ខណៈពេលដែលធ្វើការប្រារព្ធពិធីរំឭកគុណអតីតយុទ្ធជនលើកចុងក្រោយបង្អស់ក្នុងនាមជាប្រធានាធិបតីអាមេរិក លោក បារ៉ាក់ អូបាម៉ា បានថ្លែងអំណរគុណដល់អតីតយុទ្ធជនអាមេរិក ដែលបានការពារដំណើរការបោះឆ្នោតលក្ខណៈប្រជាធិបតេយ្យរបស់អាមេរិក ដោយលោកសំដៅទៅលើជ័យជម្នះដ៏គួរឲ្យភ្ញាក់ផ្អើលរបស់លោក Donald Trump ក្រោយពីយុទ្ធនាការឃោសនាបោះឆ្នោតដ៏ចម្រូងចម្រាស។
សុន្ទរកថារបស់លោក អូបាម៉ា បានធ្វើឡើងកាលពីព្រឹកថ្ងៃសុក្រនៅឯកន្លែងបញ្ចុះសព Arlington National Cemetery ដែលស្ថិតនៅប៉ែកខាងត្បូងរដ្ឋធានីវ៉ាស៊ីនតោន ស្របពេលដែលសហរដ្ឋអាមេរិកថ្លែងអំណរគុណដល់អតីតយុទ្ធជនជិត២២លាននាក់។
លោកប្រធានាធិបតីបានចូលរួមក្នុងពិធីដាក់កម្រងផ្កាចំពោះកន្លែងគោរពវិញ្ញាណក្ខន្ធរបស់ទាហានដែលមិនត្រូវបានគេស្គាល់អត្តសញ្ញាណ ដែលបានពលីជីវិតរបស់ខ្លួន។
នៅក្នុងពិធីដ៏ស្រងូតស្រងាត់នោះ លោក អូបាម៉ា បានឈរទល់មុខកម្រងផ្កាដោយស្មឹងស្មាត ហើយដាក់ដៃស្តាំលើទ្រូងខាងឆ្វេង ក្នុងខណៈពេលដែលមានការផ្លុំត្រែអមជាមួយផងដែរនោះ៕