លោក Larry Kudlow ទីប្រឹក្សាសេដ្ឋកិច្ចរបស់សេតវិមានបាននិយាយកាលពីថ្ងៃអាទិត្យម្សិលមិញថា សេដ្ឋកិច្ចសហរដ្ឋអាមេរិក ដែលធំជាងគេបង្អស់ក្នុងពិភពលោក ឥឡូវនេះកំពុងស្ថិតក្នុងដំណាក់កាលងើបឡើងវិញចេញពីផលប៉ះពាល់នៃការចុះខ្សោយដោយសារការរាតត្បាតនៃមេរោគកូរ៉ូណាដែលបានបិទមណ្ឌលពាណិជ្ជកម្មរាប់ពាន់កន្លែង ថ្វីបើពួកអ្នកព្យាករណ៍សេដ្ឋកិច្ចនិយាយថា តួលេខអ្នកគ្មានការងារធ្វើ នឹងនៅតែខ្ពស់ក្នុងប៉ុន្មានខែទៀតក៏ដោយ។
លោក Kudlow បានប្រាប់ទូរទស្សន៍ខ្សែកាប CNN ថា «ខ្ញុំគិតថា យើងកំពុងវិលត្រឡប់ទៅកាន់ភាពដូចដើមវិញហើយ។ ឆ្នាំ២០២១នឹងក្លាយជាឆ្នាំមានសេដ្ឋកិច្ចខ្លាំង»។
លោកនិយាយទៀតថា ការបន្ថែមប្រាក់គ្មានការងារធ្វើ៦០០ដុល្លារក្នុងមួយសប្តាហ៍របស់រដ្ឋាភិបាលសហព័ន្ធបើកទៅឱ្យមនុស្សគ្មានការងារធ្វើ៤០លាននាក់បន្ថែមលើប្រាក់គ្មានការងារធ្វើរបស់រដ្ឋនីមួយៗទំនងជាបញ្ចប់ដូចដែលបានគ្រោងទុកនៅចុងខែកក្កដាក្រោយ។
លោកបាននិយាយទៀតថា «យើងកំពុងបើកប្រាក់ឱ្យពលរដ្ឋដែលមិនធ្វើការ។ប្រាក់នោះមានចំនួនច្រើនជាងប្រាក់ខែរបស់ពួកគេទៀត»។ លោកបាននិយាយទៀតថា ការជួយពួកកម្មករដែលគ្មានការងារធ្វើ អាចជាការត្រឹមត្រូវក្នុងដំណាក់កាលដំបូងនៃការបិទពាណិជ្ជកម្មដែលបណ្តាលមកពីមេរោគកូរ៉ូណា ក៏ប៉ុន្តែមិនមែនជាការធ្វើឱ្យសេដ្ឋកិច្ចងើបឡើងវិញទេ។
ទោះជាយ៉ាងណាក៏ដោយ លោកបាននិយាយទៀតថា រដ្ឋបាលរបស់លោកប្រធានាធិបតីត្រាំកំពុងនឹកគិត «ពីប្រភេទរង្វាន់លើកទឹកចិត្តខ្លះសម្រាប់ការវិលត្រឡប់ទៅធ្វើការវិញ» សម្រាប់អ្នកដែលត្រូវបានគេបញ្ឈប់ពីការងារ ថ្វីមិនមានចំនួនច្រើនដូចជាប្រាក់បន្ថែមគ្មានការងារធ្វើប្រចាំសប្តាហ៍ដែលឱ្យដោយរដ្ឋាភិបាលសហព័ន្ធដែលបានផ្តល់ឱ្យរយៈពេល២ខែកន្លះក៏ដោយ។ សមាជិកសភាខ្លះបានស្នើផ្តល់ប្រាក់ជួយឧបត្ថម្ភចំនួន១ពាន់២រយដុល្លារបើកឱ្យពួកកម្មករដែលវិលត្រឡប់ទៅធ្វើការវិញ៕