ស្របពេលដែលសហរដ្ឋអាមេរិកចាត់វិធានការកាលពីថ្ងៃពុធម្សិលមិញដើម្បីរារាំងបណ្ដាញដឹកជញ្ជូនប្រេងរបស់អ៊ីរ៉ង់ដែលខ្លួនចោទថាបានឧបត្ថម្ភដល់អំពើភេរវកម្ម លោកប្រធានាធិបតី ដូណាល់ ត្រាំ បានបង្ហាញសុទិដ្ឋិនិយមអំពីការទំនាក់ទំនងជាមួយនឹងអ៊ីរ៉ង់ផ្នែកការទូត។
លោក ត្រាំ និយាយដូច្នេះថា៖ «អ៊ីរ៉ង់ចង់ចរចា។ អ៊ីរ៉ង់ចង់ធ្វើកិច្ចព្រមព្រៀង»។ លោក ត្រាំ បញ្ជាក់ដូច្នេះនៅក្នុងការិយាល័យរបស់លោកក្នុងសេតវិមាន នៅពេលដែលអ្នកកាសែតបានសួរលោកអំពីការដាក់ទណ្ឌកម្មថ្មី ដែលក្រសួងហិរញ្ញវត្ថុបានប្រកាស និងអំពីថាតើលោកមានឆន្ទៈនៅក្នុងការជួបជាមួយនឹងប្រធានាធិបតីអ៊ីរ៉ង់លោក Hassan Rouhani នៅក្នុងកិច្ចប្រជុំរបស់មហាសន្និបាតអង្គការសហប្រជាជាតិនៅពេលខាងមុខនេះដែរឬក៏យ៉ាងណានោះ។
លោក ត្រាំ បានបញ្ជាក់ជាថ្មីឡើងវិញថា សហរដ្ឋអាមេរិក «គ្មានបំណងចង់ឲ្យមានការផ្លាស់ប្ដូររបបដឹកនាំ [នៅអ៊ីរ៉ង់] នោះទេ»។
លោក ត្រាំ បាននិយាយកាលពីថ្ងៃពុធម្សិលមិញថា៖ «អ៊ីរ៉ង់មានសក្ដានុពលធំធេង ហើយខ្ញុំគិតថា ពួកគេចង់កេងប្រយោជន៍ពីនេះ»។
អ៊ីរ៉ង់បានប្រកាសកាលពីល្ងាចថ្ងៃពុធម្សិលមិញថា ខ្លួននឹងដកថយបន្ថែមទៀតចេញពីកិច្ចព្រមព្រៀងនុយក្លេអ៊ែរឆ្នាំ ២០១៥។ កាលពីឆ្នាំមុន លោក ត្រាំ បានដកសហរដ្ឋអាមេរិកចេញពីកិច្ចព្រមព្រៀងនុយក្លេអ៊ែរនេះ។
ការណ៍ដែលអ៊ីរ៉ង់ប្រកាសថា នឹងដកខ្លួនថយបន្ថែមទៀតចេញពីកិច្ចព្រមព្រៀងនេះគឺបានធ្វើឡើង បន្ទាប់ពីការិយាល័យគ្រប់គ្រងទ្រព្យសម្បត្តិបរទេសនៃក្រសួងហិរញ្ញវត្ថុសហរដ្ឋអាមេរិកប្រកាសដាក់ទណ្ឌកម្មលើបុគ្គល ១០ នាក់ អង្គភាព ១៦ និងនាវា ១១ គ្រឿង ដែលគ្រប់គ្រងដោយ និងផ្ដល់ការផ្គត់ផ្គង់ផ្នែកថវិកាដល់កងកម្លាំងឆ្មាំបដិវត្តន៍ឥស្លាម និងក្រុម Hezbollah ដែលជាក្រុមភេរវកម្មរបស់កងកម្លាំងឆ្មាំបដិវត្តន៍ឥស្លាមនេះ៕