រដ្ឋាភិបាលកូរ៉េខាងត្បូង កាលពីថ្ងៃទី៧ ខែកក្កដា បានសម្តែងការយល់ស្របជាមួយការសម្រេចដាក់ឈ្មោះមេដឹកនាំកូរ៉េខាងជើង រួមទាំងអង្គភាព និងបុគ្គល២២នាក់ផ្សេងទៀតចូលក្នុងបញ្ជីខ្មៅ ដោយសារពួកគេបានរំលោភសិទ្ធិមនុស្សយ៉ាងធ្ងន់ធ្ងរ និងការតាមដានចាប់ខ្លួនអ្នកផ្តាច់ខ្លួន ឬការត្រួតពិនិត្យប្រព័ន្ធផ្សព្វផ្សាយនៅកូរ៉េខាងជើង។
លោក Cho June-hyuck អ្នកនាំពាក្យក្រសួងការបរទេសកូរ៉េខាងត្បូងបាននិយាយថា៖ «ពួកយើងសង្ឃឹមថា ការដាក់ទណ្ឌកម្មនេះ អាចបង្កើនចំណាប់អារម្មណ៍របស់សហគមន៍អន្តរជាតិអំពីស្ថានភាពទុក្ខសោកនៃការរំលោភបំពានសិទ្ធិមនុស្សយ៉ាងធ្ងន់ធ្ងរមានលក្ខណៈជាប្រព័ន្ធនៅកូរ៉េខាងជើង។ ស្របពេលនេះដែរ យើងនឹងជួយពង្រឹងវិធានការពាក់ព័ន្ធ និងបន្តការពិភាក្សាលើបញ្ហានេះ»។
ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោក Samantha Power បាននិយាយក្នុងសេចក្តីថ្លែងការណ៍មួយថា៖ «កិច្ចខិតខំប្រឹងប្រែងទាំងនេះបានបញ្ជូនសារដ៏ច្បាស់លាស់មួយ មិនត្រឹមតែទៅកាន់អ្នកដឹកនាំជាន់ខ្ពស់ទេ ថែមទាំងទៅកាន់អ្នកគ្រប់គ្រងពន្ធនាគារ សន្តិសុខ អ្នកត្រួតពិនិត្យព័ត៌មាន ប៉ូលិសសម្ងាត់ អ្នកសួរចម្លើយ និងអ្នកប្រព្រឹត្តឧក្រិដ្ឋកម្មលើអ្នកដែលផ្តាច់ខ្លួន។ ពិភពលោកកំពុងតែកត់ត្រាការរំលោភបំពានរបស់អ្នក ហើយការរំលោភបំពានទាំងនោះមិនត្រូវបានគេបំភ្លេចឡើយ»។
នៅឆ្នាំ២០១៤ គណៈកម្មការស៊ើបអង្កេតរបស់អង្គការសហប្រជាជាតិបានចេញរបាយការណ៍មួយដែលបានកត់ត្រាការរំលោភបំពានសិទ្ធិមនុស្សដែលរាលដាលឡើងគ្រប់ទិសទី និងជាលក្ខណៈប្រព័ន្ធ ក្នុងនោះមានដូចជាការសម្លាប់ក្រៅប្រព័ន្ធតុលាការ ការធ្វើឲ្យបាត់ខ្លួន ការចាប់ខ្លួនដោយគ្មានហេតុផលច្បាស់លាស់ ការវាយដំ ការបង្អត់អាហារដោយបង្ខំ ការរំលោភបំពានផ្លូវភេទ ពលកម្មដោយបង្ខំ និងការធ្វើទារុណកម្ម។ ក្នុងរបាយការណ៍ដដែលបានកត់ត្រាថា ការរំលោភបំពានភាគច្រើនដែលបានរៀបរាប់នេះ កើតឡើងនៅពន្ធនាគានយោបាយនៃប្រទេសកូរ៉េខាងជើង ដែលមានឃុំឃាំងមនុស្សប្រុស ស្រី និងកុមារប្រមាណ ៨០.០០០ ទៅ១២០.០០០នាក់។
ទណ្ឌកម្មដោយសារការរំលោភសិទ្ធិមនុស្សជាលើកទីមួយ
វិធានការសហរដ្ឋអាមេរិកដែលប្រកាសនៅថ្ងៃទី៦ខែកក្កដា គឺជាលើកដំបូងហើយដែលកូរ៉េខាងជើងត្រូវបានដាក់ទណ្ឌកម្មលើការរំលោភបំពានសិទ្ធិមនុស្ស។
អង្គការឃ្លាំមើលសិទ្ធិមនុស្ស Human Rights Watch និយាយថា ការដាក់ទណ្ឌកម្មថ្មីនេះឆ្លុះបញ្ចាំងពីការកើនឡើងនូវចំណាប់អារម្មណ៍អន្តរជាតិ និងក្តីព្រួយបារម្ភទៅលើអំពើឃោរឃៅដែលកំពុងកើតឡើងជាបន្តបន្ទាប់នៅកូរ៉េខាងជើង។
លោក Phil Robertson អនុប្រធានអង្គការឃ្លាំមើលសិទ្ធិ Human Rights Watch ប្រចាំតំបន់អាស៊ីបាននិយាយថា៖ «អ្វីដែលយើងកំពុងឃើញពេលនេះគឺថា ក្តីព្រួយបារម្ភពីការរំលោភបំពានសិទ្ធិមនុស្សរបស់រដ្ឋាភិបាលកូរ៉េខាងជើង និងមនុស្សថ្នាក់ក្រោមក្នុងជួររដ្ឋាភិបាលនេះ បានចូលជាចំណែកមួយនៃនិន្នាការទូទៅក្នុងទំនាក់ទំនងរបស់សហគមន៍អន្តរជាតិជាមួយកូរ៉េខាងជើង»។
តាំងពីឆ្នាំ២០០៦មក អង្គការសហប្រជាជាតិបានអនុវត្តការរឹតបន្តឹងគំនាបខ្លាំងឡើងៗទៅលើកូរ៉េខាងជើងដោយសារប្រទេសនេះបន្តអភិវឌ្ឍអាវុធនុយក្លេអ៊ែរដែលត្រូវបានហាមឃាត់ និងកម្មវិធីកាំជ្រួចមីស៊ីលផ្លោងរបស់ខ្លួន។
ក្នុងឆ្នាំនេះ ក្រុមប្រឹក្សាសន្តិសុខអង្គការសហប្រជាជាតិបានអនុវត្តវិធានការតឹងតែងថ្មី ដែលមានការពន្យារការផ្ទេររូបិយវត្ថុ និងរឹតបន្តឹងជំនួញរ៉ែដែលផ្តល់ផលចំណេញច្រើនសម្រាប់ប្រទេសនេះ ក្រោយពេលកូរ៉េខាងជើងបានធ្វើការសាកល្បងនុយក្លេអ៊ែរលើកទី៤ និងការបាញ់កាំជ្រួចចម្ងាយឆ្ងាយដោយប្រើប្រាស់បច្ចេកវិទ្យាកាំជ្រួចផ្លោង។
ភាពរឹងទទឹងរបស់កូរ៉េខាងជើង
កូរ៉េខាងជើងត្រូវបានគិតថានឹងប្រឆាំងតបតនឹងការដាក់គំនាបរបស់សហរដ្ឋអាមេរិក។ បន្ទាប់ពីការដាក់គំនាបចុងក្រោយពីអង្គការសហប្រជាជាតិ រដ្ឋាភិបាលកូរ៉េខាងជើងបានសច្ចាថា នឹងបន្តអភិវឌ្ឍកម្មវិធីនុយក្លេអ៊ែ និងបានបាញ់សាកល្បងកាំជ្រួចចម្ងាយខ្លី និងមធ្យមជាច្រើនគ្រាប់។
ផលប៉ះពាល់ភ្លាមៗទៅលើវិស័យសេដ្ឋកិច្ចចេញពីការដាក់ទណ្ឌកម្មនេះ ត្រូវគេរំពឹងថានឹងនៅមានកម្រិត ដោយសារតែសហរដ្ឋអាមេរិកគ្មានទំនាក់ទំនងពាណិជ្ជកម្មផ្ទាល់ជាមួយកូរ៉េខាងជើងទេ។
អ្នកវិភាគខ្លះនិយាយថា ទណ្ឌកម្មដែលចេះតែកើនឡើងនេះអាចធ្វើឲ្យស្ថានភាពប្រឈមមុខដាក់គ្នាកាន់តែលំបាកសម្រាប់គូសត្រូវរដ្ឋាភិបាលក្រុងព្យុងយ៉ាង និងក្រុងវ៉ាស៊ីនតោន ហើយវានឹងអាចធ្វើឲ្យភាគីទាំងសងខាងពិបាកនឹងស្វែងរកការពិភាក្សាចរចាគ្នានៅថ្ងៃមុខ។
បើទោះបីជាឥទ្ធិពលនៃការដាក់ទណ្ឌកម្មថ្មីនេះអាចមានលក្ខណៈជានិមិត្តរូបមួយក៏ដោយ មន្រ្តីសហរដ្ឋអាមេរិកមួយចំនួននិយាយថា វាជាការសំខាន់មួយដែលត្រូវដាក់រដ្ឋាភិបាលរបស់លោក គីម ជុងអ៊ុន ក្នុងបញ្ជីរបស់ពួកគេ ដោយសារតែការរំលោភបំពានជាច្រើនលើកច្រើនសារនិងកំពុងតែបន្ត។
លោក John Kirby អ្នកនាំពាក្យក្រសួងការបរទេសសហរដ្ឋអាមេរិកនិយាយថា៖ «វាអាចបញ្ជូនសារមួយដែលខុសឆ្គងទៅកាន់លោក (គីម ជុងអ៊ុន) ហើយអាចជាការលើកទឹកចិត្តឲ្យលោកបន្តប្រព្រឹត្តអំពើអសីលធម៌ទាំងនេះទៅកាន់ប្រជាជនរបស់ខ្លួន ប្រសិនបើអ្នកនៅតែអង្គុយនៅក្បែរដោយស្ងៀមស្ងាត់ មិននិយាយអ្វីសោះ មិនធ្វើអ្វីសោះ និងមិនដាក់ទណ្ឌកម្មនោះ»។។
ក្នុងបញ្ជីមួយដែលគេហៅថា «បញ្ជីប្រជាជាតិនិងពលរដ្ឋដែលត្រូវបានហាមឃាត់ពិសេស» ទ្រព្យសម្បត្តិ និងភាគហ៊ុនរបស់អ្នកដែលត្រូវបានគេកំណត់ទាំងនោះនឹងត្រូវបង្កក ក្រោមអំណាចច្បាប់របស់សហរដ្ឋអាមេរិក។ លើសពីនេះទៅទៀត សកម្មភាពទិញដូររវាងពលរដ្ឋអាមេរិកាំង និងអ្នកដែលត្រូវបានកំណត់ទាំងនោះត្រូវបានហាមឃាត់។
មន្រ្តីកូរ៉េខាងជើងផ្សេងទៀតដែលត្រូវបានដាក់ក្នុងបញ្ជីខ្មៅនោះរួមមាន លោក Choe Pu Il រដ្ឋមន្រ្តីសន្តិសុខប្រជាជន លោក Ri Song Chol ទីប្រឹក្សានៅក្រសួងសន្តិសុខប្រជាជន ព្រមទាំងលោក Kang Song Nam ប្រធានការិយាល័យនៃក្រសួងសន្តិសុខរដ្ឋ។
មន្រ្តីសហរដ្ឋអាមេរិកនិយាយថា វិធានការថ្មីៗទាំងនេះ នឹងអាចពង្រឹងនិងពង្រីកការដាក់ទណ្ឌកម្មទៅលើកូរ៉េខាងជើង។ វិធានការទាំងនេះ គឺស្របទៅនឹងក្រឹត្យស្តីពីការដាក់ទណ្ឌកម្មលើកូរ៉េខាងជើង និងការពង្រឹងគោលនយោបាយឆ្នាំ២០១៦ ដែលត្រូវបានអនុម័តដោយសភាអាមេរិក និងចុះហត្ថលេខាដោយលោកប្រធានាធិបតី បារ៉ាក់ អូបាម៉ា កាលពីខែកុម្ភៈ។
ក្រៅពីលោក Kim Jong Un រដ្ឋាភិបាលសហរដ្ឋអាមេរិកក៏បានរាប់ចូលប្រធានាធិបតីប្រទេសស៊ីរី លោក Bashar al-Assad ប្រធានាធិបតីប្រទេសស៊ីមបាវ៉េ លោក Robert Mugabe និងប្រធានាធិបតីប្រទេសបេឡារុស លោក Alexander Lukashenko ក្នុងបញ្ជីខ្មៅរបស់ខ្លួនផងដែរ៕
Nike Ching រាយការណ៍ព័ត៌មាននេះពីក្រសួងការបទេសក្នុងរដ្ឋធានីវ៉ាស៊ីនតោន និង Youmi Kim ចូលរួមផ្តល់ព័ត៌មានបន្ថែមពីរដ្ឋធានីសេអ៊ូល។
ប្រែសម្រួលដោយ វិញ សុជាតា