ប្រទេសអ៊ុយក្រែនដែលជាប្រទេសផលិតនិងនាំចេញធញ្ញជាតិនិងគ្រាប់ពូជសម្រាប់ធ្វើប្រេងឆាទៅកាន់ពិភពលោក បានបញ្ជូនជំនួយស្បៀងអាហារដំណាក់កាលដំបូងរបស់ខ្លួនទៅកាន់ប្រទេសស៊ីរី។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើការបញ្ជាក់របស់ប្រធានាធិបតីអ៊ុយក្រែនលោក Volodymyr Zelenskyy កាលពីថ្ងៃសុក្រ។
លោក Zelenskyy បាននិយាយថា ម្សៅស្រូវសាឡីចំនួន ៥០០ តោនកំពុងត្រូវបានបញ្ជូនទៅកាន់ប្រទេសស៊ីរីរួចហើយ ដែលជាផ្នែកមួយនៃគម្រោងផ្ដួចផ្ដើម «ធញ្ញជាតិពីអ៊ុយក្រែន» បែបមនុស្សធម៌របស់ប្រទេសអ៊ុយក្រែនក្រោមកិច្ចសហប្រតិបត្តិការជាមួយកម្មវិធីស្បៀងអាហារពិភពលោករបស់អង្គការសហប្រជាជាតិ។
លោក Zelenskyy បានបញ្ជាក់នៅលើបណ្ដាញសង្គមអនឡាញ X ថា៖ «ម្សៅស្រូវសាឡីនេះគ្រោងនឹងចែកចាយទៅកាន់មនុស្សចំនួន ១៦៧.០០០ នាក់ដែលស្មើនឹងចំនួន ៣៣.២៥០ គ្រួសារនៅក្នុងពេលប៉ុន្មានសប្ដាហ៍ខាងមុខ»។
លោកបានបន្ថែមថា៖ «កញ្ចប់ជំនួយនីមួយៗមានទម្ងន់ ១៥ គីឡូក្រាមនិងអាចចិញ្ចឹមគ្រួសារដែលមានគ្នា ៥ នាក់បានមួយខែ»។
បន្ទាប់ពីលោក Bashar al-Assad ដែលជាសម្ព័ន្ធមិត្តជិតស្និទ្ធរបស់រុស្ស៊ី ត្រូវបានបណ្ដេញចេញពីតំណែងជាប្រធានាធិបតីស៊ីរីមក ប្រទេសអ៊ុយក្រែនបានបញ្ជាក់ថាខ្លួនចង់ស្ដារទំនាក់ទំនងជាមួយនឹងស៊ីរី។ ជាទម្លាប់កន្លងមក រដ្ឋាភិបាលអ៊ុយក្រែនបាននាំចេញស្រូវសាឡីនិងពោតទៅកាន់បណ្ដាប្រទេសនៅតំបន់មជ្ឈិមបូព៌ា ប៉ុន្តែមិនមែនទៅកាន់ប្រទេសស៊ីរីទេ។
ក្នុងអំឡុងសម័យលោក Assad ស៊ីរីបាននាំចូលស្បៀងអាហារពីប្រទេសរុស្ស៊ី។ ប៉ុន្តែ ការផ្គត់ផ្គង់ស្រូវសាឡីរបស់រុស្ស៊ីដល់ស៊ីរីត្រូវបានផ្អាកដោយសារតែស្ថានការណ៍មិនច្បាស់លាស់។ នេះបើយោងតាមប្រភពរបស់រុស្ស៊ីនិងស៊ីរីកាលពីដើមខែនេះ។
ការនាំចេញរបស់អ៊ុយក្រែនត្រូវបានបង្អាក់ដោយសារការឈ្លានពានរបស់រុស្ស៊ីលើអ៊ុយក្រែនកាលពីខែកុម្ភៈ ឆ្នាំ ២០២២ ដែលបានកាត់បន្ថយធ្ងន់ធ្ងរដល់ការដឹកជញ្ជូនតាមសមុទ្រខ្មៅ។ តាំងពីពេលនោះមក អ៊ុយក្រែនបានបំបែកភាពជាប់គាំងនៅសមុទ្រនិងធ្វើការនាំចេញឡើងវិញពីកំពង់ផែក្រុង Odesa របស់ខ្លួននៅភាគខាងត្បូង៕