យ៉ាងហោចណាស់មានស្ត្រីចំនួន៩៥នាក់បានឈ្នះអាសនៈនៅក្នុងរដ្ឋសភាអាមេរិកនៅអំឡុងពេលនៃការបោះឆ្នោតពាក់កណ្តាលអាណត្តិកាលពីថ្ងៃអង្គារ ដែលនេះជាការបំបែកប្រវត្តិសាស្រ្តដែលធ្លាប់មានស្ត្រី៨៤រូបទទួលបានអាសនៈនៅសភាជាន់ទាបនេះ។ ភាគច្រើននៃស្រ្តីដែលឈ្នះអាសនៈនៅក្នុងរដ្ឋសភាមកពីគណបក្សប្រជាធិបតេយ្យ ជាអ្នកដែលបានជួយធ្វើឲ្យគណបក្សទទួលបានសំឡេងភាគច្រើនៅក្នុងរដ្ឋសភា។ ជិត៨០ភាគរយនៃបេក្ខនារីដែលបានចូលរួមប្រកួតប្រជែងដណ្តើមអាសនៈនៅសភាគឺមកពីគណបក្សប្រជាធិបតេយ្យ។ នេះបើយោងតាមមជ្ឈមណ្ឌលស្រ្តីនិងនយោបាយនៃសកលវិទ្យាល័យ Rutgers។
មជ្ឈមណ្ឌលនេះបានប្រកាសឲ្យដឹងផងដែរថា យោងតាមកំណត់ត្រាបង្ហាញថាស្រ្តី២៣៧នាក់បានចូលរួមប្រកួតដណ្តើមអាសនៈសភានៅទូទាំងប្រទេស ហើយជិត១០០នាក់បានទទួលជ័យជំនះគិតត្រឹមព្រឹកថ្ងៃពុធ។ សន្និបាតរដ្ឋសភានៅដើមខែមករាឆ្នាំក្រោយនេះ គណបក្សប្រជាធិបតេយ្យនឹងក្លាយជាក្រុមសំឡេងភាគច្រើនជាលើកទីមួយក្នុងរយៈពេល៨ឆ្នាំមកនេះ។
ជ័យជម្នះរបស់ស្រ្តីទាំងនេះទំនងជានឹងបង្កើនតួលេខចំនួនស្រ្តីនៅក្នុងរដ្ឋសភាលើសពី២០ភាគរយជាលើកទីមួយ។ មានកត្តាជាច្រើនដែលជំរុញឲ្យមានការកើនឡើងនៃចំនួនស្រ្តីដ៏ច្រើននៅក្នុងរដ្ឋសភារួមមាន ឥរិយាបថរបស់លោក Trump ទៅលើស្រ្តីការកើនឡើងនៃចលនា #Metoo ដែលបានផ្សព្វផ្សាយជាសាធារណៈអំពីករណីបៀតបៀនផ្លូវភេទទៅលើស្រ្តីនិងវេទិកាគោលនយោបាយរបស់គណបក្សសាធារណរដ្ឋអំពីបញ្ហាមួយចំនួនដូចជាសិទ្ធិរំលោភកូនជាដើម។
លោក Christopher Borick សាស្រ្តាចារ្យខាងវិទ្យាសាស្រ្តនយោបាយ និងជានាយកនៃវិទ្យាស្ថានមតិសាធារណៈបាននិយាយថា តួនាទីរបស់ស្រ្តីនៅក្នុងការបោះឆ្នោតនេះបានបង្កើនក្តីរំពឹងជាច្រើន។ ស្រ្តីដែលទទួលបានជ័យជំនះទាំងនោះរួមមានស្រ្តីកាន់សាសនាឥស្លាមពីរនាក់លើកដំបូងគឺលោកស្រី Ilhan Omarមកពីរដ្ឋMinnesotaនិងលោកស្រី Rashida Tlaib មកពីរដ្ឋ Michigan និងស្រ្តីជនជាតិដើមអាមេរិកាំងទីមួយគឺលោកស្រី Sharice Davids មកពីរដ្ឋ Kansas។ នេះក៏ជាលើកទីមួយដែរ ដែលរដ្ឋ Pennsylvania រដ្ឋNew Jersey និងរដ្ឋ New York មានស្ត្រីឈ្នះអាសនៈនៅក្នុងរដ្ឋសភា៕