រដ្ឋមន្រ្តីការបរទេសសហរដ្ឋអាមេរិកលោក Mike Pompeo បានស្ថិតនៅក្នុងប្រទេសឈីលីដែលជាការឈប់សំចតលើកដំបូងនៃដំណើរទស្សនកិច្ចរបស់លោកទៅកាន់តំបន់អាមេរិកខាងត្បូង ដែលនៅទីនោះលោកត្រូវគេរំពឹងថានឹងការពារការដាក់ទណ្ឌកម្មរបស់សហរដ្ឋអាមេរិកប្រឆាំងនឹងប្រទេសវ៉េណេស៊ុយអេឡា។
ដំណើរទស្សនកិច្ចរយៈពេល៣ថ្ងៃរបស់រដ្ឋមន្រ្តីការបរទេសសហរដ្ឋអាមេរិកលោក Pompeo រួមមានប្រទេសឈីលី ប៉ារ៉ាហ្គាយ ប៉េរូ និងប្រទេសកូឡុំប៊ី ប្រទេសទាំងអស់នេះត្រូវបានគេមើលឃើញថា មានការកើនឡើងនូវការវិនិយោគទុនរបស់ប្រទេសចិនក្នុងប៉ុន្មានឆ្នាំថ្មីៗនេះ។
នៅក្នុងប្រទេសឈីលី រដ្ឋមន្រ្តីការបរទេសអាមេរិកលោក Pompeo ជួបនៅក្នុងរដ្ឋធានីសាន់ត្យាហ្គោ ជាមួយលោកប្រធានាធិបតី Sebastian Pinera និងលោក Robert Ampuero រដ្ឋមន្រ្តីការបរទេសដើម្បីពិភាក្សាចំណងទាក់ទងខាងសេដ្ឋកិច្ចនិងភាពជាដៃគូដូចជាប្រព័ន្ធសន្តិសុខកុំព្យូទ័រ វិទ្យាសាស្រ្តនិងបច្ចេកវិទ្យា។
រដ្ឋមន្រ្តីការបរទេសអាមេរិកលោក Pompeo ធ្វើដំណើរនៅថ្ងៃសៅរ៍នេះទៅកាន់រដ្ឋធានីអាសង់ស្យុង នៃប្រទេសប៉ារ៉ាហ្គាយ ដែលនៅទីនោះលោកនឹងជួបជាមួយប្រធានាធិបតី និងរដ្ឋមន្រ្តីការបរទេស ហើយនៅថ្ងៃអាទិត្យ លោកត្រូវគេរំពឹងនឹងធ្វើដូចគ្នានៅក្នុងប្រទេសប៉េរូ។ ក្នុងប្រទេសទាំង២ ពួកអស់លោកត្រូវគេរំពឹងថានឹងពិភាក្សាពីឧក្រិដ្ឋកម្មឆ្លងកាត់ព្រំដែននិងការគាំទ្រប្រទេសវ៉េណេស៊ុយអេឡា។
រដ្ឋមន្រ្តីការបរទេសសហរដ្ឋអាមេរិកលោក Pompeo ក៏ត្រូវគេរំពឹងថានឹងបំពេញទស្សនកិច្ចប្រទេសកូឡុំប៊ីរយៈពេលខ្លីដោយការចុះចតនៅទីក្រុង Cucuta ដែលជាទីក្រុងនៅក្បែព្រំដែន ដែលនៅទីនោះ អង្គភាពមួយចំនួនកំពុងធ្វើការដើម្បីគាំទ្រជនភៀសខ្លួនវ៉េណេស៊ុយអេឡា៕