លោក Juan Guaido ដែលជាមេដឹកនាំគណបក្សប្រឆាំង និងជាអ្នកដែលប្រកាសខ្លួនឯងជាប្រធានាធិបតីនៃប្រទេសវ៉េណេស៊ុយអេឡា បានអំពាវនាវឲ្យមានការធ្វើបាតុកម្មរយៈពេល ២ ថ្ងៃ នៅក្នុងសប្ដាហ៍នេះ នៅក្នុងការប្រឹងប្រែងរបស់លោកដើម្បីធ្វើឲ្យយោធាគាំទ្ររូបលោក និងឃ្លាតឆ្ងាយពីលោក Nicolas Maduro។
ដំបូង លោក Guaido ចង់ឲ្យប្រជាពលរដ្ឋវ៉េណេស៊ុយអេឡាធ្វើការតវ៉ាដោយសន្តិវិធីរយៈពេល ២ ម៉ោង នៅថ្ងៃពុធខាងមុខនេះ «ដើម្បីទាមទារឲ្យពួកយោធាមកគាំទ្រប្រជាពលរដ្ឋ»។
នៅថ្ងៃសៅរ៍ខាងមុខ លោកចង់ឲ្យអ្នកគាំទ្ររបស់លោក «គ្រប់ទីកន្លែងទាំងអស់» នៅទូទាំងប្រទេស និងនៅជុំវិញពិភពលោកចេញតវ៉ាតាមដងផ្លូវ ដែលនេះជាវិធានការមួយដែលស្របទៅនឹងកាលបរិច្ឆេទកំណត់របស់សហភាពអឺរ៉ុបនៅក្នុងការប្រកាសអំពីការបោះឆ្នោតថ្មី។
លោក Guaido ផ្ដល់ការលើកលែងទោសដល់ទាហាន ដែលគាំទ្រលទ្ធិប្រជាធិបតេយ្យ និងប្រឆាំងនឹងរដ្ឋាភិបាលរបស់លោក Maduro។
លោក Guaido បាននិយាយនៅឯសន្និសីទសារព័ត៌មានមួយកាលពីថ្ងៃអាទិត្យម្សិលមិញថា៖ «យើងកំពុងរង់ចាំទាហាននៃប្រទេសវ៉េណេស៊ុយអេឡា។ យើងកំពុងរង់ចាំអ្នក និងការប្ដូរផ្ដាច់របស់អ្នកចំពោះរដ្ឋធម្មនុញ្ញរបស់យើង»។
ក្រុមអ្នកគាំទ្រគណបក្សប្រឆាំង ដែលអ្នកខ្លះបានស្រែកបន្ទោរថា «មិត្តភក្ដិនាយទាហានទាំងអស់ អ្នកគឺជាអ្នកដែលមិនទាន់បានចូលរួមក្នុងក្រុម» បានចែកខិត្តប័ណ្ណបញ្ជាក់អំពីគម្រោងលើកលែងទោសនៅឯប៉ុស្ដិ៍យោធា និងប៉ុស្តិ៍ប៉ូលិសនានា។
ទាហាន និងប៉ូលិសខ្លះបានហែកខិត្តប័ណ្ណនោះចោល។ ប៉ុន្តែ ទាហានភាគច្រើនបាននិយាយថា ពួកគេ និងក្រុមគ្រួសាររបស់ពួកគេធុញទ្រាន់ចំពោះបញ្ហាខ្វះម្ហូបអាហារធ្ងន់ធ្ងរ និងបញ្ហាផ្សេងៗទៀត៕