លោកប្រធានាធិបតីស.រ.អា. បារ៉ាក់ អូបាម៉ា បានមានប្រសាសន៍ថា លោក និងលោក Xi Jinping សមភាគីចិនរបស់លោកបានយល់ស្របគ្នាថារដ្ឋាភិបាលនៃប្រទេសនីមួយៗនឹងមិនប្រព្រឹត្ត ឬមិនគាំទ្រ «ដោយចេតនា» អំពីការលួចកម្មសិទ្ធិបញ្ញា ឬការសម្ងាត់ខាងពាណិជ្ជកម្មតាមបណ្តាញអ៊ិនធឺណិតដែលជាប្រភពមួយនៃការខ្វែងគំនិតគ្នារវាងប្រទេសទាំងពីរទេ។
នៅក្នុងសន្និសីទ កាសែតរួមគ្នាមួយកាលពីថ្ងៃសុក្រនៅឯសេតវិមាន លោកអូបាម៉ាបានមានប្រសាសន៍ថា ភាគីទាំងពីរនឹងបង្កើនកិច្ចសហប្រតិបត្តិការក្នុងបញ្ហាមួយចំនួនដោយទទួលស្គាល់ថា ប្រទេសទាំងពីរមានការខ្វែងគំនិតគ្នា។
គេបានរំពឹងថាកិច្ចចរចាគ្នារវាងមេដឹកនាំទាំងពីរនាក់នេះនឹងផ្តោតការយកចិត្តទុកដាក់លើការប្រមូលការសម្ងាត់តាមបណ្តាញអ៊ិនធឺណិត ការប្រតិបត្តិខាងសេដ្ឋកិច្ចរបស់រដ្ឋាភិបាលក្រុងប៉េកាំង និងគោលនយោបាយរបស់រដ្ឋាភិបាលនេះអំពីជម្លោះក្នុងសមុទ្រចិនខាងត្បូង។
នៅក្នុងពិធីស្វាគមន៍មួយកាលពីពេលមុននេះនៅឯសេតវិមាន លោកប្រធានាធិបតី Xi បានមានប្រសាសន៍ថា ការទាក់ទងគ្នារវាងប្រទេសចិន និងស.រ.អា.កំពុង «ឋិតនៅចំណុចចាប់ផ្តើមថ្មីមួយ»។
លោកប្រធានាធិបតីអាមេរិកាំងបានមានប្រសាសន៍ថា «ប្រសិនបើយើងធ្វើការជាមួយគ្នា ប្រទេសមហាអំណាចទាំងពីររបស់យើងមានសមត្ថភាពគ្មាននរណាអាចប្រដូចបានទេក្នុងការតម្រែតម្រង់ទិសដៅពិភពលោកក្នុងសតវត្សរ៍ខាងមុខ»។
លោកប្រធានាធិបតីអូបាម៉ាក៏បានកត់សម្គាល់ដែរអំពីកង្វល់ខាងសិទ្ធិមនុស្សដែលជាប្រភពនៃការអន់ចិត្តរវាងរដ្ឋាភិបាលក្រុងវ៉ាស៊ីតោន និងរដ្ឋាភិបាលក្រុងប៉េកាំង។ លោកប្រធានធិបតីស.រ.អា.បានមានប្រសាសន៍ថា «ប្រទេសជាតិទាំងឡាយនឹងមានជោគជ័យច្រើនជាងមុន ហើយពិភពលោកនឹងមានការរីកចម្រើនថែមទៀត នៅពេលមានការគោរពសិទ្ធិមនុស្សជាសាកលរបស់មនុស្សគ្រប់ៗគ្នា»៕