សន្និបាតជាតិរបស់គណបក្សសាធារណរដ្ឋនៅសហរដ្ឋអាមេរិក នឹងចាប់ផ្តើមធ្វើឡើងនៅថ្ងៃចន្ទនេះ ដោយពួកអ្នកគាំទ្រគណបក្សមានគម្រោងតែងតាំងលោកប្រធានាធិបតី Donald Trump សម្រាប់អាណត្តិទី ២ ហើយលោក Trump ផ្ទាល់នឹងថ្លែងសុន្ទរកថា ៤ យប់ជាប់ៗគ្នានៅក្នុងសន្និបាតនេះ។
កាលពីសប្តាហ៍មុន សមាជិកគណបក្សប្រជាធិបតេយ្យដែលមានការប្រយ័ត្នប្រយែងនៅក្នុងការជួបជុំគ្នាទ្រង់ទ្រាយធំក្នុងអំឡុងពេលនៃការឆ្លងរាតត្បាតជំងឺកូវីដ១៩ នេះ បានតែងតាំងលោក Joe Biden ជាបេក្ខជនប្រធានាធិបតីនៅឯសន្និបាតជាតិរបស់គណបក្សដែលបានធ្វើឡើងតាមអនឡាញ។
សមាជិកគណបក្សសាធារណរដ្ឋកំពុងរៀបចំគម្រោងផ្សេងពីនេះ ដោយពួកគេនឹងជួបជុំគ្នានៅថ្ងៃច័ន្ទនេះនៅទីក្រុង Charlotte រដ្ឋ North Carolina។ លោកប្រធានាធិបតី Trump ត្រូវគេរំពឹងថានឹងទៅដល់ទីក្រុង Charlotte នៅរសៀលថ្ងៃច័ន្ទនេះ ដោយនៅពេលនោះ ប្រតិភូនឹងតែងតាំងលោកជាផ្លូវការជាបេក្ខជនប្រធានាធិបតីខាងគណបក្សសាធារណរដ្ឋ។
ចាប់ពីថ្ងៃអង្គារស្អែករហូតដល់ថ្ងៃព្រហស្បតិ៍ សកម្មភាពភាគច្រើននៃសន្និបាតនេះនឹងធ្វើឡើងនៅក្នុងរដ្ឋធានីវ៉ាស៊ីនតោន។ លោកប្រធានាធិបតី Trump មានគម្រោងថ្លែងសុន្ទរកថាទទួលយកការតែងតាំងនេះនៅសេតវិមាននៅយប់បញ្ចប់នៃសន្និបាត ដែលនឹងបញ្ចប់ទៅដោយមានការបាញ់កាំជ្រួច។
ក្រុមប្រតិភូនៅក្នុងទីក្រុង Charlotte រដ្ឋ North Carolina តម្រូវឱ្យមានការពិនិត្យកម្តៅក្នុងខ្លួនជាប្រចាំនិងធ្វើតេស្តរកជំងឺកូវីដ១៩ ជារៀងរាល់ថ្ងៃ។ ប្រតិភូទាំងអស់តម្រូវឱ្យធ្វើតេស្តមុនពេលពួកគេចេញដំណើរពីរដ្ឋរបស់ខ្លួន ហើយនៅពេលចូលរួមសន្និបាតនេះ ប្រតិភូទាំងនោះនឹងពាក់ឧបករណ៍ដែលអាចតាមដានមើលថាតើពួកគេនឹងប្រាស្រ័យទាក់ទងជាមួយអ្នកណាខ្លះ៕