សហរដ្ឋអាមេរិក និងប្រទេសចិនបានឈានដល់កិច្ចព្រមព្រៀងមួយកាលពីថ្ងៃពុធស្តីពីការដាក់ទណ្ឌកម្មថ្មីរបស់អង្គការសហប្រជាជាតិប្រឆាំងនឹងប្រទេសកូរ៉េខាងជើងចំពោះការសាកល្បងអាវុធនុយក្លេអ៊ែរ និងការបាញ់បង្ហោះកាំជ្រួចមីស៊ីលរយៈចម្ងាយវែងកាលពីពេលថ្មីៗនេះ។
សហរដ្ឋអាមេរិកនឹងបញ្ជូនសេចក្តីព្រាងនៃសេចក្តីសម្រេចចិត្តទៅកាន់ក្រុមប្រឹក្សាសន្តិសុខរបស់អង្គការសហប្រជាជាតិនៅថ្ងៃព្រហស្បត៍នេះ។ សេចក្តីលម្អិតនៃសេចក្តីព្រាងនោះមិនទាន់បានចេញផ្សាយនៅឡើយទេ។
ការប្រកាសនេះបានកើតមានឡើងនៅពេលដែលលោក Wang Yi រដ្ឋមន្រ្តីការបរទេសចិនបំពេញដំណើរទស្សនកិច្ចនៅរដ្ឋធានីវ៉ាស៊ីនតោន ដែលនៅទីនោះលោក បានជួបកាលពីថ្ងៃអង្គារជាមួយលោករដ្ឋមន្រ្តីការបរទេសសហរដ្ឋអាមេរិក John Kerry ហើយនឹងជួបកាលពីថ្ងៃពុធជាមួយលោកស្រី Susan Rice ទីប្រឹក្សាសន្តិសុខជាតិសហរដ្ឋអាមេរិក។
លោក Ned Price អ្នកនាំពាក្យក្រុមប្រឹក្សាសន្តិសុខសហរដ្ឋអាមេរិកបាននិយាយថា លោកស្រី Rice និងលោក Wang រដ្ឋមន្រ្តីការបរទេសចិនបានព្រមព្រៀងគ្នាលើការឆ្លើយតបដ៏ខ្លាំងមួយ ហើយនិងក្នុងសំឡេងតែមួយដល់ការសាកល្បងអាវុធនុយក្លេអ៊ែររបស់កូរ៉េខាងជើង រួមមានការដាក់ទណ្ឌកម្មថ្មីរបស់អង្គការសហប្រជាជាតិផង។
នៅថ្ងៃព្រហស្បត៍នេះ លោក Cho June-hyuck អ្នកនាំពាក្យក្រសួងការបរទេសកូរ៉េខាងត្បូង បានហៅសេចក្តីព្រាងសេចក្តីសម្រេចចិត្តនោះថា ខ្លាំង និងធំទូលាយ។ លោកបាននិយាយថា «សេចក្តីព្រាងនៃសេចក្តីសម្រេចចិត្តនោះមានចំណុចសំខាន់ៗជាច្រើនដែលខ្លាំងជាងសេចក្តីសម្រេចចិត្តកាលពីអតីតកាល»៕
