លោក Luis Miguel Pastrana អ្នកគ្រប់គ្រងក្រុមហ៊ុន Iberdrola ប្រចាំទ្វីបអឺរ៉ុប និយាយថា៖ «យើងផលិតថាមពលអគ្គិសនីនៅទីនេះ ដែលទីក្រុងមួយមានមនុស្ស ៦ សែននាក់រស់នៅនឹងត្រូវការនៅក្នុងរយៈពេលមួយឆ្នាំខាងមុខនេះ»។
កាលពីមួយទសវត្សមុន ស្ថានីយផលិតអគ្គិសនីដោយថាមពលខ្យល់ Maranchon ដែលមានកង្វារផលិតថាមពលខ្យល់ចំនួន ១០៤ គ្រឿង គឺជាកន្លែងផលិតអគ្គិសនីដោយថាមពលខ្យល់ដ៏ធំបំផុតនៅក្នុងប្រទេសអេស្ប៉ាញ។ ឥឡូវនេះ កន្លែងនេះមានការប្រកួតប្រជែង។
ប្រទេសអេស្ប៉ាញមានឧស្សាហកម្មផលិតអគ្គិសនីពីថាមពលខ្យល់ធំជាងគេបំផុតទីពីរនៅក្នុងទ្វីបអឺរ៉ុប បន្ទាប់ពីប្រទេសអាល្លឺម៉ង់។ គេឃើញនៅមានឱកាសរីកចម្រើនជាច្រើនទៀតនៅទីនោះ។ រដ្ឋាភិបាលអេស្ប៉ាញចង់បានថាមពលកកើតឡើងវិញដើម្បីផលិតអគ្គិសនីឲ្យបាន ៧៥ ភាគរយនៃអគ្គិសនីសរុបរបស់ប្រទេសអេស្ប៉ាញនៅត្រឹមឆ្នាំ ២០៣០ និងឲ្យបាន ១០០ ភាគរយ នៅត្រឹមឆ្នាំ ២០៥០។
លោក Alonso Soberon វិស្វករនៃក្រុមហ៊ុន Iberdrola បាននិយាយថា៖ «យើងអាចប្រជែងជាមួយនឹងប្រេង ឧស្ម័ន និងប្រេងឥន្ធនៈបាន ដោយសារតែប្រសិនបើយើងមើលលើទំនោរកាលពី ១០ ឆ្នាំកន្លងមកនេះ យើងឃើញថា តម្លៃថាមពលខ្យល់ និងថាមពលព្រះអាទិត្យបានធ្លាក់ចុះយ៉ាងខ្លាំង»។
ក្រុមហ៊ុន Iberdrola គឺជាក្រុមហ៊ុនថាមពលដ៏ធំរបស់ប្រទេសអេស្ប៉ាញ ដែលគ្រប់គ្រងស្ថានីយផលិតអគ្គិសនីពីថាមពលខ្យល់ Marachon។ ក្រុមហ៊ុននេះផលិតថាមពលខ្យល់ឲ្យប្រទេសអេស្ប៉ាញបានជិត ២៥ ភាគរយ។ ក្រុមហ៊ុននេះក៏បានវិនិយោគលើថាមពលខ្យល់នេះនៅតាមប្រទេសផ្សេងទៀតនៅទ្វីបអឺរ៉ុប សហរដ្ឋអាមេរិក បណ្ដាប្រទេសនៅតំបន់អាមេរិកឡាទីន និងប្រទេសអូស្ត្រាលីផងដែរ។ កាលពីពេលថ្មីៗនេះ ក្រុមហ៊ុនបានប្រកាសពីគម្រោងនៅក្នុងការបញ្ឈប់ដំណើរការរោងចក្រធ្យូងថ្មចុងក្រោយរបស់ខ្លួនពីរកន្លែង ទោះបីជាក្រុមហ៊ុននៅតែផ្គត់ផ្គង់ឧស្ម័នក៏ដោយ។
ទីភ្នាក់ងារថាមពលអន្តរជាតិបានបញ្ជាក់ថា នៅត្រឹមឆ្នាំ ២០៥០ ខាងមុខ ថាមពលកកើតឡើងវិញដូចជាថាមពលខ្យល់ និងថាមពលព្រះអាទិត្យជាដើមនឹងផ្ដល់អគ្គិសនីដល់ពិភពលោកបានជាង ៤០ ភាគរយ។
ថាមពលខ្យល់សមុទ្រ ដែលជាថាមពលដ៏គួរឲ្យសង្ឃឹមខ្លាំងបំផុតមួយ អាចផលិតអគ្គិសនីបានច្រើនជាង ១៨ ដងនៃអគ្គិសនីដែលពិភពលោកទាំងមូលត្រូវការទៅទៀត។ ប៉ុន្តែ ទីភ្នាក់ងារថាមពលអន្តរជាតិថា ជារួម ការកើនឡើងនូវថាមពលកកើតឡើងវិញគឺនៅទាបឆ្ងាយក្រោមកម្រិតនៃតម្រូវការដែលចង់បានដើម្បីសម្រេចឲ្យបាននូវគោលបំណងថាមពលប្រកបដោយចិរភាព។
លោក Ivan Pineda ប្រធានផ្នែកកិច្ចការសាធារណៈនៃក្រុមហ៊ុន WindEurope បាននិយាយថា៖ «ថាមពលខ្យល់នឹងមានតួនាទីសំខាន់ខ្លាំងបំផុតសម្រាប់អនាគតនៃការលុបបំបាត់ឧស្ម័នកាបូន និងអនាគតនៃអគ្គិសនី»។
វិស័យថាមពលខ្យល់នេះក៏ផ្ដល់ការងារធ្វើដល់មនុស្សប្រហែល ៣ សែននាក់ នៅទូទាំងទ្វីបអឺរ៉ុបផងដែរ ដែលជាតំបន់ផលិតថាមពលខ្យល់ច្រើនជាងគេបំផុតទីពីរនៅលើពិភពលោក បន្ទាប់ពីប្រទេសចិន។
ចំណែកឯនៅក្នុងក្រុង Maranchon ឯណោះវិញ ប្រជាពលរដ្ឋដំបូងមិនជឿលើកង្ហារផលិតថាមពលខ្យល់នេះទេ ប៉ុន្តែលោក Jose Luis Sastre អភិបាលក្រុងនោះថា រឿងនេះបានប្រែប្រួលហើយនៅពេលឥឡូវនេះ។
លោក Jose Luis Sastre និយាយថា៖ «ពួកគេសប្បាយចិត្តដោយសារតែរោងចក្រផលិតថាមពលខ្យល់នោះបានផ្ដល់ប្រាក់ចំណូលដល់ក្រុងនេះ។ ក្រុងនេះអាចមានលទ្ធភាពកែប្រែប្រព័ន្ធទឹក ផ្នែកអនាម័យ និងផ្លូវថ្នល់របស់ខ្លួនឲ្យមានភាពប្រសើរឡើង មិនត្រឹមតែក្រុងនេះដែលជាទីតាំងរដ្ឋបាលប៉ុណ្ណោះទេ ប៉ុន្តែ សហគមន៍ ៥ ដែលជាផ្នែកនៃក្រុងនេះក៏ប្រព័ន្ធទាំងនេះមានភាពប្រសើរឡើងផងដែរ»។
គេនៅតែឃើញមានការប្រឆាំងខ្លាំងក្លានៅតាមតំបន់មួយចំនួនចំពោះស្ថានីយផលិតអគ្គិសនីដោយថាមពលខ្យល់នេះ។ អ្នកបរិស្ថាននិយាយថា ការជ្រើសរើសទីតាំងខុសអាចប៉ះពាល់ដល់ដីធ្លីមួយចំនួន និងប្រភេទសត្វដែលរស់នៅពឹងផ្អែកលើសមុទ្រ។
លោក Ramon Marti ប្រធានផ្នែកបណ្ដាញនៃអង្គការ Birdlife Spain និយាយថា៖ «ជាការពិតណាស់ យើងត្រូវតែគាំទ្រថាមពលកកើតឡើងវិញ ប៉ុន្តែក៏ត្រូវពិចារណាអំពីជីវចម្រុះផងដែរ។ យើងឃើញថា មិនត្រឹមតែបក្សាបក្សីតែប៉ុណ្ណោះទេ ប៉ុន្តែសត្វប្រជៀវក៏រងការប៉ះពាល់ផងដែរ»។
ប៉ុន្តែ ការប្រឈមដ៏ធំបំផុតរបស់ឧស្សាហកម្មថាមពលខ្យល់នេះគឺប្រហែលជាការធ្វើយ៉ាងណាឲ្យទទួលបានការគាំទ្រផ្នែកនយោបាយ និងការវិនិយោគបន្ថែមទៀតដើម្បីឲ្យវិស័យនេះរីកចម្រើនទៅមុខ...។ ដូច្នេះវាអាចបំពេញតម្រូវការថាមពលដែលកំពុងតែកើនឡើងនៅលើពិភពលោក... និងអាចទប់ទល់ទៅនឹងការប៉ះពាល់កើនឡើងដែលបណ្ដាលមកពីការប្រែប្រួលអាកាសធាតុបាន៕
ប្រែសម្រួលដោយ ភី សុភាដា