ប្រធានាធិបតីចិន លោក Xi Jinping បានពន្យារទស្សនកិច្ចរបស់លោកទៅកាន់ប្រទេសជប៉ុនដែលគ្រោងធ្វើឡើងនៅខែមេសាខាងមុខ ខណៈដែលប្រទេសទាំងពីរកំពុងជួបប្រទះនូវការផ្ទុះរាលដាលនៃមេរោគកូរ៉ូណា Covid-19 ដែលមកទល់ពេលនេះបានចម្លងដល់មនុស្សប្រមាណ៩៥.០០០នាក់នៅជាង៧៥ប្រទេស។
មន្ត្រីចិននិងជប៉ុនថ្លែងកាលពីថ្ងៃព្រហស្បតិ៍ថា ទស្សនកិច្ចរបស់លោក Xi នឹងត្រូវពន្យារពេលរហូតដល់ពេលវេលាសមស្របមួយ។
ប្រទេសចិនដែលជាប្រភពនៃការរាតត្បាតដំបូងនៃមេរោគ Covid-19 និងមានការថយចុះករណីឆ្លងថ្មី ជាប្រទេសដែលមានអ្នកស្លាប់ពីមេរោគនេះច្រើនជាងគេរហូតដល់៣.០០០នាក់ ហើយមានផលប៉ះពាល់ខ្លាំងដល់សេដ្ឋកិច្ចដោយអាជ្ញាធរបានបិទទីក្រុងនិងទីប្រជុំជនជាច្រើន។
ប្រទេសជប៉ុនមានការឆ្លងជាង១.០០០ករណី ដែលភាគច្រើនទាក់ទងនឹងនាវាកម្សាន្តដែលត្រូវបានដាក់ឲ្យសំចតដាច់ដោយឡែកពីគេនៅទីក្រុង Yokohama។
ខណៈដែលមេរោគនេះកាន់តែរាលដាលដល់ប្រទេសកាន់តែច្រើន រដ្ឋាភិបាលនៅក្នុងប្រទេសទាំងនោះ ស្រវាស្រទេញចាត់វិធានការនានា ដូចជាការបិទសាលារៀន បិទព្រឹត្តិការណ៍ជួបប្រជុំធំៗ និងហាមឃាត់អ្នកដំណើរមកពីប្រទេសមួយចំនួន។
ប្រទេសអ៊ីតាលីបានបិទសាលារៀនដល់ថ្ងៃទី១៥ខែមីនា ខណៈដែលប្រទេសនេះមានអ្នកឆ្លងកើនឡើងដល់ជាង៣.០០០នាក់។
ប្រទេសអារ៉ាប៊ីសាអ៊ូឌីតបានពង្រីកការដាក់បម្រាមមិនឲ្យធ្វើធម្មយាត្រាទៅទីក្រុងពិសិដ្ឋ Mecca ដែលខ្លួនបានដាក់ចំពោះជនប្រទេស ទៅជាបម្រាមដល់ពលរដ្ឋខ្លួនទៀត។
នៅសហរដ្ឋអាមេរិក ការរីករាលដាលនៃមេរោគកូរ៉ូណាមានខ្លាំងជាងគេនៅរដ្ឋវ៉ាស៊ីនតោននិងរដ្ឋកាលីហ្វ័រញ៉ាដែលនៅជាប់ឆ្នេរសមុទ្រខាងលិចរបស់សហរដ្ឋអាមេរិក៕