បងស្រីសកម្មជនថៃបាត់ខ្លួន ដែលកំពុងត្រៀមជួបចៅក្រមកម្ពុជា បានប្រារព្ធពិធីសាសនានៅក្បែរខុនដូមួយក្នុងខណ្ឌជ្រោយចង្វា ដើម្បីរំឭកខួប៦ខែនៃអ្វីដែលអ្នកស្រីហៅថា ជា«ការចាប់ពង្រត់»ប្អូនប្រុសដែលជាអ្នកតស៊ូមតិម្នាក់រត់ភៀសខ្លួនមករស់នៅប្រទេសកម្ពុជា ជាច្រើនឆ្នាំមកហើយ។
លោក Wanchalearm Satsaksit សកម្មជនថៃ ត្រូវគេរាយការណ៍ថា ត្រូវបានចាប់ពង្រត់ កាលពីថ្ងៃទី៤ ខែមិថុនា ពីក្បែរខុនដូលោកស្នាក់នៅ ក្នុងខណ្ឌជ្រោយចង្វារ និងបាត់ដំណឹងរហូតមកដល់ពេលនេះ។
បងស្រីរបស់លោក គឺអ្នកស្រី Sitanun Satsaksit បានមកដល់កម្ពុជាកាលពីដើមខែវិច្ឆិកា តាមការណាត់របស់ចៅក្រមស៊ើបសួរសាលាដំបូងរាជធានីភ្នំពេញ ដើម្បីបំភ្លឺនៅថ្ងៃទី៨ ខែធ្នូ ខាងមុខ។
រូបឯកសារ៖ អ្នកស្រី Sitanun Satsaksit (ពាក់អាវពណ៌ត្រួយចេក) បងស្រីរបស់សកម្មជនថៃដែលបានបាត់ខ្លួន គឺលោក Wanchalearm Satsaksit ឈរថតរូបជាមួយនឹងក្រុមការងារផ្នែកច្បាប់របស់អ្នកស្រី ក្នុងដំណើរឆ្ពោះទៅកាន់រាជធានីភ្នំពេញ។
នៅខាងមុខអគារខុនដូភ្លោះ Mekong Gardens ទីដែលសាក្សីនិងក្រុមគ្រួសារអះអាងថា លោក Wanchalearm ធ្លាប់ស្នាក់នៅ និងត្រូវ«ចាប់ពង្រត់» ព្រះសង្ឃ៣អង្គ បាននិមន្តមកប្រោះព្រំ និងមានអាចារ្យ ដង្ហោយហៅលោក Wanchalearm តាមផ្លូវពុទ្ធសាសនា និងព្រហ្មញ្ញសាសនា។
តាអាចារ្យបានសូត្រថា៖
«ឥឡូវបងរក សូមឱ្យដំណឹងមកបង សូមទេវតាជួយឱ្យពរ ឱ្យជ័យ ឱ្យដំណឹងមកបង ឆាប់ៗ ប្អូន Wanchalearm បាទ បងដើររក សូមប្អូនអញ្ជើញមក ទេវតាទាំង១ម៉ឺនលោកធាតុ ឱ្យពរឱ្យជ័យ ជួយឱ្យដំណឹងនេះ ទៅឱ្យ Wanchalearm ឱ្យបានទទួលដំណឹងនេះ ហើយប្រាប់មកបងវិញ»។
ថ្លែងទៅកាន់អ្នកសារព័ត៌មានក្រោយការនិមន្តនិវត្តនៃព្រះសង្ឃ អ្នកស្រី Sitanun បានរៀបរាប់ប្រាប់ជាសំនៀងថៃ និងត្រូវបានបកប្រែដោយមេធាវីក្នុងន័យដើមយ៉ាងដូច្នេះថា៖
«ខ្ញុំមិនដឹងឡើយថាខ្ញុំអាចជួបគាត់ (Wanchalearm) សាជាថ្មី ឬអត់ តែក្រុមគ្រួសារយើងនៅតែរក្សាក្ដីសង្ឃឹមនៅទីបំផុតយើងនឹងអាចជួបគ្នាសារជាថ្មី»។
នៅថ្ងៃទី៤ ខែធ្នូ ឆ្នាំ២០២០ អ្នកស្រី Sitanun Satsaksit ជាបងស្រីរបស់សកម្មជនថៃដែលបាត់ខ្លួនឈ្មោះ Wanchalearm Satsaksit បានធ្វើពិធីសាសនានៅមុខខុនដូដែលគេជឿថា លោក Wanchalearm បានស្នាក់នៅមុនពេលបាត់ខ្លួន នៅទីក្រុងភ្នំពេញប្រទេសកម្ពុជា។
លោក Wanchalearm បានភៀសខ្លួនមកជ្រកកោននៅកម្ពុជា ក្រោយរដ្ឋប្រហារថៃឆ្នាំ២០១៤ ហើយលោកជាអ្នករិះគន់មិនសំចៃមាត់ដល់របបយោធាថៃដឹកនាំដោយលោក ប្រាយុទ្ធ ចាន់អូចា។
សកម្មជនថៃរូបនេះ ជាអ្នកគាំទ្រស្មោះស្ម័គ្រនៃអតីតនាយករដ្ឋមន្ត្រីថៃ លោក Thaksin Shinawatra ដែលជាគូប្រជែងនៃរបបដឹកនាំប្រទេសថៃបច្ចុប្បន្ន តែជាមិត្តជិតស្និទ្ធនឹងនាយករដ្ឋមន្ត្រី ហ៊ុន សែន។
សាក្សីនៅក្បែរខុនដូ បានប្រាប់ VOA ថា លោក Wanchalearm ត្រូវក្រុមបុរសមិនស្គាល់មុខចាប់ញាត់ចូលក្នុងឡាន នាថ្ងៃទី៤ ខែមិថុនា ខណៈលោកចាំទិញប្រហិតនៅមុខខុនដូ Mekong Gardens។
អ្នកស្រី Sitanun បានថ្លែងប្រាប់ក្រុមអ្នកសារព័ត៌មានថា៖
«យើងមិនដឹងឡើយថា Wanchalearm នៅទីណា ហើយយើងក៏ស្រមៃមិនចេញផងដែរ ថាមានរឿងអ្វីកើតឡើងចំពោះរូបគេ ក្រោយត្រូវបានចាប់ពង្រត់»។
ពាណិជ្ជករថៃវ័យ៤៨ឆ្នាំ មកពីខេត្តឧប្បលរាជធានីរបស់ថៃ បានបន្តយ៉ាងដូច្នេះថា៖
«អំឡុងពេលកូវីដនេះ ការធ្វើដំណើរនិងសកម្មភាពនានាលំបាកធ្វើ។ ហេតុនេះមានតែបុគ្គលមានអំណាចមានឥទ្ធិពលទេ ដែលអាចធ្វើរឿងនេះបាន។ នេះមិនមែនជាប្រតិបត្តិការធម្មតានោះទេ»។
លោក Wachalearm ត្រូវបានរាប់បញ្ចូលជាសកម្មជនថៃទី៩ហើយ ដែលបានបាត់ខ្លួននារយៈពេលប៉ុន្មានឆ្នាំចុងក្រោយនេះ។ នេះបើយោងតាមអង្គការឃ្លាំមើលសិទ្ធិមនុស្ស។
មន្ត្រីនគរបាលកម្ពុជាអះអាងថា លោក Wanchalearm មិនទាន់បានបន្តសុពលភាពទិដ្ឋាការរស់នៅកម្ពុជា ដែលផុតកំណត់កាលពីថ្ងៃទី៣១ ខែធ្នូ ឆ្នាំ២០១៧ នៅឡើយទេ។
នគរបាលក៏បានអះអាងទៀតថា គ្មានកំណត់ត្រាថាលោករស់នៅខុនដូខាងលើឡើយ ហើយថា លោកបានចូលកម្ពុជាលើកចុងក្រោយប្រើលិខិតឆ្លងដែនថៃ នៅថ្ងៃទី១៩ ខែតុលា ឆ្នាំ២០១៥។
យ៉ាងណា អ្នកស្រី Sitanun បញ្ជាក់ថា ខ្លួនមានភស្តុតាងបញ្ជាក់ថា ប្អូនប្រុសពិតជារស់នៅភ្នំពេញ ហើយបានបាត់ខ្លួនកាលពីដើមខែមិថុនានៅក្បែរខុនដូ ហើយត្រៀមប្រគល់តឹកតាងទាំងនេះជូនចៅក្រមស៊ើបសួរ។
អ្នកស្រីបន្តថា ខ្លួនមានភស្តុតាងជាវីដេអូនិងរូបភាព ហើយអ្នកស្រីបានជួបមិត្តភក្តិរបស់ប្អូនប្រុសអ្នកស្រី ដែលបានបញ្ជាក់ថាលោកពិតជារស់នៅកម្ពុជា មុនត្រូវបានចាប់ពង្រត់កាលពី៦ខែមុន។
អ្នកស្រីបន្ថែមថា អាជ្ញាធរកម្ពុជានិងថៃមិនទាន់បានស្វះស្វែងរកប្អូនប្រុសរបស់អ្នកស្រីឱ្យ«បានគ្រប់គ្រាន់»នៅឡើយទេ។
លោក ខៀវ សុភ័គ រដ្ឋលេខាធិការក្រសួងមហាផ្ទៃ និយាយថា ការណ៍ដែលអ្នកស្រី Sitanun និងក្រុមការងារ អាចមកកម្ពុជាបង្ហាញពីចេតនារដ្ឋាភិបាលខ្មែរចង់ជួយរកលោក Wanchalearm។
លោក ខៀវ សុភ័គ ប្រាប់VOAថា៖
«ធម្មតាការស្វែងរកមិនមែនប្រើពេលដូចយើងគិតចង់បានទេ។ នេះមនុស្សម្នាក់ ចុះចំពោះយន្តហោះម៉ាឡេស៊ី (MH370) អ៊ីចឹង មិនដឹងប៉ុន្មានឆ្នាំហើយ យន្តហោះ ហោះប៉ុនមេឃប៉ុនដីពីណាមកនៅរកមិនទាន់ឃើញផង។ វាមានអ៊ីចឹងដែរ។ ពេលវេលាវានឹងឆ្លើយ!»។
រដ្ឋលេខាធិការក្រសួងមហាផ្ទៃរូបនេះ បន្តថា អាជ្ញាធរនគរបាល«ស្វាគមន៍»រាល់ភស្ដុតាងនិងសក្ខីកម្មជាតម្រុយពីសំណាក់អ្នកស្រី Sitanun ដែលអាចដាក់នៅទីតាំងនគរបាលណាមួយក៏បាន។
អ្នកស្រី Sitanun ឲ្យដឹងថា មេធាវីបានដាក់លិខិតទៅប៉ូលិសកម្ពុជាកាលពីថ្ងៃចន្ទ ប៉ុន្តែមកដល់ព្រឹកថ្ងៃសុក្រនេះ មិនទាន់មានការឆ្លើយតបនៅឡើយទេ។
អយ្យការសាលាដំបូងបានចោទប្រកាន់លើ«អញ្ញត្រជន» ដែលគេមិនស្គាល់អត្តសញ្ញាណ និងភិនភាគ ក្នុងសំណុំរឿងបាត់ខ្លួននេះ ដែលបើកផ្លូវឱ្យចៅក្រមស៊ើបសួរអាចកោះហៅអ្នកស្រី Sitanun មកកម្ពុជាដើម្បីបំភ្លឺ ជាមួយនឹងការផ្ដល់ទិដ្ឋាការពិសេស។ នេះបើយោងតាមមេធាវី លោក សំ ចំរើន។
លោក សំ ចំរើន ចូលរួមការពារក្តីរឿងនេះ អមជាមួយមេធាវីជនជាតិថៃបីនាក់ ដែលធ្វើដំណើរមកជាមួយអ្នកស្រី Sitanun។
បទចោទទាំងនោះរួមមាន «ការចាប់ ឃុំឃាំង និងបង្ខាំង ដោយខុសច្បាប់»និង«ការកាន់កាប់អាវុធដោយគ្មានការអនុញ្ញាត»។ នេះបើតាមដីការបស់ចៅក្រមស៊ើបដែល VOA ទទួលបាន។
លោក អំ សំអាត នាយករងអង្គការសិទ្ធិមនុស្សលីកាដូ បានលើកឡើងថា ជាប្រការចាំបាច់ដែលរដ្ឋទាំងពីរថៃនិងកម្ពុជា ផ្ដល់ជំនួយនិងសេវាកម្មយុត្តិធម៌ដល់គ្រួសារលោក Wanchalearm។
លោក អំ សំអាត ប្រាប់VOAថា៖
«អ៊ីចឹងចង់មិនចង់ យើងត្រូវតែបង្ហាញអំពីលទ្ធផលអំពីការខិតខំប្រឹងប្រែង ស្រាវជ្រាវ និងស៊ើបអង្កេតឱ្យមានតម្លាភាព និងយុត្តិធម៌»។
ស្ថានទូតថៃនៅភ្នំពេញ មិនបានឆ្លើយនឹងសារសុំការបំភ្លឺរបស់ VOA ទេ តែបានប្រាប់ទីភ្នាក់ងារព័ត៌មាន Reuters ថា ខ្លួនធ្វើការស្និទ្ធជាមួយភាគីកម្ពុជា ក្នុងការជួយក្រុមគ្រួសារលោក Wanchalearm។
អ្នកស្រី Pornpen Khongkachonkiet សហការីផ្លូវច្បាប់ ដែលអមដំណើរអ្នកស្រី Sitanun បានឱ្យដឹងថា ១សប្ដាហ៍ក្រោយជួបចៅក្រម ពោល គឺថ្ងៃទី១៥ ខែធ្នូ ពួកគេនឹងត្រឡប់ទៅប្រទេសថៃវិញ៕