រដ្ឋាភិបាលវៀតណាមបានបញ្ជាក់កាលពីថ្ងៃអង្គារថា ប្រធានគណបក្សកុម្មុយនីស្តវៀតណាមលោក Nguyen Phu Trong នឹងធ្វើទស្សនកិច្ចទៅកាន់ប្រទេសចិននៅសប្តាហ៍ក្រោយ តបតាមការអញ្ជើញរបស់ប្រធានាធិបតីចិនលោក Xi Jinping។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។
នេះគឺជាដំណើរទស្សនកិច្ចដ៏កម្រមួយទៅក្រៅប្រទេសរបស់មេដឹកនាំវៀតណាមដែលមានវ័យចំណាស់រូបនេះ។ ដំណើរទស្សកិច្ចនេះនឹងប្រព្រឹត្តិទៅចាប់ពីថ្ងៃទី ៣០ ខែតុលា ដល់ថ្ងៃទី ២ ខែវិច្ឆិកាខាងមុខនេះ។ នេះបើតាមការបញ្ជាក់របស់រដ្ឋាភិបាលវៀតណាមដែលមិនបានរៀបរាប់លម្អិតអំពីរឿងនេះ។
ដំណើរទស្សនកិច្ចនេះក៏ត្រូវបានផ្សព្វផ្សាយផងដែរដោយប្រព័ន្ធផ្សព្វផ្សាយរដ្ឋរបស់ប្រទេសចិនកាលពីថ្ងៃអង្គារ។
លោក Trong ដែលមានអាយុ ៧៨ ឆ្នាំ បានផ្ញើសារអបអរសាទរកាលពីថ្ងៃអាទិត្យទៅកាន់លោក Xi ដែលត្រូវបានសមាជបក្សកុម្មុយនីស្តចិនជ្រើសរើសឱ្យធ្វើជាមេដឹកនាំនៅអាណត្តិទី ៣ ជាបន្តទៀត។
លោក Trong បានបញ្ជាក់នៅក្នុងសារនោះអំពីក្តីសង្ឃឹមនៃ «ការពង្រឹងបន្ថែមទៀតនូវទំនុកចិត្តខាងនយោបាយ និងការដាក់ចេញនូវទិសដៅដ៏ល្អប្រសើរសម្រាប់ការអភិវឌ្ឍបន្ថែមទៀតនៃទំនាក់ទំនងរវាងប្រទេសទាំងពីរ»។
ប្រទេសចិនគឺជាដៃគូពាណិជ្ជកម្មដ៏ធំបំផុតរបស់ប្រទេសវៀតណាមនិងជាប្រភពដ៏សំខាន់នៃការនាំចូលសម្រាប់សេដ្ឋកិច្ចរីកចម្រើនដ៏ឆាប់រហ័សរបស់វៀតណាម ដែលក្នុងនោះក៏រួមមានផងដែរនូវវត្ថុធាតុដើមនិងគ្រឿងយន្តនានាសម្រាប់វិស័យផលិតកម្មដ៏សំខាន់របស់ប្រទេសវៀតណាម។
ទំហំពាណិជ្ជកម្មទ្វេភាគីរវាងប្រទេសទាំងពីរបានកើនចំនួន ១០,២% នៅក្នុងរយៈពេល ៩ ខែដំបូងនៅក្នុងឆ្នាំនេះរហូតទៅដល់ចំនួន ១៣២.៣៨០ លានដុល្លារអាមេរិក បើប្រៀបនឹងមួយឆ្នាំមុន ដែលក្នុងចំណោមនោះ ៧០% គឺជាការនាំចូលរបស់ប្រទេសវៀតណាមពីប្រទេសចិន។ នេះបើយោងតាមទិន្នន័យផ្លូវការរបស់រដ្ឋាភិបាលវៀតណាម។
បើទោះបីជាប្រទេសទាំងពីរមានប្រវត្តិជាយូរមកហើយនៃការមិនទុកចិត្តគ្នានិងជម្លោះទឹកដីក៏ដោយ ក៏គណបក្សកុម្មុយនីស្តនៃប្រទេសទាំងពីរនៅតែរក្សាភាពស្និទ្ធស្នាលផ្លូវការជាមួយគ្នាដដែល៕
ប្រធានបក្សកុម្មុយនីស្តវៀតណាមនឹងធ្វើទស្សនកិច្ចទៅជួបលោក Xi Jinping នៅសប្តាហ៍ក្រោយ
រូបឯកសារ៖ ប្រធានគណបក្សកុម្មុយនីស្តវៀតណាមលោក Nguyen Phu Trong ថ្លែងក្នុងសន្និសីទសារព័ត៌មានមួយ នៅទីក្រុងហាណូយ ប្រទេសវៀតណាម កាលពីថ្ងៃទី១ ខែកុម្ភៈ ឆ្នាំ២០២១។
ទីក្រុងប៉េកាំង —