សន្ទស្សន៍ភាគហ៊ុននៃផ្សារភាគហ៊ុនសំខាន់ៗរបស់សហរដ្ឋអាមេរិក បានឡើងថ្លៃជាង៣ភាគរយនៅក្នុងការលក់ដូរកាលពីព្រឹកថ្ងៃព្រហស្បតិ៍ បើទោះបី ផ្សារភាគហ៊ុន បានធ្លាក់ថ្លៃនៅក្នុងតំបន់អាស៊ីនិងអឺរ៉ុបក៏ដោយ។
សន្ទស្សន៍ភាគហ៊ុនរបស់ផ្សារភាគហ៊ុន Dow Jones Industrial Average និង S & P 500 និងសន្ទស្សន៍ភាគហ៊ុនរបស់ក្រុមហ៊ុនបច្ចេកវិទ្យា Nasdaq បានឡើងថ្លៃ ទើបតែប៉ុន្មានម៉ោង បន្ទាប់ពីព្រឹទ្ធសភាសហរដ្ឋអាមេរិក បានអនុម័តកម្មវិធីជួយសេដ្ឋកិច្ចដែលមានទឹកប្រាក់២ទ្រីលាន ដុល្លារដែលមានគោលបំណងជួយទប់ការខូចខាតយ៉ាងខ្លាំងដល់សេដ្ឋកិច្ចដែលបណ្តាលមកពីមេរោគកូរ៉ូណា។
លោកប្រធានាធិបតីដូណាល់ ត្រាំ បានសន្យាចុះហត្ថលេខាលើកម្មវិធីជួយសេដ្ឋកិច្ចនោះឲ្យក្លាយទៅជាច្បាប់បន្ទាប់ពីសភាតំណាងរាស្រ្តបញ្ចប់ការពិភាក្សាសេចក្តីព្រាងច្បាប់នៅថ្ងៃសុក្រនេះ។
កម្មវិធីជួយសេដ្ឋកិច្ចនោះ មានគោលបំណងជួយសេដ្ឋកិច្ចអាមេរិកាំងដោយផ្តល់ប្រាក់រាប់ពាន់លានដុល្លារដល់ក្រុមហ៊ុនពាណិជ្ជកម្ម ដែលក្រុមហ៊ុនជាច្រើន បាននៅជាប់គាំងដោយមេរោគកូរ៉ូណា នៅពេលដែលអតិថិជនបានស្ថិតនៅផ្ទះដើម្បីបញ្ចៀសទំនាក់ទំនងជាមួយមនុស្សណាដែលអាចឆ្លងមេរោគនោះ។
កម្មករអាមេរិកាំងចំនួន៣លាន៣សែននាក់ បានដាក់ពាក្យសុំប្រាក់គ្មានការងារធ្វើកាលពីសប្តាហ៍មុន ដោយមានចំនួនរាប់លាននាក់ទៀត ត្រូវគេរំពឹងថា នឹងដាក់ពាក្យគ្មានការងារធ្វើក្នុងប៉ុន្មានសប្តាហ៍ទៀតនេះ។
កាលពីថ្ងៃពុធ ផ្សារភាគហ៊ុន Dow បានឡើងថ្លៃ២ថ្ងៃជាប់ៗគ្នា ជាលើកទី១ដែលបានកើតមានឡើងដូចនេះចាប់តាំងពីខែកុម្ភៈមក៕