ប្រធានាធិបតីសហរដ្ឋអាមេរិកលោក Joe Biden នឹងប្រកាសនៅថ្ងៃសុក្រនេះរួមជាមួយ សហ ភាពអឺរ៉ុបនិងក្រុមប្រទេសដែលមានសេដ្ឋកិច្ចជឿនលឿនទាំង៧ឬG7ថា សហរដ្ឋអាមេរិក នឹងដកឋានៈ«អនុគ្រោះពន្ធ»ពាណិជ្ជកម្មពីប្រទេសរុស្ស៊ីដោយសារតែការឈ្លានពានរបស់រុស្ស៊ីលើប្រទេសអ៊ុយក្រែន។ នេះបើតាមសេចក្តីរាយការណ៍ របស់ទីភ្នាក់ងារព័ត៌មាន AP។
បើតាមប្រភពមួយដែលបានដឹងពីបញ្ហានេះដែលនិយាយក្នុងលក្ខណមិនបញ្ចេញឈ្មោះមុនការប្រកាសនោះ បានឲ្យដឹងថា ប្រទេសនិមួយៗអនុវត្តទៅតាមដំណើរការផ្ទាល់របស់ខ្លួន។ការដកឋានៈភាពអនុគ្រោះពន្ធពាណិជ្ជកម្មពីប្រទេសរស្ស៊ី នឹងអនុញ្ញាតឲ្យសហរដ្ឋអាមេរិក និងសម្ព័ន្ធមិត្តរបស់ខ្លួនយកពន្ធរាល់ការនាំចេញទំនិញរបស់រុស្ស៊ីដែលជាការបន្ថែមនូវភាពឯកោដល់សេដ្ឋកិច្ចរបស់រុស្ស៊ីក្នុងការសងសឹកចំពោះការឈ្លានពានទៅលើអ៊ុយក្រែន។
ចំណាត់ការរបស់លោក Biden នេះ កើតមានឡើង ស្របពេលដែលមានសម្ពាធកាន់តែច្រើនឡើងពីគណបក្សនយោបាយទាំងពីររបស់អាមេរិកនៅក្នុងរដ្ឋធានីវ៉ាស៊ីនតោនដើម្បីដកចេញនូវអ្វីដែលគេស្គាល់ជាផ្លូវការថា «ទំនាក់ទំនងពាណិជ្ជកម្មអចិន្ត្រៃយ៍»ជាមួយរុស្ស៊ី។ ប្រធានា ធិបតីអ៊ុយក្រែនលោក Volodymyr Zelenskyy បានជំរុញឲ្យសហរដ្ឋអាមេរិកនិងសម្ព័ន្ធមិត្តចាត់វិធានការប្រឆាំងនឹងរុស្ស៊ីនៅក្នុងការថ្លែងសុន្ទរកថារបស់លោកជាមួយសភាអាមេរិកកាលពីចុងសប្តាហ៍មុន។ ការប្រកាសដកឋានៈអនុគ្រោះពាណិជ្ជកម្មពីរុស៊្សីនេះកើតមានឡើងប៉ុន្មានថ្ងៃ ក្រោយលោក Biden បានចាត់វិធានការហាមឃាត់ការនាំចូលផលិតផលប្រេងនិងឧស្ម័ន្ធពីរុស្ស៊ី។
សេតវិមាន បានបញ្ជាក់ថា លោកBiden នឹងប្រកាសពីការដកឋានៈភាពពាណិជ្ជកម្មនេះនៅព្រឹកថ្ងៃសុក្រនេះម៉ោងនៅក្នុងសហរដ្ឋអាមេរិកដើម្បីបន្តដាក់រុស្ស៊ីឲ្យទទួលខុសត្រូវនូវការឈ្លានពានដែលគ្មានហេតុផលរបស់ខ្លួនទៅលើអ៊ុយក្រែន។
ប្រទេសកាណាដាជាសម្ព័ន្ធមិត្តដ៏សំខាន់របស់អាមេរិកទី១ដែលបានប្រកាសដកឋានៈភាពអនុគ្រោះពន្ធពាណិជ្ជកម្មពីរុស្សីកាលពីសប្តាហ៍មុន៕