រដ្ឋមន្ត្រីក្រសួងយុត្តិធម៌សហរដ្ឋអាមេរិកលោក William Barr បានបង្ហាញខ្លួននៅពីមុខអនុគណៈកម្មាធិការទទួលបន្ទុកការចាយវាយរបស់រដ្ឋាភិបាលនៃរដ្ឋសភា នៅថ្ងៃអង្គារនេះ ដោយលោកត្រូវគេរំពឹងថានឹងប្រឈមនឹងការចោទសួរមួយចំនួនអំពីរបាយការណ៍របស់លោករដ្ឋអាជ្ញាពិសេស Robert Mueller អំពីការស៊ើបអង្កេតលើករណីជ្រៀតជ្រែករបស់ប្រទេសរុស្ស៊ីនៅក្នុងការបោះឆ្នោតប្រធានាធិបតីអាមេរិកឆ្នាំ ២០១៦។
ប៉ុន្តែ គោលបំណងធំនៃការប្រជុំរបស់អនុគណៈកម្មាធិការនេះមិនមែនរឿងរបាយការណ៍របស់លោក Mueller នោះទេ ប៉ុន្តែគឺរឿងថវិកាដែលស្នើឡើងរបស់រដ្ឋបាលរបស់លោកប្រធានាធិបតី Donald Trump សម្រាប់ក្រសួងយុត្តិធម៌សម្រាប់ឆ្នាំសារពើពន្ធដែលនឹងចាប់ផ្ដើមនៅខែតុលាខាងមុខនេះ។
លោក Barr បានលើកឡើងពីកិច្ចប្រឹងប្រែងរបស់ក្រសួងយុត្តិធម៌ដើម្បីការពារមិនឲ្យមានការជ្រៀតជ្រែកពីបរទេសនៅក្នុងការបោះឆ្នោតនៅពេលអនាគត ដោយលោកបាននិយាយថា ការបោះឆ្នោតដែលមានសន្តិសុខត្រឹមត្រូវគឺជាបញ្ហាសំខាន់មួយសម្រាប់ក្រសួងយុត្តិធម៌។
លោកបានបញ្ជាក់នៅក្នុងសេចក្ដីប្រកាសរបស់ខ្លួនថា៖ «ខ្ញុំជឿថា ប្រទេសរបស់យើងត្រូវតែឆ្លើយតបចំពោះការជ្រៀតជ្រែករបស់បរទេសណាមួយ ដោយវិធានការតឹងតែងបំផុត ហើយយើងត្រូវតែធ្វើការជាមួយនឹងដៃគូនៅកម្រិតរដ្ឋ ដើម្បីធានាថា ប្រព័ន្ធបោះឆ្នោតរបស់យើងត្រូវបានការពារពេញលេញ»។
កម្មវិធីសន្តិសុខជាតិផ្សេងទៀតនៅក្នុងសំណើថវិកាឆ្នាំ ២០២០ រួមមានទាំងកិច្ចប្រឹងប្រែងប្រឆាំងនឹងអំពើភេរវកម្ម និងការប្រយុទ្ធប្រឆាំងនឹងការវាយប្រហារតាមអ៊ីនធឺណិតផងដែរ។ នៅក្នុងសេចក្ដីប្រកាសរបស់លោក Barr គេឃើញមានបញ្ជាក់អំពីកម្មវិធីត្រួតពិនិត្យតឹងតែងសម្រាប់អ្នកដែលមានបំណងចង់ចូលមក ឬក៏ស្នាក់នៅក្នុងសហរដ្ឋអាមេរិក ដែលនេះជាអ្វីដែលលោកបញ្ជាក់ថានឹងជួយរដ្ឋាភិបាលនៅក្នុងការ «កំណត់មុខសញ្ញាភេរវជន ឧក្រិដ្ឋជន និងមនុស្សអាក្រក់ផ្សេងទៀត»៕