ការបិទផ្នែកខ្លះនៃរដ្ឋាភិបាលសហរដ្ឋអាមេរិកមិនមានពន្លឺថានឹងមានដំណោះស្រាយទេ ដោយសារលោកប្រធានាធិបតី Donald Trump បានអះអាងកាលពីថ្ងៃអង្គារថា ការបិទរដ្ឋាភិបាលនឹងបន្តរហូតដល់លោកទទួលបានថវិកាដែលនៅសេសសល់សម្រាប់សាងសង់ជញ្ជាំងព្រំដែនអាមេរិកនិងម៉ិកស៊ិក។
លោកថ្លែងនៅការិយាល័យប្រធានាធិបតីថា «ខ្ញុំមិនអាចប្រាប់អ្នកបានទេថា តើនៅពេលណារដ្ឋាភិបាលនឹងបើកវិញ។ ខ្ញុំអាចប្រាប់អ្នកថា រដ្ឋាភិបាលនឹងមិនបើកវិញទេ រហូតដល់យើងមានជញ្ជាំង ឬរបង»។
លោកថ្លែងដូច្នេះបន្ទាប់ពីធ្វើសន្និសីទសារគមនាគមន៍វីដេអូ video conference មួយជាមួយកងទ័ពអាមេរិកដែលឈរជើងនៅឯនាយសមុទ្រ។
លោក Trump បានអះអាងថា បុគ្គលិកសហព័ន្ធរាប់រយពាន់នាក់ដែលត្រូវផ្អាកការងារដោយសារតែការបិទនេះ ក៏ចង់បានជញ្ជាំងដែរថ្វីបើខ្វះភ័ស្តុតាងគាំទ្រការអះអាងនេះក៏ដោយ។
កាលពីថ្ងៃចន្ទលោក Trump បានអះអាងថា គណបក្សប្រជាធិបតេយ្យត្រូវតែបញ្ចប់«ការប្រឈមមុខដាក់គ្នា» រីឯមេដឹកនាំប្រជាធិបតេយ្យក្នុងសភាបានស្តីបន្ទោសថា «Trump បានធ្វើឱ្យប្រទេសធ្លាក់ចូលក្នុងភាពវឹកវរ»៕