នៅក្នុងការថ្លែងសុន្ទរកថាដំបូងបង្អស់របស់លោកទៅកាន់មហាសន្និបាតអង្គការសហប្រជាជាតិ ប្រធានាធិបតីសហរដ្ឋអាមេរិកលោក Donald Trump នឹងរិះគន់ខ្លាំងៗលើប្រទេសកូរ៉េខាងជើង អ៊ីរ៉ង់ និងវ៉េណេស៊ុយអេឡា។ នេះបើតាមការបញ្ជាក់របស់មន្ត្រីជាន់ខ្ពស់សេតវិមានមួយរូបដែលថ្លែងក្នុងលក្ខខណ្ឌមិនបញ្ចេញឈ្មោះ ប្រាប់ដល់អ្នកសារព័ត៌មាននានាអំពីចំណុចត្រួសៗនៃសុន្ទរកថារបស់លោក Trump។
នៅថ្ងៃអង្គារនេះ លោក Trump នឹងអំពាវនាវឲ្យសមាជិកនានានៃអង្គការសហប្រជាជាតិតតាំងជាមួយនឹងកូរ៉េខាងជើងពាក់ព័ន្ធនឹងកម្មវិធីអាវុធនុយក្លេអ៊ែរ និងគ្រាប់ផ្លោងមីស៊ីលរបស់ប្រទេសនេះ និងរារាំងកម្មវិធីទាំងនោះមុនពេលដែលយោធាកូរ៉េខាងជើងកាន់តែមានឥទ្ធិពលខ្លាំងក្លាគួរឲ្យខ្លាច។ នេះបើយោងតាមការប្រាប់ឲ្យដឹងរបស់មន្ត្រីដដែលនោះ។
មន្ត្រីរូបនោះបានបន្តទៀតថា លោក Trump ក៏នឹងថ្លែងផងដែរអំពីបញ្ហាអ៊ីរ៉ង់ និងស្ថានភាពតឹងតែងរវាងទិសដៅ និងគោលនយោបាយរបស់រដ្ឋាភិបាលអ៊ីរ៉ង់ ជាមួយនឹងការចង់បានរបស់ប្រជាពលរដ្ឋអ៊ីរ៉ង់។
លោក Trump បាននិយាយកាលពីថ្ងៃចន្ទម្សិលមិញថា សហរដ្ឋអាមេរិកនឹងដើរចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ដែលខ្លួនបានចុះហត្ថលេខាកាលពីឆ្នាំ ២០១៥ ជាមួយនឹងប្រទេសចំនួន ៥ ផ្សេងទៀត ប្រសិនបើរដ្ឋាភិបាលក្រុងវ៉ាស៊ីនតោនយល់ថា ទីភ្នាក់ងារថាមពលបរមាណូអន្តរជាតិរបស់អង្គការសហប្រជាជាតិមិនចាត់វិធានការឲ្យបានតឹងរ៉ឹងក្នុងការត្រួតពិនិត្យលើកិច្ចព្រមព្រៀងនុយក្លេអ៊ែរអ៊ីរ៉ង់នេះ។
កាលពីថ្ងៃចន្ទម្សិលមិញនេះដែរ ក្នុងរយៈពេលប៉ុន្មានម៉ោងក្រោយមក បន្ទាប់ពីពិសាអាហារពេលល្ងាចក្នុងលក្ខណៈការងារជាមួយមេដឹកនាំនៃបណ្ដាប្រទេសនានានៅតំបន់អាមេរិកឡាទីន លោក Trump ក៏បានថ្លែងផងដែរអំពីអស្ថិរភាពនយោបាយ និងសេដ្ឋកិច្ចនៅក្នុងប្រទេសវ៉េណេស៊ុយអេឡា៕