មន្ត្រីជាន់ខ្ពស់របស់សហរដ្ឋអាមេរិក ជប៉ុន និងកូរ៉េខាងត្បូង បានឯកភាពគ្នានៅថ្ងៃព្រហស្បតិ៍នេះ ដើម្បីបង្កើនកិច្ចប្រឹងប្រែងរបស់ពួកគេក្នុងការជំរុញឲ្យប្រទេសកូរ៉េខាងជើងលះបង់នូវកម្មវិធីអាវុធនុយក្លេអ៊ែររបស់ខ្លួន។
លោកអនុរដ្ឋមន្ត្រីការបរទេសជប៉ុន Shinsuke Sugiyama បាននិយាយថា៖ «គ្រោះថ្នាក់ផ្នែកសន្តិសុខនាពេលបច្ចុប្បន្ននេះរបស់ប្រទេសកូរ៉េខាងជើង បានឈានដល់កម្រិតនៃការគំរាមកំហែងថ្មីមួយផ្សេងទៀត។ ខ្ញុំគិតថា យើងត្រូវមានវិធានការផ្សេងពីវិធានការកន្លងមក ដែលអាចដោះស្រាយនូវបញ្ហានេះបាន»។
លោក Shunsuke Sugiyama បានថ្លែងយ៉ាងដូច្នេះនៅក្នុងទីក្រុងតូក្យូ ដែលនៅទីនោះ លោកបានជួបជាមួយនឹងលោកអនុរដ្ឋមន្ត្រីការបរទេសសហរដ្ឋអាមេរិក Antony Blinken និងលោកអនុរដ្ឋមន្ត្រីការបរទេសកូរ៉េខាងត្បូង Lim Sung-nam។
សហរដ្ឋអាមេរិក ជប៉ុន និងកូរ៉េខាងត្បូង ជាសមាជិកនៃក្រុមពិភាក្សា ៦ ភាគី ដែលបានជាប់គាំងនៅពេលដែលប្រទេសកូរ៉េខាងជើងបានដកខ្លួនចេញពីការចរចានៅក្នុងឆ្នាំ ២០០៩។
លោក Antony Blinken ថា៖ «គោលនយោបាយរបស់យើងមិនបានផ្លាស់ប្ដូរទេ។ យើងនឹងមិនទទួលស្គាល់ប្រទេសកូរ៉េខាងជើងថាជាប្រទេសដែលខ្លាំងក្លាខាងអាវុធនុយក្លេអ៊ែរនោះទេ។ យើងនឹងមិនទទួលស្គាល់ការកាន់កាប់អាវុធនុយក្លេអ៊ែររបស់ប្រទេសកូរ៉េខាងជើងនោះទេ»។
លោកបានបន្ថែមថា គោលបំណងគឺចង់អំពាវនាវឲ្យប្រទេសកូរ៉េខាងជើងត្រឡប់មកកាន់តុចរចាវិញ ដើម្បីការពិភាក្សា «ដែលមានការជឿទុកចិត្តគ្នាល្អ»៕