យោធាសហរដ្ឋអាមេរិកបាននិយាយថា ខ្លួនបានធ្វើការវាយប្រហារតាមអាកាស«ចំទីដៅ»ជាច្រើនទៅលើទីដៅនានានៅក្នុងតំបន់ភាគកើតប្រទេសស៊ីរី នៅក្នុងការឆ្លើយតបដល់ការវាយប្រហាររបស់យន្តហោះគ្មានមនុស្សបើកដ្រូន កាលពីថ្ងៃព្រហស្បតិ៍ម្សិលមិញ ដែលបានសម្លាប់អ្នកធ្វើការជាប់កិច្ចសន្យាសហរដ្ឋអាមេរិកម្នាក់។
ក្រសួងការពារជាតិអាមេរិកបានបញ្ជាក់ថា អ្នកធ្វើការជាប់កិច្ចសន្យាម្នាក់បានស្លាប់កាលពីថ្ងៃព្រហស្បតិ៍នៅឯមូលដ្ឋានរបស់កងទ័ពចម្រុះមួយកន្លែង នៅក្នុងប្រទេសស៊ីរីភាគឦសាននៅក្នុងការ វាយប្រហារមួយ ដោយយន្តហោះគ្មានមនុស្សបើកដ្រូនដែលសហគមន៍ស៊ើបការណ៍សម្ងាត់បានវាយតម្លៃថា«មានប្រភពមកពីប្រទេសអ៊ីរ៉ង់»។
រដ្ឋមន្ត្រីការពារជាតិសហរដ្ឋអាមេរិកលោក Lloyd Austin បាននិយាយនៅក្នុងសេចក្ដីថ្លែងការណ៍ថាសហរដ្ឋអាមេរិកបានធ្វើការសងសឹកដោយការវាយប្រហារចំទីដៅកាល ពីថ្ងព្រហស្បតិ៍នៅក្នុងប្រទេសស៊ីរី ប្រឆាំងនឹងទីកន្លែងនានាដែលត្រូវបានប្រើប្រាស់ដោយក្រុមនានាដែលមានការទាក់ទិនជាមួយឆ្មាំការពារបដិវត្តន៍របស់អ៊ីរ៉ង់។
លោក Austin បានមានប្រសាសន៍ទៀតថា៖ «ការវាយប្រហារតាមអាកាសបានធ្វើឡើងនៅក្នុងការឆ្លើយតបដល់ការវាយប្រហារនៅថ្ងៃនេះ និងការវាយប្រហារជាបន្តបន្ទាប់កាលពីពេលថ្មីៗនេះ ប្រឆាំងនឹងកងទ័ពចម្រុះនៅក្នុងប្រទេសស៊ី រីដោយក្រុមនានាដែលទាក់ទិននឹងឆ្មាំការពារបដិវត្តន៍របស់អ៊ីរ៉ង់។
លោកបានបន្ថែមទៀតថា«គ្មានក្រុមណាមួយវាយប្រហារកងទ័ពរបស់យើងដោយមិនមានទោសពៃរ៍នោះទេ»។
តាមក្រសួងការពារជាតិអាមេរិកបានប្រាប់ឱ្យដឹងថា យន្តហោះគ្មានមនុស្សបើកដ្រូនបានវាយប្រហាររោងជាងមួយកន្លែងនៅមូលដ្ឋានយោធានៅក្នុងទីក្រុង Hasaka នៃប្រទេសស៊ីរីនៅម៉ោង១:៣៨នាទីថ្ងៃត្រង់ម៉ោងនៅក្នុងស្រុក។
សេចក្តីថ្លែងការណ៍របស់យោធាសហរដ្ឋអាមេរិកបានបញ្ជាក់ថា ជនជាតិអាមេរិកាំង៦នាក់ផ្សេងទៀតបានរងរបួសនៅក្នុងការវាយប្រហារនោះ រួមទាំងទាហានអាមេរិកាំង៥នាក់ផង។ ទាហាន២នាក់បានត្រូវព្យាបាលនៅក្នុងមូលដ្ឋាននោះ ខណៈដែលទាហាន៣នាក់ទៀតនិងអ្នកធ្វើការជាប់កិច្ចសន្យាសហរដ្ឋអាមេរិកម្នាក់បានត្រូវជម្លៀសទៅកាន់កន្លែងព្យាបាលរបស់កងទ័ពចម្រុះនៅក្នុងប្រទេសអ៊ីរ៉ាក់។
សហរដ្ឋអាមេរិកមានកងទ័ពប្រហែល៩រយនាក់នៅក្នុងតំបន់ភាគខាងកើតប្រទេសស៊ីរីដើម្បីជួយកងកម្លាំងស៊ីរី Kurds រារាំងការកកើតឡើងវិញនូវក្រុមភេរវកម្មរដ្ឋអ៊ីស្លាម៕
អាមេរិកសងសឹកប្រឆាំងនឹងអ៊ីរ៉ង់ចំពោះការស្លាប់អ្នកធ្វើការជាប់កិច្ចសន្យាអាមេរិកម្នាក់នៅឯមូលដ្ឋាននៅស៊ីរី
យោធាសហរដ្ឋអាមេរិកបាននិយាយថា ខ្លួនបានធ្វើការវាយប្រហារតាមអាកាស«ចំទីដៅ»ជាច្រើនទៅលើទីដៅនានានៅក្នុងតំបន់ភាគកើតប្រទេសស៊ីរី នៅក្នុងការឆ្លើយតបដល់ការវាយប្រហាររបស់យន្តហោះគ្មានមនុស្សបើកដ្រូន កាលពីថ្ងៃព្រហស្បតិ៍ម្សិលមិញ។
វ៉ាស៊ីនតោន —