លោក Trump បានសន្យាបង្កើនការចាយវាយលើវិស័យការពារប្រទេស នៅពេលលោកបំពេញទស្សនកិច្ចនៅកន្លែងសង់នាវាមួយក្នុងរដ្ឋ Virginia កាលពី ថ្ងៃព្រហស្សតិ៍ដើម្បីទៅមើលនាវាចម្បាំងមួយគ្រឿងដែលមានតម្លៃច្រើនជាងគេបង្អស់។
លោកពាក់អាវយោធា និងមួកកន្តិប នៅពេលដែលលោកដើរមើលនាវា USS Gerald R. Ford ដែលមានតម្លៃ១ម៉ឺន២ពាន់៩រយលានដុល្លារ។ នាវានេះមានតម្លៃថ្លៃជាងគេបង្អស់ហើយត្រូវបានពន្យារពេលក្នុងការសាងសង់ ប៉ុន្តែត្រូវគេរំពឹងថានឹងអាចយកមកប្រើប្រាស់បាននៅចុងឆ្នាំនេះ។ លោក Trump បានប្រើប្រាស់ឱកាសដ៏សំខាន់នេះដើម្បីបង្ហាញនូវការសន្យាបង្កើនការចាយវាយក្នុងវិស័យយោធាយ៉ាងច្រើនដែលលោកបានធ្វើឡើងនៅសប្តាហ៍នេះ។
ក្នុងអំឡុងសុន្ទរកថាកាលពីយប់ថ្ងៃអង្គារទៅកាន់សភាអាមេរិកទាំងពីរ លោកបានថ្លែងថា «ដើម្បីធ្វើឲ្យប្រទេសអាមេរិកមានសុវត្ថិភាព យើងចាំបាច់ត្រូវតែផ្តល់ជូនបុរស និងស្រ្តីក្នុងកងយោធាសរអានូវឧបករណ៍ដែលពួកគេត្រូវការដើម្បីរារាំងសង្គ្រាម»។
លោកប្រធានាធិបតីថ្លែងទៀតថា យើងសង្ឃឹមថានឹងមិនត្រូវការប្រើប្រាស់នាវានេះទេ ប៉ុន្តែបើយើងត្រូវការប្រើ ពួកសត្រូវច្បាស់ជាជួបនឹងបញ្ហាធំជាមិនខាន៕