មេដឹកនាំសិទ្ធិមនុស្សនៃអង្គការសហប្រជាជាតិអ្នកស្រីមីឆែល ប៉ាហ្សេលែត (Michelle Bachelet) នៅសប្តាហ៍នេះបានលើកឡើងពីកង្វល់ជុំវិញការបង្រ្កាបរបស់អាជ្ញាធរកម្ពុជាទៅលើកូដកម្មរបស់កម្មករនិយោជិតឬអតីតបុគ្គលិកក្រុមហ៊ុនណាហ្គាវើលដ៍និងបានអំពាវនាវឱ្យមានការគោរពសិទ្ធិមូលដ្ឋានរបស់ពលរដ្ឋ។
កម្មករនិយោជិតឬអតីតបុគ្គលិកក្រុមហ៊ុនណាហ្គាវើលដ៍បានចេញធ្វើកូដកម្មនៅមុខអគារកាស៊ីណូរបស់ក្រុមហ៊ុនណាហ្គាវើលដ៍តាំងពីពាក់កណ្តាលខែធ្នូឆ្នាំ២០២១ ដើម្បីតវ៉ាប្រឆាំងនឹងអ្វីដែលពួកគេហៅថាជាការរំលោភសិទ្ធិការងារពីសំណាក់ថៅកែក្រុមហ៊ុនពាក់ព័ន្ធនឹងការបណ្តេញបុគ្គលិកចំនួនជាង១.៣០០នាក់ចេញពីការងារទាំងបង្ខំកាលពីអំឡុងខែមេសាឆ្នាំ២០២១។
ក្នុងពេលធ្វើសេចក្តីបង្ហាញរបាយការណ៍ក្នុងសម័យប្រជុំលើកទី៤៩របស់ក្រុមប្រឹក្សាសិទ្ធិមនុស្សកាលពីថ្ងៃចន្ទ ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី មីឆែល ប៉ាហ្សេលែត បាននិយាយថា៖
«នៅប្រទេសកម្ពុជាខ្ញុំមានកង្វល់អំពីការប្រើប្រាស់ការរឹតត្បិតក្រោមហេតុផលជំងឺកូវីដ១៩របស់អាជ្ញាធរបន្តធ្វើឱ្យលំហប្រជាធិបតេយ្យនិងស៊ីវិលកាន់តែធ្លាក់ចុះរួមទាំងការប្រើលេសក្នុងការបង្ក្រាបលើកូដកម្មស្របច្បាប់របស់បុគ្គលិកកាស៊ីណូ។ ការិយាល័យរបស់ខ្ញុំបានឃើញផ្ទាល់នូវអំពើហិង្សាថ្មីៗនេះរបស់អាជ្ញាធរដែលចាប់បង្ខំឱ្យកូដករជាស្ត្រីឡើងលើឡានក្រុងនិងដឹកចេញពីកន្លែងកូដកម្ម។ ផ្ទុយពីវិធានការអនុវត្តលើសាធារណជនទូទៅកូដករត្រូវបានចាប់ឃុំខ្លួនតាមអំពើចិត្តនិងរងការបង្ខំឱ្យធ្វើតេស្តពិនិត្យជំងឺកូវីដច្រើនដង»។
អ្នកស្រីបានផ្តល់ការកត់សម្គាល់លើសារ:សំខាន់នៃការចូលប្រជែងនយោបាយរបស់គណបក្សជំទាស់ធំមួយដែលអ្នកស្រីមិនបានបញ្ចេញឈ្មោះចំតែត្រូវគេដឹងថាជាគណបក្សសង្គ្រោះជាតិដែលត្រូវបានតុលាការកំពូលកម្ពុជារំលាយចោលកាលពីឆ្នាំ២០១៧ក្រោមការចោទប្រកាន់ពីអាជ្ញាធរកម្ពុជាថាគណបក្សនេះ បានប្រព្រឹត្តអំពើក្បត់ជាតិ។
អ្នកស្រីថ្លែងយ៉ាងដូច្នេះ៖ «ខ្ញុំសូមអំពាវនាវដល់អាជ្ញាធរឱ្យគោរពសិទ្ធិសេរីភាពក្នុងការជួបប្រជុំដោយសន្តិវិធីនិងចូលរួមពិភាក្សាដើម្បីដោះស្រាយការទាមទារតាមផ្លូវច្បាប់របស់កូដករ។ ការការពារសេរីភាពមូលដ្ឋានមានសារ:សំខាន់ណាស់ខណៈប្រទេសកម្ពុជាឈានឆ្ពោះទៅកាន់ការបោះឆ្នោតឃុំសង្កាត់ខាងមុខនៅគ្រាដែលគណបក្សជំទាស់ធំជាងគេរបស់ប្រទេសនេះពុំត្រូវបានអនុញ្ញាតឱ្យចូលរួមប្រកួតប្រជែងហើយថ្នាក់ដឹកនាំ និងអ្នកគាំទ្រជាច្រើនរបស់គណបក្សជំទាស់ត្រូវរស់នៅនិរទេសខ្លួននៅក្រៅស្រុកជាប់ឃុំនិងប្រឈមនឹងការធ្វើទុក្ខបុកម្នេញដោយសារសកម្មភាពស្របច្បាប់របស់ខ្លួនស្របតាមច្បាប់អន្តរជាតិ»។
វីអូអេមិនទាន់អាចសុំការអត្ថាធិប្បាយពាក់ព័ន្ធនឹងកូដកម្មនៅក្រុមហ៊ុនណាហ្គាវើលដ៍ពីអ្នកនាំពាក្យសាលារាជធានីភ្នំពេញលោក ម៉េត មាសភក្តី បានទេនៅថ្ងៃពុធនេះ។
រូបឯកសារ៖ បុគ្គលិកក្រុមហ៊ុនណាហ្គាវើលដ៍ម្នាក់កាន់បដាធ្វើបាតុកម្មតវ៉ានៅមុខរដ្ឋសភាជាតិ ក្នុងរាជធានីភ្នំពេញ កាលពីថ្ងៃទី ៤ ខែមករា ឆ្នាំ ២០២២។
គួររម្លឹកឡើងវិញផងដែរថានៅក្នុងការចេញតវ៉ារបស់កម្មករនយោជិតឬអតីតបុគ្គលិកក្រុមហ៊ុនណាហ្គាវើលដ៍កន្លងមកនោះមានថ្នាក់ដឹកនាំនិងសកម្មជនសហជីពយ៉ាងហោចណាស់១១នាក់ ត្រូវបានចាប់ឃុំខ្លួនជាបន្តបន្ទាប់ពីបទញុះញង់និងការបំពានវិធានការសុខាភិបាលទប់ស្កាត់ការឆ្លងជំងឺកូវីដ១៩ហើយអាជ្ញាធរមានសមត្ថកិច្ចបានចាប់បញ្ជូនកូដកររាប់សិបនាក់ទៅធ្វើចត្តាឡីស័កនៅពេលពួកគេចេញតវ៉ាសារជាថ្មីកាលពីអំឡុងខែកុម្ភៈក្រោយមានការព្រមានពីអាជ្ញាធររាជធានីមិនឱ្យមានការប្រមូលផ្តុំដោយខុសច្បាប់។
ប្រតិកម្មទៅនឹងភាពរឹងរូសរបស់កូដករដែលបន្តចេញធ្វើកូដកម្មមិនព្រមឈប់នោះអាជ្ញាធរក្រុងភ្នំពេញបានប្រកាសពិន័យប្រាក់ចន្លោះពី១លានរៀលទៅ៥លានរៀលចំពោះបុគ្គលណាដែលបំពានលើវិធានការសុខាភិបាលទប់ស្កាត់ជំងឺកូវីដ១៩ផងដែរ។
ដោយឡែករដ្ឋលេខាធិការនិងជាអ្នកនាំពាក្យក្រសួងយុត្តិធម៌លោក ជិន ម៉ាលីន បានច្រានចោលការអត្ថាធិប្បាយរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស អ្នកស្រី មីឆែល ប៉ាហ្សេលែត នៅក្នុងសំណុំរឿងនយោបាយដែលជាប់ពាក់ព័ន្ធនឹងការរឹតត្បិតលើសិទ្ធិនយោបាយរបស់គណបក្សប្រឆាំងធំមួយគឺគណបក្សសង្គ្រោះជាតិដែលត្រូវបានផាត់ចេញពីការបោះឆ្នោតកាលពីឆ្នាំ២០១៨។
លោកប្រាប់វីអូអេនៅថ្ងៃពុធយ៉ាងដូច្នេះថា៖ «ការលើកឡើងថាគោលការណ៍ប្រជាធិបតេយ្យសេរីពហុបក្សទាល់តែមានគណបក្សនេះចូលរួមគណបក្សនោះចូលរួមអាហ្នឹងគឺមិនត្រឹមត្រូវជាការរើសអើងនិងជាការមាក់ងាយទៅលើគណបក្សដទៃទៀត។សំខាន់ប្រជាធិបតេយ្យសេរីពហុបក្សពាក់ព័ន្ធដល់ដំណើរការនៃការរៀបចំការបោះឆ្នោតការចូលរួមរបស់គណបក្សនយោបាយហើយនិងការប្រើប្រាស់សិទ្ធិបោះឆ្នោតរបស់ប្រជាពលរដ្ឋ។អាហ្នឹងជារឿងសំខាន់មិនមែនសំខាន់តើគណបក្សនេះចូលគណបក្សនោះចូលនោះទេ»។
នាយករងទទួលបន្ទុកឃ្លាំមើលសិទ្ធិមនុស្សនៃអង្គការលីកាដូលោក អំ សំអាត យល់ថាការបោះឆ្នោតមួយអាចត្រូវបានចាត់ទុកថាគួរឱ្យជឿជាក់បានលុះត្រាតែមានការចូលរួមពីគ្រប់គណបក្សនយោបាយដោយស្មើភាពនៅចំពោះមុខច្បាប់សម្រាប់ការចូលរួមប្រកួតប្រជែងរកសំឡេងគាំទ្រពីប្រជាពលរដ្ឋ។ លោកថាការចេញមុខរបស់មន្ត្រីរដ្ឋបដិសេធការរិះគន់ខ្លួនមិនមែនជារឿងថ្មីនោះទេ។
លោកបន្ថែមថា៖ «អាហ្នឹងវាជារឿងដដែលដែលតំណាងរដ្ឋាភិបាលតែងតែធ្វើការបដិសេធ។ប៉ុន្តែអ្វីដែលសំខាន់គឺយើងដែលជាអង្គការសង្គមស៊ីវិលដែលធ្វើការផ្នែកសិទ្ធិមនុស្សយើងចង់ឃើញ ធ្វើម៉េចឱ្យកម្ពុជាយើងឱ្យមានការកែលម្អនៃស្ថានភាពសិទ្ធិមនុស្សនេះឱ្យអាចទទួលយកបាន»។
បើតាមលោក អំ សំអាត ស្ថានភាពសិទ្ធិមនុស្សនៅកម្ពុជាបានបន្តធ្លាក់ចុះចាប់តាំងពីឆ្នាំ២០២១រហូតមកដល់ដើមឆ្នាំ២០២២នៅពេលដែលមានការចាប់ខ្លួនជាបន្តបន្ទាប់នៃតំណាងសហជីពនិងកូដករដែលតវ៉ាជាមួយក្រុមហ៊ុនណាហ្គាវើលដ៍ដើម្បីរកដំណោះស្រាយចំពោះការបណ្តេញបុគ្គលិកទាំងបង្ខំកាលពីឆ្នាំ២០២១។
ក្នុងសំណុំរឿងកូដកម្មនៅក្រុមហ៊ុនណាហ្គាវើលដ៍នេះរដ្ឋមន្ត្រីក្រសួងមហាផ្ទៃលោកស ខេងបានធ្វើការកោះប្រជុំជាមួយរដ្ឋមន្ត្រីពាក់ព័ន្ធសំខាន់ៗមួយចំនួនរួមមានរដ្ឋមន្ត្រីក្រសួងយុត្តិធម៌ លោក កើត រិទ្ធ និងរដ្ឋមន្ត្រីក្រសួងការងារលោក អ៊ិត សំហេងដើម្បីពិភាក្សាបញ្ហាកូដកម្មដែលបានផ្ទុះឡើងនៅក្រុមហ៊ុនណាហ្គាវើលដ៍។ គេមិនទាន់ដឹងថាលទ្ធផលនៃកិច្ចពិភាក្សានឹងមានយ៉ាងណាទេខណៈការពិភាក្សានេះនឹងធ្វើឡើងនៅរសៀលថ្ងៃពុធនៅឯសាលារាជធានីភ្នំពេញ៕