ដំណើរការជួយសង្គ្រោះកុមារ២នាក់ចេញពីគំនរបាក់បែកនៃអគាររលំដោយការរញ្ជួយដីនៅក្នុងទីក្រុង Idlib និងទីក្រុង Aleppo នៃភាគពាយ័ព្យប្រទេសស៊ីរីនោះគឺជាព័ត៌មានល្អដែលកម្រនឹងកើតមាន នៅក្នុងតំបន់មួយ ដែលទទួលរងគ្រោះមហន្តរាយដោយការរញ្ជួយដីដ៏ធំ ដែលបានកើតឡើងនៅភាគខាងត្បូងប្រទេសតួកគី និងប្រទេសក្បែរខាងគឺស៊ីរី កាលពីថ្ងៃ៦ ខែកុម្ភៈកន្លងទៅ។
ខណៈពេលដែលប្រតិបត្តិការមនុស្សធម៌ដ៏ធំមួយកំពុងដំណើរដោយយឺតៗក្នុងប្រទេសតួកគីនោះ កិច្ចប្រឹងប្រែងយឺតៗស្រដៀងគ្នានេះស្ទើរតែមិនមាននៅក្នុងប្រទេសស៊ីរី។
បញ្ហាដឹកជញ្ជូនដែលកើតមានដោយសារជម្លោះនឹងវិបត្តិក្នុងប្រទេសស៊ីរីអស់រយៈពេលជាង១២ឆ្នាំ ការប៉ះពាល់ដោយសារការដាក់ទណ្ឌកម្មជាឯកតោភាគី ក៏ដូចជាភាពស្ទាក់ស្ទើរក្នុងការជួយដល់រដ្ឋាភិបាលរបស់ប្រធានាធិបតីស៊ីរីលោក Bashar al-Assad ដែលត្រូវបានចាត់ទុកថា ជាឧក្រិដ្ឋជនសង្គ្រាមនោះ គឺជាកត្តាកំណត់មួយចំនួន។
អ្នកនាំពាក្យការិយាល័យសម្របសម្រួលកិច្ចការមនុស្សធម៌ (OCHA) របស់អង្គការសហប្រជាជាតិ លោក Jens Laerke បានព្រមានថា ភាពតានតឹងខាងនយោបាយរវាងតួកគី និងប្រទេសស៊ីរីដែលជាប្រទេសក្បែរខាងនៅភាគខាងជើងនោះ អាចរួមចំណែកការលំបាកដល់ក្រុមអ្នកផ្តល់ជំនួយ ដើម្បីឆ្លើយតបទៅនឹងវិបត្តិគ្រោះរញ្ជួយដីនៅក្នុងប្រទេសស៊ីរី។
លោកថា «វាមានសារៈសំខាន់ដែលគ្រប់គ្នាមើលឃើញរឿងនេះថា ជាវិបត្តិមនុស្សធម៌មួយព្រោះថា វាដូច្នេះមែន។ សូមកុំយករឿងនេះធ្វើជារឿងនយោបាយ។ អនុញ្ញាតឱ្យយើងយកជំនួយទៅឱ្យជនរងគ្រោះ ដែលត្រូវការជាចាំបាច់នោះ»។
លោក Laerke កត់សម្គាល់ថា គ្រោះរញ្ជួយដីបានបញ្ឈប់ប្រតិបត្តិការផ្តល់ជំនួយឆ្លងព្រំដែនជាបណ្តោះអាសន្ន ពីប្រទេសតួកគីទៅកាន់ប្រទេសស៊ីរី ដោយធ្វើឱ្យរាំងស្ទះដល់ការផ្តល់ជំនួយសង្គ្រោះដ៏ចាំបាច់នានា។
ប្រតិបត្តិការផ្តល់ជំនួយនោះត្រូវបានគ្រប់គ្រងដោយអង្គការសហប្រជាជាតិ ចាប់តាំងពីឆ្នាំ២០១៤មក។ ប្រតិបត្តិការនោះជាខ្យល់ដង្ហើមរបស់មនុស្សប្រមាណ៤លាននាក់ នៅក្នុងទឹកដីភាគខាងជើង ដែលគ្រប់គ្រង់ដោយក្រុមឧទ្ទាមនៅក្នុងប្រទេសស៊ីរី ពីព្រោះក្បួនរថយន្តដឹកជំនួយពីតំបន់ដែលរដ្ឋាភិបាលគ្រប់គ្រង មិនអាចឆ្លងកាត់ខ្សែបន្ទាត់តំបន់មានជម្លោះនោះទេ។
គេប៉ាន់ស្មានថា មានមនុស្សប្រមាណ២៣លាននាក់បានរងការប៉ះពាល់ដោយការរំញ្ជួយដីកម្រិត៧,៨រិជ្ជទ័រ ដែលជាកម្លាំងរញ្ជួយដីដ៏ខ្លាំងបំផុតមួយដែលបានកើតមានក្នុងតំបន់នោះក្នុងរយៈពេលជិត១០០ឆ្នាំកន្លងទៅនេះ។ ខណៈសេចក្តីរាយការណ៍ចុងក្រោយនានាបង្ហាញថា មានអ្នកស្លាប់ប្រមាណជាង១១.០០០នាក់នោះ អង្គការសុខភាពពិភពលោក និយាយថា ខ្លួនរំពឹងថា តួលេខអ្នកស្លាប់នឹងអាចកើនឡើងរហូតដល់ប្រមាណ២ម៉ឺននាក់។
អ្នកនាំពាក្យអង្គការ UNICEF លោក James Elder បានឱ្យដឹងថា កុមារជាអ្នកប្រឈមហានិភ័យខ្លាំងបំផុត។ លោកថា៖ «នៅពេលដែលយើងបានឮពីតួលេខផ្លូវការពីការរញ្ជួយដីនោះ អង្គការ UNICEF បារម្ភថា ការរញ្ជួយដី ដែលបានកើតឡើងនៅតំបន់ភាគនីរតីតួកគី និងភាគខាងជើងស៊ីរីនោះ អាចសម្លាប់កុមារអស់ជាច្រើនពាន់នាក់»។
លោកបន្តទៀតថា៖ «ពួកគេបានចូលគេងជាធម្មតា ប៉ុន្តែបានភ្ញាក់ដោយសំឡេងស្រែកយំនៃអ្នកជិតខាង ដោយសារកញ្ចក់ធ្លាក់បាក់បែក និងដោយសារសំឡេងអគារថ្មបាក់ដ៏គួរឱ្យរន្ធត់នោះ»។
លោក Elder បន្ថែមទៀតថា មុនពេលគ្រោះរញ្ជួយដីកើតឡើងនោះ ក្រុមកុមារក្នុងតំបន់នោះ កំពុងត្រូវការជំនួយមនុស្សធម៌ចាំបាច់ក្នុងគ្រាអាសន្នរួចទៅហើយ។ ក្រុមកុមារជាច្រើននៅក្នុងតំបន់ភាគពាយ័ព្យប្រទសស៊ីរីកំពុងទទួលរងការផ្ទុះឆ្លងជំងឺអាសន្នរោគ អាកាសធាតុត្រជាក់ខ្លាំង និងជម្លោះដ៏ឃោរឃៅ។ ជាការណ៍ពិតណាស់ ការរញ្ជួយដីនេះនឹងរឹតតែធ្វើឱ្យស្ថានភាពរបស់ពួកគេកាន់តែអាក្រក់ខ្លាំងហួសពីការគិត»៕
ប្រែសម្រួលដោយលោក ជ្រា វណ្ណរិទ្ធ
