ក្រសួងការងារសហរដ្ឋអាមេរិកបានឲ្យដឹងកាលពីថ្ងៃទី ១៩ ខែមីនាកន្លងទៅនេះថា ពលរដ្ឋអាមេរិកាំងប្រមាណ ២ សែន ៨ ម៉ឺន ១ ពាន់នាក់ បានស្នើសុំទាមទារប្រាក់អត្ថប្រយោជន៍ដោយសារការអត់ការងារធ្វើ ដែលជាការកើនឡើងចំនួន ៧ ម៉ឺននាក់ បើប្រៀបធៀបទៅនឹងសប្ដាហ៍កន្លងទៅ។ តួលេខថ្មីនេះ គឺជាតួលេខខ្ពស់ជាងគេបំផុត ក្នុងរយៈពេលពីរឆ្នាំកន្លះកន្លងមកនេះ។
សេដ្ឋវិទូបានប៉ាន់ប្រមាណថា ពលរដ្ឋអាមេរិកជាងមួយលាននាក់ នឹងត្រូវបាត់បង់ការងាររបស់ពួកគេក្នុងបំដាច់ខែមីនានេះ។
បុគ្គលិកទទួលប្រាក់ឈ្នួលតាមម៉ោង នៅតាមហាងលក់រាយ សណ្ឋាគារ និងភោជនីយដ្ឋាន ត្រូវគេរំពឹងថា ជាជនដែលងាយរងគ្រោះជាងគេសម្រាប់ការកាត់បុគ្គលិកចេញ ដោយសារតែមានការបិទអាជីវកម្មដោយស្ម័គ្រចិត្ត ឬក៏បិទតាមបញ្ជារបស់រដ្ឋ និងអជ្ញាធរមូលដ្ឋាន ដើម្បីព្យាយាមរារាំងមិនឲ្យមានការឆ្លងរាលដាលនៃមេរោគកូរ៉ូណា។
រដ្ឋនីមួយៗកំពុងរាយការណ៍អំពីកំណើនខ្លាំងនៃការទាមទារប្រាក់អត្ថប្រយោជន៍ដោយសារការអត់ការងារធ្វើ ដោយជាទូទៅ អាជ្ញាធរគ្រាន់តែផ្ដល់ឲ្យនូវប្រាក់មួយចំនួនតូចបណ្ដោះអាសន្នសម្រាប់អ្នកអត់ការងារធ្វើប៉ុណ្ណោះ ហើយចំនួនទឹកប្រាក់នោះគឺតិចតួចបំផុត បើប្រៀបធៀបទៅនឹងប្រាក់ដែលពួកគេទទួលបានពីការប្រកបការងារធម្មតារបស់ពួកគេ។
នៅក្នុងរដ្ឋ Virginia ដែលស្ថិតនៅភាគខាងកើតសហរដ្ឋអាមេរិក គេឃើញមានការកើនឡើងចំនួន ៣៣ ដង នៃការទាមទារប្រាក់អត្ថប្រយោជន៍កាលពីសប្ដាហ៍មុន ដោយសារការអត់ការងារធ្វើ។ ចំណែកឯរដ្ឋ Pennsylvania នៅភាគខាងកើត និងរដ្ឋ Colorado នៅភាគខាងលិចវិញ ត្រូវបានគេរាយការណ៍ថា មានការកើនឡើង ២០ ដង នៃការទាមទាមប្រាក់អត្ថប្រយោជន៍នេះ។
ទាំងរដ្ឋាភិបាលសហព័ន្ធ អាជ្ញាធរប្រចាំរដ្ឋនីមួយៗ និងអាជ្ញាធរមូលដ្ឋាន ក៏ដូចជាអាជីវកម្មនានា បានបិទទីតាំងរបស់ពួកគេ និងបានបញ្ជាឲ្យបុគ្គលិករបស់ខ្លួនធ្វើការពីផ្ទះ។
ដូច្នេះហើយ ការចំណាយរបស់អ្នកប្រើប្រាស់នៅក្នុងសហរដ្ឋអាមេរិក ដែលស្មើនឹង ៧០% នៃសេដ្ឋកិច្ចរបស់ប្រទេស ដែលជាសេដ្ឋកិច្ចដ៏ធំជាងគេបំផុតនៅលើពិភពលោក គឺនឹងធ្លាក់ចុះដោយមិនអាចជៀសបាន នៅពេលដែលប្រជាពលដ្ឋព្រួយបារម្ភអំពីការប្រាស្រ័យទាក់ទងជាមួយអ្នកដែលខ្លួនមិនស្គាល់ ដោយគេមិនដឹងថាតើអ្នកនោះមានផ្ទុកមេរោគកូរ៉ូណាឬក៏អត់នោះ៕
ប្រែសម្រួលដោយ សឿន វឌ្ឍនា