ក្រុមប្រឹក្សាសន្តិសុខអង្គការសហប្រជាជាតិ ត្រូវគេរំពឹងនឹងបោះឆ្នោតនៅថ្ងៃអង្គារនេះលើសេចក្តីសម្រេចចិត្តមួយដែលនឹងដាក់ទណ្ឌកម្មសេដ្ឋកិច្ចថ្មីលើប្រទេសកូរ៉េខាងជើងនៅក្នុងការឆ្លើយតបទៅនឹងការសាកល្បងអាវុធនុយក្លែអ៊ែនិងកាំជ្រួចវង់ប្រតិបត្តិការវែងកាលពីពេលថ្មីៗនេះ។
សេចក្តីសម្រេចចិត្តដែលព្រាងដោយសហរដ្ឋអាមេរិកហើយបានដាក់ស្នើកាលពីថ្ងៃអង្គារសប្តាហ៍មុន បានអំពាវនាវឲ្យមានការដាក់ទណ្ឌកម្មខាងអាវុធទាំងស្រុងលើរដ្ឋាភិបាលទីក្រុងព្យូងយ៉ាង ត្រួតពិនិត្យទំនិញនាំចេញនិងនាំចូលទាំងអស់របស់កូរ៉េខាងជើង ទាំងការដឹកជញ្ជូនតាមជើងគោក ជើងទឹកឬតាមអាកាស ហើយនិងបញ្ឈប់ការនាំចូលផលិតផលទាំងអស់ដែលអាចត្រូវបានប្រើប្រាស់សម្រាប់គោលបំណងខាងយោធា។
បេសកជនសហរដ្ឋអាមេរិកប្រចាំនៅអង្គការសហប្រជាជាតិ បានប្រាប់ឲ្យដឹងថា ខ្លួនបានបញ្ជូនសំណើនេះទៅឲ្យប្រទេសអង់ហ្គោឡាកាលពីថ្ងៃចន្ទ សម្រាប់ធ្វើការបោះឆ្នោត។ អង់ហ្គោឡានៅពេលបច្ចុប្បន្ននេះ ជាប្រធាននៃក្រុមប្រឹក្សាសន្តិសុខរបស់អង្គការសហប្រជាជាតិដែលមានប្រទេស១៥ជាសមាជិក។
លោកស្រី Samantha Power ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិ បានមានប្រសាសន៍ថា សេចក្តីសម្រេចនេះជាការចាប់ផ្តើមថ្មីមួយហើយនិងជាការដាក់ទណ្ឌកម្មដ៏ខ្លាំងបំផុតដោយក្រុមប្រឹក្សាសន្តិសុខអង្គការសហប្រជាជាតិនៅក្នុងរយៈពេលជាង២ទសវត្សរ៍នេះ។ អង្គការសហប្រជាជាតិបានដាក់ទណ្ឌកម្មមួយចំនួនរួចទៅហើយទៅលើប្រទេសកូរ៉េខាងជើងនៅក្នុងការឆ្លើយតបទៅនឹងការសាកល្បងអាវុធនុយក្លែអ៊ែនិងកាំជ្រួចមីស៊ីលកាលពីអតីតកាល។
សហរដ្ឋអាមេរិក បានបញ្ជូនសេចក្តីសម្រេចចិត្តនោះបន្ទាប់ពីការចរចាអស់រយៈពេលជាច្រើនសប្តាហ៍ជាមួយប្រទេសចិន ដែលជាសម្ព័ន្ធមិត្តដ៏ជិតស្និទ្ធបំផុតនិងជាដៃគូពាណិជ្ជកម្មដ៏ធំបំផុតរបស់កូរ៉េខាងជើង៕