្ឌិត សៀង សេង (ស្ដាំ) និង​ភរិយា គឹមលី សេង​ ឈរ​ថត​រូប​នៅ​មុខ​មន្ទីរពេទ្យ A.R.C នៅ​ជំរំ​ជនភៀសខ្លួន​ខៅអ៊ីដាង។ (រូបថត​ផ្ដល់​ឲ្យ​ដោយ​លោក សៀង សេង)
លោកវេជ្ជបណ្ឌិត សៀង សេង (ស្ដាំ) និង​ភរិយា គឹមលី សេង​ ឈរ​ថត​រូប​នៅ​មុខ​មន្ទីរពេទ្យ A.R.C នៅ​ជំរំ​ជនភៀសខ្លួន​ខៅអ៊ីដាង។ (រូបថត​ផ្ដល់​ឲ្យ​ដោយ​លោក សៀង សេង)
លោក​វេជ្ជបណ្ឌិត សៀង សេង (ឆ្វេង) និង​ភរិយា គឹមលី សេង​ ឈរ​ថតរូប​នៅ​ពី​មុខ​ជំរំ​ជនភៀសខ្លួន កាល​ពី​ឆ្នាំ​១៩៧៩។ (រូបថត​ផ្ដល់​ឲ្យ​ដោយ​លោក សៀង សេង)
លោក​វេជ្ជបណ្ឌិត សៀង សេង (ឆ្វេង) និង​ភរិយា គឹមលី សេង​ ឈរ​ថតរូប​នៅ​ពី​មុខ​ជំរំ​ជនភៀសខ្លួន កាល​ពី​ឆ្នាំ​១៩៧៩។ (រូបថត​ផ្ដល់​ឲ្យ​ដោយ​លោក សៀង សេង)

នៅ​ចន្លោះ​ពី​ឆ្នាំ១៩៨១​ ដល់​១៩៩១​ មាន​ជនភៀសខ្លួន​កម្ពុជា​ជាង​ ២៦​ម៉ឺន​នាក់​ ត្រូវ​បាន​ទទួល​យក​ឲ្យ​មក​ស្នាក់​នៅ​ប្រទេស​ទីបីក្នុង​នោះ​ជិត ១៥ម៉ឺននាក់ ​ត្រូវ​បាន​សហរដ្ឋ​អាមេរិក​ទទួល​យក​ហើយ​ឲ្យ​ស្នាក់នៅ​តាម​រដ្ឋ​នានា​ដោយ​ភាគច្រើន​នៅ​រដ្ឋ​កាលីហ្វញ៉ា ​ម៉ាស្សាឈូសិត ​ផិនស៊ីលវេនៀ ​វ៉ាស៊ីនតោន​ និង​តិចសាស។

ពេល​មក​ដល់​សហរដ្ឋ​អាមេរិក​ដំបូង​លោក​ សៀង សេង ​និង​ភរិយា ​គឹមលី សេង ​ត្រូវ​បាន​ដាក់​ឲ្យ​នៅ​ទីក្រុង​ហូណូលូលូ រដ្ឋហាវ៉ៃ ដោយសារអង្គការជនភៀសខ្លួនហាវ៉ៃ​ជាអ្នកជួយធានាមក។​ លោក​បាន​ជួប​បញ្ហា​ប្រឈម​ជាច្រើន​តាំងពី​ភាសា ​ការស្វែងរក​ការងារ​ធ្វើ​និង​សមាជិក​គ្រួសារ​កើន​ឡើង។​

កូនប្រុស​ដំបូង​របស់​លោក​គឺ​ សកុណា សេង ​បាន​កើត​ក្នុង​រយៈពេល ​១០​ថ្ងៃ​ ក្រោយពី​បាន​មក​ដល់​សហរដ្ឋ​អាមេរិក។ ប៉ុន្តែ​លោក​មិន​ដែល​បោះបង់​ចោល​ក្តី​ប្រាថ្នា​ចង់​ក្លាយ​ជា​វេជ្ជបណ្ឌិត​ទេ​ បើ​ទោះបី​ជា​ត្រូវ​រៀន​សូត្រ​ផង​និង​ធ្វើការ​ផង​ក៏​ដោយ។ ក្នុង​នោះ​មាន​ការងារ​ជា​អ្នកដឹកជញ្ជូន​សាប៊ូ​ឲ្យ​អតិថិជន​និង​ក្រង​ផ្កា​យក​ទៅ​លក់​ជាដើម។

ក្នុងឆ្នាំ​១៩៨៨ លោក សៀង សេង​ បាន​បញ្ចប់ការសិក្សា​មុខវិជ្ជាពេទ្យ​ពី​សាលាពេទ្យ​ John A. Burns នៃសាកលវិទ្យាល័យ​ហាវ៉ៃ។

លោក​បាន​បញ្ជាក់​ប្រាប់​វីអូអេ​ថា៖

«មាន​ការ​ពិបាក​ច្រើន​មិន​ដូច​បងប្អូន​យើង​ខ្លះ​ថា​ពេលមក​ដល់រៀន​ទៅ​តាមចិត្ត​គឺអត់​ទេ ប៉ុន្តែ​គ្រាន់​ថា​ខ្ញុំ​មាន​គំនិត​មួយ​ថា​ គ្មានអ្វី​វេទនា​ដូច[របប]ប៉ុលពតទេ។ ដូច្នេះ​អ្វីៗ​ទៀត​ខ្ញុំ​អាច​ជម្នះ​បាន ដូច្នេះ​ហើយ​បាន​ខ្ញុំ​អាច​បានចូល​ទៅសាលា​ពេទ្យ​ហើយ​បាន​ចេញជា​វេជ្ជបណ្ឌិត​តាម​សេចក្តីប្រាថ្នា​របស់​ខ្ញុំ»។​

នោះ​គឺជា​ក្តី​សុបិន​មួយ​ដែល​លោក​បាន​បាត់បង់​នៅ​ពេល​ដែល​ទាហាន​អាវ​ខ្មៅ​ខ្មែរ​ក្រហម​បាន​ដើរ​ចូល​ទីក្រុង​ភ្នំពេញ​ និង​ផ្តួល​រំលំ​របប​លន់ នល់ ​ដែល​សហរដ្ឋ​អាមេរិកាំង​គាំទ្រ​ និង​ជម្លៀស​ពលរដ្ឋ​ចេញ​ទៅ​រស់នៅ​តាម​ទី​ជនបទ​និង​បិទ​សាលារៀន​ទាំងអស់។​ ពេលនោះ​លោក​នៅ​ខ្វះ​តែ​ពីរ​ឆ្នាំ​ទៀត​ប៉ុណ្ណោះ​នឹង​បាន​សញ្ញាប័ត្រ​វេជ្ជបណ្ឌិត​ពី​សាលាពេទ្យ​នៅ​រាជធានី​ភ្នំពេញ។​

ក្រោយពី​បញ្ចប់​ការសិក្សា​ លោក​វេជ្ជបណ្ឌិត​ សៀង សេង​ បាន​ធ្វើការ​ជា​គ្រូពេទ្យ​ប្រចាំ​គ្រួសារ​ក្នុង​ក្រុង​ម៉ូដេសស្តូ រដ្ឋកាលីហ្វញ៉ា ជាទី​ដែល​មាន​ជនភៀសខ្លួន​កម្ពុជា​ជាច្រើន​ដែល​សហរដ្ឋ​អាមេរិក​ទទួល​យក​បញ្ជូនឲ្យ​ស្នាក់នៅ។ លោក​បាន​ព្យាបាល​ពលរដ្ឋ​កម្ពុជា​ជា​ច្រើន​ពាន់​នាក់​ទាំង​ចាស់​និង​ក្មេង។

លោក​វេជ្ជបណ្ឌិត សៀង សេង ​មាន​កូន​ប្រុស​ពីរ​នាក់ ​និង​កូន​ស្រី​ម្នាក់​ដែល​សុទ្ធ​តែ​ជា​វេជ្ជបណ្ឌិត​ ហើយ​កូន​ប្រសារ​ពីរ​នាក់​ក៏​ជា​វេជ្ជបណ្ឌិត​ធ្វើការនៅ​តំបន់​សាក្រាម៉ាន់តូ (Sacramento Valley) ដែរ។

ក្នុង​ពេល​សម្ភាស​ជាមួយ​នឹង​ VOA​ មាន​ពេលខ្លះ​លោក​វេជ្ជបណ្ឌិត ​ត្រូវ​អាក់​មួយ​រយៈ​ដោយ​ការ​អួល​ដើម​ក​ពេល​រំលឹក​ដល់​សាច់រឿង​ឈឺ​ចាប់​ពី​អតីតកាល​។​ បើ​ទោះ​បី​ជា​មក​នៅ​សហរដ្ឋអាមេរិក ​៤០ឆ្នាំ ​ប៉ុន្តែ​លោក​វេជ្ជបណ្ឌិត​បញ្ជាក់​ថា ​លោក​នៅតែ​នឹក​មាតុភូមិ​ជានិច្ច។

លោក​វេជ្ជបណ្ឌិត​សៀង សេង​បន្ថែម​ថា៖​

«យើង​មិន​ចង់​ចាកចេញ​ពី​ស្រុក​ខ្មែរ​ទេ ​បើ​សិន​ជា​ស្រុក​យើង​មាន​សុខ​សន្តិភាព​នៅ​ពេល​នោះ។ យើង​រត់​ចេញ​ពី​ស្រុក​ខ្មែរ​មក ​ដោយ​សារ​វាមានភាព​មិន​ទៀងទាត់​នៅ​ពេល​ហ្នុង​។ អនាគត​ស្រុក​យើង​មិន​ទៀងទាត់ ​គឺ​ដោយសារ​សង្គ្រាម​និង​ដោយសារ​ភាព​បាក់ស្បាត​បន្ទាប់​ពី​រស់​នៅ​ក្នុង​របប​កុម្មុយនីស្ត»។​

លោក​វេជ្ជបណ្ឌិត ​សៀង សេង ​ក៏​បាន​និពន្ធ​សៀវភៅ​ប្រវត្តិ​ផ្ទាល់ខ្លួន​ដែល​មាន​ចំណង​ជើង​ថា​«រដូវអត់អាហារ៖ ​ខ្សែ​ជីវិត​របស់​ខ្មែរ​មួយ​រូប» ​ដែល​បាន​បោះពុម្ភ​នៅ​ខែសីហា​ ឆ្នាំ​២០១៧។​ សៀវភៅ​នោះ​គឺ​ដើម្បី​ចែករំលែក​ដំណើរ​ជីវិត​ក្នុង​របប​វាលពិឃាត​ដែល​រូបលោក​បាន​រងគ្រោះ​ដោយ​ផ្ទាល់​ ដែល​រួម​មាន​ការ​ធ្វើ​ការងារ​ធ្ងន់ធ្ងរ​ និង​ការ​ស្លាប់​បាត់បង់​សមាជិក​ក្រុមគ្រួសារ​ម្តង​ម្នាក់ៗ​ ដោយសារ​ជំងឺ​និង​ការអត់ឃ្លាន។

លោក សកុណា សេង (កណ្ដាល) ដែល​ជាកូនប្រុសរបស់​លោក​វេជ្ជបណ្ឌិត សៀង សេង បញ្ចប់​ការ​សិក្សាជំនាញ​វេជ្ជសាស្ត្រ​ពី​សាកលវិទ្យាល័យ Mid-western University។ (រូបថត​ផ្ដល់​ឲ្យ​ដោយ​លោក សៀង សេង)
លោក សកុណា សេង (កណ្ដាល) ដែល​ជាកូនប្រុសរបស់​លោក​វេជ្ជបណ្ឌិត សៀង សេង បញ្ចប់​ការ​សិក្សាជំនាញ​វេជ្ជសាស្ត្រ​ពី​សាកលវិទ្យាល័យ Mid-western University។ (រូបថត​ផ្ដល់​ឲ្យ​ដោយ​លោក សៀង សេង)

​លោក​វេជ្ជបណ្ឌិត​បាន​បន្ត​ថា៖

«ជា​ការ​សោកស្តាយ​ការ​សម្លាប់​រង្គាល​នៅតែ​បន្ត​មាន​នៅ​ក្នុង​ពិភពលោក ​គឺ​ថា​នៅ​មិន​ទាន់​អស់​នៅ​ឡើយ​។ អ្វីៗ​ទាំងអស់​ខ្ញុំ​ជឿថា ​ស្ថិតនៅ​លើ​ក្មួយៗ​និង​ចៅៗ​ជំនាន់​ក្រោយ​ ដែល​ត្រូវ​ខំរៀនសូត្រ​អំពី​ភាព​វេទនា​របស់​ជីវិតប្រជាជន​យើង​ ដើម្បី​ជា​មធ្យោបាយ​និង​រកគន្លឹះ​ឃាឃាំង​កុំឲ្យ​របប​បែប​នេះ​កើត​ឡើង​បាន​ទៀត»។​

អង្គការ​សហប្រជាជាតិ​ទទួលបន្ទុក​ជនភៀសខ្លួន​រាយការណ៍​ថា​ នៅ​ពេល​បច្ចុប្បន្ននេះ​មាន​ពលរដ្ឋ​ចាកចោល​លំនៅដ្ឋាន​ជាង ​៧០ លាន នាក់​ នៅ​ទូទាំង​ពិភពលោក​ ក្នុង​នោះ​ជនភៀសខ្លួន​ចំនួន​ជិត ​២៦​លាន​នាក់។ រីឯ​ជនចាកចេញ​ពី​លំនៅ​ក្នុង​ប្រទេស​ដោយសារ​វិបត្តិ​ក្នុង​ស្រុក​មាន​រហូត​ដល់​ជាង ​៤១​លាន​នាក់​ និងជនស្វែង​រក​សិទ្ធិ​ជ្រកកោណ​មាន​ចំនួន​ ៣​ លាន​ ៥ សែន នាក់។

ដោយសារ​រដ្ឋបាល​លោក​ប្រធានាធិបតី​ ដូណាល់ ត្រាំ​ មាន​គោលនយោបាយ​តឹងរ៉ឹងចំពោះ​ជនភៀស​ខ្លួន​ ធ្វើ​ឲ្យ​សហរដ្ឋ​អាមេរិក​លែង​ជា​គោលដៅ​ទទួលយក​ជនភៀសខ្លួន​ជាច្រើន​ដូច​រដ្ឋបាល​មុនៗ។ ​ក្នុង​រយៈពេល​ជាង ​៣ឆ្នាំ​មកនេះ​ សហរដ្ឋ​អាមេរិក​ទទួល​យក​ជនភៀស​ខ្លួន​តែ​ជាង​ ៧៦.០០០ នាក់​ ប៉ុណ្ណោះ។ នេះ​បើតាម​ទិន្នន័យ​ចងក្រង​ដោយ​មជ្ឈមណ្ឌល​ស្រាវជ្រាវ​ Pew។

ក្នុង​ឆ្នាំ​២០២០​នេះ​ គឺ​សហរដ្ឋ​អាមេរិក​ទទួល​ជនភៀសខ្លួន​តែ​ចំនួន​ ៧.៦០០ ​នាក់។ ក្នុង​នោះ​អង្គការ​សេវា​ជនអន្តោប្រវេសន៍​និង​ជនភៀស​ខ្លួន​លូថេរ៉ាន់ ​(LIRS) ​ជួយ​សម្រួល​បាន ​២.០០០នាក់។​ នេះ​បើ​តាម​ការ​បញ្ជាក់​របស់​អ្នកស្រី​ ខេ បេល័រ ​(Kay Bellor)​ អនុ​ប្រធាន​កម្មវិធី​ជនភៀសខ្លួន​នៃ​អង្គការ​ LIRS ។

អ្នកស្រី ខេ បេល័រ បានបន្ថែមប្រាប់​ VOA ​ថា៖

«ខ្ញុំ​មិន​ដែល​ឃើញ​អ្វី​ដូច​ពេល​នេះ​ទេ​ក្នុង​ការងារ​ជាច្រើន​ឆ្នាំ​របស់​ខ្ញុំ​ដោយ​រួម​ទាំង​ក្រោយ​ពេល​[ភេរវកម្ម​វាយប្រហារ] ​ថ្ងៃទី​១១ ​ខែកញ្ញា ​គឺជា​ពេល​ដែល​យើង​ជួបប្រទះ​ការ​លំបាក​រយៈពេល​ ២​ ឆ្នាំ​ ក៏​យើង​នៅតែ​ទទួល​យក​ជនភៀស​ខ្លួន ៣ម៉ឺន​នាក់។ ក្នុងឆ្នាំ២០១៨​ រដ្ឋបាល​នេះ​ទទួល​យក​ជនភៀស​ខ្លួន​២២.០០០នាក់។ ហើយ​ឆ្នាំ​មុន​គេ​បាន​ទទួល​ ៣ម៉ឺននាក់​ ប៉ុន្តែ​នាំ​នេះ​គឺ​ជា​គ្រោះថ្នាក់​មួយ»។​

លោក កុសល សេង (រាប់​ពី​ឆ្វេង​ទី​បី) ដែល​ជា​កូន​ប្រុស​ម្នាក់​របស់​លោក​វេជ្ជបណ្ឌិត សៀង សេង បញ្ចប់​ការ​សិក្សា​ជំនាញ​វេជ្ជសាស្ត្រ​ពី​សាកលវិទ្យាល័យ​នៅ​រដ្ឋ​ហាវៃ សហរដ្ឋអាមេរិក។ (រូបថត​ផ្ដល់​ឲ្យ​ដោយ​លោក សៀង សេង)
លោក កុសល សេង (រាប់​ពី​ឆ្វេង​ទី​បី) ដែល​ជា​កូន​ប្រុស​ម្នាក់​របស់​លោក​វេជ្ជបណ្ឌិត សៀង សេង បញ្ចប់​ការ​សិក្សា​ជំនាញ​វេជ្ជសាស្ត្រ​ពី​សាកលវិទ្យាល័យ​នៅ​រដ្ឋ​ហាវៃ សហរដ្ឋអាមេរិក។ (រូបថត​ផ្ដល់​ឲ្យ​ដោយ​លោក សៀង សេង)

អ្នកស្រី បេល័រ ​មើលឃើញថា ជនភៀសខ្លួនមកពីតំបន់អាស៊ីអាគ្នេយ៍​ដូចជាលោកវេជ្ជបណ្ឌិត សៀង សេង ​គឺ​បាន​ចូលរួម​ចំណែក​ច្រើន​ដល់​សហរដ្ឋ​អាមេរិក​ ហើយ​ពួកគេ​បាន​ជួបប្រទះ​ជីវិត​ជោគជ័យ​ជាច្រើន។

«​តាមបទពិសោធ​របស់ខ្ញុំ​ គឺ​ការងារជាមួយ​នឹង​ជនភៀសខ្លួន​បានជួយជំរុញទឹកចិត្ត ​និង​ធ្វើ​ឲ្យ​ខ្ញុំ​មាន​ភាព​សាមញ្ញ​ដោយសារ​តែហេតុការណ៍​ ដែលពួកគេ​បាន​ឆ្លងកាត់​ដើម្បី​ទទួលបាន​សេរីភាព​នៅ សហរដ្ឋ​អាមេរិក។ ខ្ញុំគិតថា ​ពលរដ្ឋ​ខិតខំប្រឹងធ្វើការ​កាន់តែ​ខ្លាំង​។ ជារួមគឺ​កម្មវិធី​ជនភៀសខ្លួន​ទាំងមូល​មាន​ផលប្រយោជន៍​ដ៏ធំ​ដល់​សហរដ្ឋ​អាមេរិក​លើ​គ្រប់​ជ្រុងជ្រោយ​ទាំងអស់ ​ទាំង​សេដ្ឋកិច្ច​ និង​វប្បធម៌»។

ឥឡូវនេះ លោក​វេជ្ជបណ្ឌិត សៀង សេង ​បាន​ចូលនិវត្តន៍​ពី​ការងារ​ជា​គ្រូពេទ្យ​ប្រចាំ​គ្រួសារ បន្ទាប់​ពី​ធ្វើការ​រយៈពេល៣០ឆ្នាំ។ លោក​នៅ​បន្ត​បង្រៀន​ខ្លះៗ​នៅ​មហាវិទ្យាល័យ​សហគមន៍​ក្នុងក្រុងម៉ូដេសស្តូ​ ហើយ​លោកគឺជា​នាយផ្នែកវេជ្ជសាស្ត្រ​នៃមហាវិទ្យាល័យ​មូដេស្តូ នៅរដ្ឋ​កាលីហ្វញ៉ា។​

ទិវា​ជនភៀសខ្លួន​ពិភពលោក​ឆ្នាំ​នេះ​ ប្រារព្ធ​ក្រោម​ប្រធានបទ ​«គ្រប់សកម្មភាព​មានតម្លៃ»​ ហើយ​ចំ​ពេល​ដែល​ពិភពលោក​ប្រឈម​នឹង​វិបត្តិសុខភាព​បង្កឡើង​ដោយ​ជំងឺកូវីដ​១៩ គឺ​វេជ្ជបណ្ឌិត​ទាំង ៥រូប ​នៃ​គ្រួសារ​វេជ្ជបណ្ឌិត​ សៀង សេង បន្ត​ចូលរួម​ចំណែក​នៅ​ជួរមុខ​ប្រយុទ្ធនឹង​ជំងឺកូវីដ​១៩ ដែល​កំពុង​តែ​វាយ​ប្រហារសហរដ្ឋ​អាមេរិក។

លោក​វេជ្ជបណ្ឌិត​ សៀង សេង​ មានជំនឿ​ថា​ ​ពួកគេ​នឹង​ឈ្នះសមរភូមិ​នេះ ​គឺមិន​ដូច​កាលពី​ជាង​ ៤៥ ឆ្នាំមុន​ នៅ​ពេល​ដែល​សមាជិក ២៤ នាក់ ​នៃ​ក្រុមគ្រួសារ​របស់​លោក​ត្រូវបាន​ជម្លៀស​ទៅសហករណ៍នៅ​ទី​ជនបទ​ក្រោមការគ្រប់គ្រង​របស់ខ្មែរ​ក្រហម​ ប៉ុន្តែនៅពេលរបប​នេះ​បាន​ដួល​រលំ​ក្រោយ​ពី​កាន់​អំណាច​ជិត ៤ ​ឆ្នាំ គឺ​មានតែ​លោក​ម្នាក់​ទេ​ដែល​នៅ​រស់រាន​មានជីវិត​ ​ដើម្បី​យក​រឿង​ដ៏​ឈឺចាប់​នេះ​ប្រាប់​ដល់​ពិភពលោក​ឲ្យ​បាន​ដឹង៕

គម្របរូបភាពនៃកម្រងអត្ថបទអានចុងសប្តាហ៍
គម្របរូបភាពនៃកម្រងអត្ថបទអានចុងសប្តាហ៍

វ៉ាស៊ីនតោន — សូម​ស្វាគមន៍​មក​កាន់​កម្រង​អត្ថបទ​ពណ៌នា​របស់​ VOA សម្រាប់​ការ​អាន​ចុង​សប្តាហ៍។ នៅចុង​សប្តាហ៍​នេះ លោកអ្នកនាង​ទទួល​បាន​ព័ត៌មាន​អំពី​ផលប៉ះពាល់​នៃ​រោគ​រាតត្បាត​កូវីដ១៩ លើ​អាជីវករ​កម្ពុជា ក្តីព្រួយបារម្ភពី​ការ​បន្ត​ពិសារ​គ្រឿង​ស្រវឹង​ជា​ក្រុម​ក្នុង​អំឡុង​រោគ​រាតត្បាត និង​អត្ថបទ​វិភាគ​អំពី​ភូមិសាស្ត្រ​នយោបាយ​នៅកម្ពុជា​ខណៈ​កម្ពុជា​ទប់ទល់​នឹង​ជំងឺ​កូវីដ១៩ និង​អត្ថបទ​វិភាគ​មួយ​ទៀត​អំពី​ស្ថានភាព​ប្រជាធិបតេយ្យ​សេរីពហុបក្ស​ក្រោម​ការ​គ្រប់គ្រង​របស់​លោក​នាយករដ្ឋ​មន្ត្រី ហ៊ុន សែន៕

_____________________

អ្នក​រស់នៅ​ក្នុងបរិវេណ​វត្ត​ប្រយូរវង្ស​ ប្រមូល​ផ្តុំ​គ្នា បើទោះបីជារដ្ឋាភិបាលបានណែនាំឲ្យពលរដ្ឋរក្សាគម្លាតពីគ្នា នៅរាជធានីភ្នំពេញ កាលពី​ថ្ងៃសុក្រ​ ទី៣ ខែមេសា ឆ្នាំ២០២០។ (ទុំ ម្លិះ/VOA)
អ្នក​រស់នៅ​ក្នុងបរិវេណ​វត្ត​ប្រយូរវង្ស​ ប្រមូល​ផ្តុំ​គ្នា បើទោះបីជារដ្ឋាភិបាលបានណែនាំឲ្យពលរដ្ឋរក្សាគម្លាតពីគ្នា នៅរាជធានីភ្នំពេញ កាលពី​ថ្ងៃសុក្រ​ ទី៣ ខែមេសា ឆ្នាំ២០២០។ (ទុំ ម្លិះ/VOA)

អ្នក​ពាក់​ព័ន្ធ​បារម្ភ​ការ​ពិសា​គ្រឿង​ស្រវឹង​ជា​ក្រុម នាំ​ឲ្យ​ការ​ចម្លង​វីរុស​កូរ៉ូណា​កម្រិត​ខ្ពស់​

អ្នក​ជំនាញ​ផ្នែក​សុខភាព​ និង​អ្នក​ធ្វើការ​ក្នុង​វិស័យ​សង្គម​ បាន​បង្ហាញ​ទស្សនៈ​ផ្សេងៗ​គ្នា​ ទៅ​លើ​ការ​បន្ត​ពិសា​គ្រឿង​ស្រវឹង​ជុំៗ​គ្នា​ ក្នុង​គ្រា​ដែល​ប្រទេស​កំពុង​ញាំញី​ដោយ​ការ​ឆ្លង​រាតត្បាត​នៃ​មេរោគ​កូរ៉ូណា​ដែល​បំផ្លាញ​ប្រព័ន្ធ​ផ្លូវ​ដង្ហើម​របស់​មនុស្ស។​

លោក​វេជ្ជ​បណ្ឌិត ​មុំ គង់ នាយក​ប្រតិបត្តិ​អង្គការ​ចលនា​ដើម្បី​សុខភាព​កម្ពុជា ​មាន​ប្រសាសន៍​ថា​ ការ​ទទួល​ទាន​គ្រឿង​ស្រវឹង​រួម​គ្នា ​ងាយ​នឹង​បង្ក​ការ​ឆ្លង​ ដោយ​សារ​ពេល​ដែល​ស្រវឹង​អ្នក​ពិសា​អាច​ភ្លេចភ្លាំង​ស្មារតី​ មិន​មាន​អនាម័យ​ត្រឹមត្រូវ ​ដូចជា​ការ​លាង​ដៃ ​ឬក៏​អាច​មាន​ភាព​ស្និទ្ធស្នាល​ប្រកៀក​ប្រកិត​គ្នា​។​ លោក​បន្ថែម​ថា​ ការ​ទទួល​ទាន​គ្រឿង​ស្រវឹង​ក៏​នឹង​ធ្វើ​ឲ្យ​សុខភាព​ចុះ​ខ្សោយ ដែល​ងាយ​ប្រឈមការ​ឆ្លង​មេរោគ​ផ្សេងៗ​ ក្នុង​នោះ​គឺ​មេរោគ​កូរ៉ូណា។​

វិធាន​ការ​ដែល​ល្អ​បំផុត​សម្រាប់​ទប់ស្កាត់​ការ​ឆ្លង​រាល​ដាល​មេរោគ​កូរ៉ូណា​ក្នុង​ចំណោម​អ្នក​ប្រើ​ប្រាស់​គ្រឿង​ស្រវឹង​នោះ​ គឺ​បិទ​មិន​ឲ្យ​លក់​ស្រាបៀរ​មួយ​រយៈ​សិន​ ក្នុង​ពេល​ដែល​ប្រទេស ​ឬ​សាកល​លោក​មិន​ទាន់​ដោះ​ស្រាយ​វិបត្តិ​មេរោគ​កូរ៉ូណា​នេះ​បាន​នៅ​ឡើយ។ ​នេះ​បើ​តាម​ការ​បញ្ជាក់​របស់​លោក​វេជ្ជ​បណ្ឌិត​ មុំ គង់។​ អានព័ត៌មានលម្អិត ដោយលោក ហ៊ុល រស្មី នៃវីអូអេ

___________________

ហាងលក់​គោម និង​គ្រឿង​តុបតែង​លម្អ​ពេល​ចូល​ឆ្នាំរបស់​អ្នកស្រី​នួន សុខាណារី​នៅ​ជិត​ផ្សារ​អូរឬស្សី​ក្នុង​ក្រុង​ភ្នំពេញ កាល​ពី​ថ្ងៃពុធ ទី០៨ ខែ​មេសា ឆ្នាំ២០២០​។ (ណឹម សុភ័ក្រ្តបញ្ញា/VOA)
ហាងលក់​គោម និង​គ្រឿង​តុបតែង​លម្អ​ពេល​ចូល​ឆ្នាំរបស់​អ្នកស្រី​នួន សុខាណារី​នៅ​ជិត​ផ្សារ​អូរឬស្សី​ក្នុង​ក្រុង​ភ្នំពេញ កាល​ពី​ថ្ងៃពុធ ទី០៨ ខែ​មេសា ឆ្នាំ២០២០​។ (ណឹម សុភ័ក្រ្តបញ្ញា/VOA)

អាជីវករ​សម្រាប់​រដូវចូលឆ្នាំ​ប្រពៃណីជាតិ​ខ្មែរ​ជួប​ការលំបាក ខណៈ​ពេល​កើត​មាន​ជំងឺ​កូវីដ១៩

អាជីវករ​លក់​គ្រឿង​តុបតែង​លម្អ​និង​គ្រឿង​សំណែន​នៅ​រដូវ​បុណ្យ​ចូលឆ្នាំ​ប្រពៃណី​ជាតិ​ខ្មែរ​នៅ​ឆ្នាំ​នេះ​កំពុង​ប្រឈម​នឹង​ការ​បាត់បង់​ចំណូល​ដោយសារ​ចំនួន​អតិថិជន​បាន​ថយ​ចុះ​ស្រប​ពេល​កម្ពុជា​កំពុង​ទប់ទល់​នឹង​ការ​រីក​រាលដាល​ជំងឺ​កូវីដ​១៩​នៅ​ក្នុង​ប្រទេស។

កំពុង​ឈរ​រង់ចាំ​អតិថិជន​មក​ទិញផ្កា​នៅ​កែង​ផ្សារ​ចាស់​ក្នុង​ក្រុង​ភ្នំពេញ ដោយ​ទឹកមុខ​មិន​សូវ​ញញឹម​ប៉ុន្មាន​ លោក​ ផុន ភី​ អាយុ ៣៨​ឆ្នាំ ជា​អ្នក​លក់​គ្រឿងសក្ការៈ​បូជា​ និង​ផ្កានៅ​ផ្សារ​នេះ​អស់​រយៈពេល​ជាង​បី​ឆ្នាំ​មក​ហើយ។

ប៉ុន្តែ​ដោយសារ​តែ​ការ​រីករាលដាល​ជំងឺ​កូវីដ១៩ លោកនិយាយ​ថា អាជីវកម្ម​របស់​លោក​កំពុង​ជួប​ប្រទះ​នឹង​ការ​លំបាក ដោយសារ​តែ​មិនសូវ​លក់​បាន​ច្រើន​ដូច​គ្រាមុនៗ​នោះ​ទេ។ អានព័ត៌មានលម្អិតដោយលោក ណឹម សុភ័ក្ត្របញ្ញា

_______________________

រូបឯកសារ៖ កម្មការនីកាត់ដេរកំពុងធ្វើការ នៅក្នុងរោងចក្រមួយ នៅខេត្តកណ្តាល កាលពីថ្ងៃទី១២ ខែធ្នូ ឆ្នាំ២០១៨។
រូបឯកសារ៖ កម្មការនីកាត់ដេរកំពុងធ្វើការ នៅក្នុងរោងចក្រមួយ នៅខេត្តកណ្តាល កាលពីថ្ងៃទី១២ ខែធ្នូ ឆ្នាំ២០១៨។


កម្មកររោងចក្រត្រូវបញ្ឈប់ពីការងារ បន្ទាប់ពីត្រឡប់មកពីចូលឆ្នាំខ្មែរ

កន្លងទៅមន្រ្តីក្រសួងការងារបានលើកឡើងថា កម្មកររោងចក្រប្រឈមនឹងការបញ្ឈប់ពីការងារ ប្រសិនបើពួកគេមិនគោរពតាមការសម្រេចរបស់រដ្ឋាភិបាលដែលឲ្យពួកគេបន្តធ្វើការមិនត្រឡប់ទៅស្រុកកំណើតក្នុងឱកាសចូលឆ្នាំខ្មែរ។ កម្មកររោងចក្រកំពុងត្រឡប់មកធ្វើការវិញ ប៉ុន្តែថាតើពួកគេអាចបន្តធ្វើការនៅរោងចក្រឬយ៉ាងណាមិនច្បាស់លាស់នោះទេ។កម្មករមួយចំនួនត្រូវបានបញ្ឈប់ពីការងាររួចទៅហើយ ក្រោមហេតុផលថាពួកគេមិនបានធ្វើការប្រមាណមួយសប្តាហ៍។ អានព័ត៌មានលម្អិតដោយលោក ស៊ុន ណារិន នៃវីអូអេ

________________________

រូបឯកសារ៖ លោកនាយករដ្ឋមន្រ្តីហ៊ុនសែនមកដល់កិច្ចប្រជុំកំពូលថ្នាក់ដឹកនាំ ASEM នៅទីក្រុងព្រុចសែលប្រទេសប៊ែលហ្សិកថ្ងៃទី ១៨ ខែតុលា ឆ្នាំ២០១៨។
រូបឯកសារ៖ លោកនាយករដ្ឋមន្រ្តីហ៊ុនសែនមកដល់កិច្ចប្រជុំកំពូលថ្នាក់ដឹកនាំ ASEM នៅទីក្រុងព្រុចសែលប្រទេសប៊ែលហ្សិកថ្ងៃទី ១៨ ខែតុលា ឆ្នាំ២០១៨។


ការប្រជែងភូមិសាស្ត្រនយោបាយនៅតែសកម្ម ខណៈកម្ពុជាកំពុងទប់ទល់នឹងជំងឺកូវីដ១៩

ខណៈកម្ពុជាដូចប្រទេសនានានៅទូទាំងសកលលោកដែរបាននិងកំពុងប្រយុទ្ធនឹងការឆ្លងរីករាលដាលនៃជំងឺកូវីដ១៩នោះចរន្តប្រកួតប្រជែងភូមិសាស្ត្រនយោបាយមិននៅស្ងៀមឡើយ។បណ្ដាប្រទេសនានាដែលស្ថិតនៅជុំវិញដែនយុទ្ធសាស្ត្រនយោបាយការបរទេសកម្ពុជាបានបញ្ចេញនិងបង្ហាញការចូលរួមរបស់គេរៀងៗខ្លួនក្នុងការដោះស្រាយវិបត្តិកូវីដនៅកម្ពុជា។ប៉ុន្តែវៀតណាមដែលជាមិត្តចាស់របស់កម្ពុជាត្រូវបានលោកនាយករដ្ឋមន្រ្តីហ៊ុន សែនរិះគន់ដោយមិនបញ្ចេញឈ្មោះនៅក្នុងកិច្ចប្រជុំពិសេសមួយនៅសប្តាហ៍នេះ។ អានព័ត៌មានលម្អិតដោយលោក អូន ឆេងប៉រ នៃវីអូអេ

_____________________

រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមពិធីបុណ្យអុំទូកនៅរាជធានីភ្នំពេញ កាលពីថ្ងៃទី១០ ខែវិច្ឆិកា ឆ្នាំ២០១៩។
រូបឯកសារ៖ លោកនាយករដ្ឋមន្ត្រី ហ៊ុន សែន ចូលរួមពិធីបុណ្យអុំទូកនៅរាជធានីភ្នំពេញ កាលពីថ្ងៃទី១០ ខែវិច្ឆិកា ឆ្នាំ២០១៩។


ឧត្តមក្រុមប្រឹក្សាពិគ្រោះនិងផ្ដល់យោបល់បង្ហាញពីនយោបាយប្រជាធិបតេយ្យពហុបក្សរបស់លោកហ៊ុន សែន

២០ខែបន្ទាប់ពីរដ្ឋាភិបាលលោកនាយករដ្ឋមន្ត្រីហ៊ុន សែនបានបង្កើតឧត្តមក្រុមប្រឹក្សាពិគ្រោះនិងផ្ដល់យោបល់ដែលមានគណបក្សជាសមាជិកចូលរួមចំនួន១៦ គណបក្ស មជ្ឈដ្ឋានដទៃបានសម្ដែងមតិចម្រុះគ្នាអំពីសារៈតម្លៃនៃវត្តមានប្រសិទ្ធភាពការងារនិងអនាគតនៃវេទិកានយោបាយផ្ដល់យោបល់បែបថ្មីនេះ។ លោក អូន ឆេងប៉រ រាយការណ៍លម្អិតពីរាជធានីភ្នំពេញ។ អានព័ត៌មានលម្អិតដោយលោក អូន ឆេងប៉រ នៃវីអូអេ

XS
SM
MD
LG