គណៈកម្មការជ្រើសរើសប្រធានាធិបតី ដែលគេស្គាល់ថា Electoral College កាលពីថ្ងៃចន្ទម្សិលមិញ បានបោះឆ្នោតជ្រើសរើសលោក Donald Trump ជាប្រធានាធិបតីផ្លូវការទី ៤៥ របស់សហរដ្ឋអាមេរិក។
ប្រជាពលរដ្ឋអាមេរិកាំងបានដឹងតាំងពីថ្ងៃទី ៨ ខែវិច្ឆិកា ថា លោក Trump នឹងក្លាយជាប្រធានាធិបតីសហរដ្ឋអាមេរិក នៅពេលលោកស្បថចូលកាន់តំណែងនៅថ្ងៃទី ២០ ខែមករា ខាងមុខនេះ។
ប៉ុន្តែ ការបោះឆ្នោតនៅក្នុងសហរដ្ឋអាមេរិក មិនកំណត់យកតាមសំឡេងឆ្នោតភាគច្រើនដែលបេក្ខជនប្រកួតប្រជែងតំណែងប្រធានាធិបតីនីមួយៗទទួលបានពីការបោះឆ្នោតដោយផ្ទាល់របស់ប្រជាពលរដ្ឋនោះទេ ប៉ុន្តែកំណត់ដោយការបោះឆ្នោតទូទៅនេះនៅតាមរដ្ឋទាំង ៥០ រួមទាំងរដ្ឋធានីវ៉ាស៊ីនតោនផងដែរ និងជាចុងក្រោយគឺសម្រេចជាផ្លូវការដោយការបោះឆ្នោតរបស់សមាជិកនៃគណៈកម្មការជ្រើសរើសប្រធានាធិបតី។
កាលពីថ្ងៃចន្ទម្សិលមិញនេះ គណៈប្រតិភូ ឬសមាជិកនៃគណៈកម្មការជ្រើសរើសប្រធានាធិបតី បានបោះឆ្នោតនៅតាមរដ្ឋនីមួយៗ រួមទាំងរដ្ឋធានីវ៉ាស៊ីនតោនផងដែរ ហើយលោក Trump ដែលដូចដែលគេបានគិតទុកមុនរួចជាស្រេចនោះ ទទួលបានសំឡេងគាំទ្រចំនួន ២៧០ សំឡេង ដែលជាលក្ខខណ្ឌគ្រប់គ្រាន់ក្នុងការឲ្យលោកក្លាយជាប្រធានាធិបតីផ្លូវការរបស់សហរដ្ឋអាមេរិកបាន។
ការបោះឆ្នោតដោយសមាជិកគណៈកម្មការជ្រើសរើសប្រធានាធិបតីនេះ មានបង្ហាញនៅក្នុងមាត្រាទីពីរនៃរដ្ឋធម្មនុញ្ញរបស់សហរដ្ឋអាមេរិក និងក្លាយជាផ្នែកមួយនៃប្រព័ន្ធបោះឆ្នោតមិនផ្ទាល់របស់សហរដ្ឋអាមេរិក។ ប្រធានាធិបតី និងអនុប្រធានាធិបតី ត្រូវតែទទួលបានសំឡេងគាំទ្រពីសមាជិកនៃគណៈកម្មការជ្រើសរើសប្រធានាធិបតីចំនួន ២៧០ សំឡេង ដើម្បីអាចត្រូវគេជ្រើសរើសជាប្រធានាធិបតី និងអនុប្រធានាធិបតីបាន ទោះបីជាពួកគេមិនទទួលបានសំឡេងគាំទ្រភាគច្រើនពីប្រជាពលរដ្ឋនៅក្នុងការបោះឆ្នោតកាលពីថ្ងៃទី ៨ ខែវិច្ឆិកា កន្លងមកនេះក៏ដោយ៕