ផ្សារភាគហ៊ុននៅក្នុងប្រទេសជប៉ុន និងចិនបានធ្លាក់ចុះយ៉ាងខ្លាំងនៅថ្ងៃអង្គារនេះ បន្ទាប់ពីមានការលក់ភាគហ៊ុនចេញកាលពីថ្ងៃចន្ទម្សិលមិញនៅទីផ្សារភាគហ៊ុនសហរដ្ឋអាមេរិក។
សន្ទស្សន៍ភាគហ៊ុន Nikkei ធ្លាក់ចុះប្រហែល ៥ ភាគរយ។ រីឯសន្ទស្សន៍ភាគហ៊ុន Shanghai Composite Index វិញ ធ្លាក់ចុះប្រហែល ២ ភាគរយ។
នៅក្នុងការទិញលក់ភាគហ៊ុនកាលពីថ្ងៃចន្ទម្សិលមិញ សន្ទស្សន៍ភាគហ៊ុន S&P 500 ធ្លាក់ចុះជាង ២ ភាគរយ ហើយសន្ទស្សន៍ភាគហ៊ុន Dow ធ្លាក់ចុះជិត ៣ ភាគរយ។
ប្រធានាធិបតីអាមេរិកលោក Donald Trump បានរិះគន់ធនាគារកណ្ដាលរបស់សហរដ្ឋអាមេរិក ថាជាអ្នកធ្វើឲ្យទីផ្សារភាគហ៊ុនធ្លាក់ចុះ និងធ្វើឲ្យមានបញ្ហាសេដ្ឋកិច្ចផ្សេងទៀត។
នៅក្នុងសារតាម Twitter លោក Trump បាននិយាយថា បញ្ហាសេដ្ឋកិច្ចតែមួយគត់របស់សហរដ្ឋអាមេរិក គឺការដំឡើងការប្រាក់។ លោកបានចោទប្រកាន់លោក Jerome Powell ប្រធានធនាគារកណ្ដាលសហរដ្ឋអាមេរិក ថាមិនយល់ពីទីផ្សារ និងបានធ្វើឲ្យប៉ះពាល់ដល់សេដ្ឋកិច្ច ដោយសារការដំឡើងការប្រាក់។
នៅក្នុងអំឡុងពេលមានវិបត្តិសេដ្ឋកិច្ចដែលបានចាប់ផ្ដើមនៅក្នុងឆ្នាំ ២០០៧ ធនាគារកណ្ដាលអាមេរិកបានបន្ថយការប្រាក់ចម្បងរហូតដល់ជិតសូន្យភាគរយ ដើម្បីជំរុញការរីកចម្រើនសេដ្ឋកិច្ច។ ធនាគារកណ្ដាលសហរដ្ឋអាមេរិកបានរក្សាអត្រាការប្រាក់ឲ្យនៅទាបអស់រយៈពេលជាច្រើនឆ្នាំ។
ជាលទ្ធផល សេដ្ឋកិច្ចក៏បានរីកចម្រើនឡើងវិញ ហើយអត្រាគ្មានការងារធ្វើបានធ្លាក់ចុះទាបបំផុតនៅក្នុងរយៈពេល ៤៩ ឆ្នាំចុងក្រោយនេះ ជាហេតុធ្វើឲ្យមន្ត្រីធនាគារកណ្ដាលគិតថា វិធានការបញ្ចុះការប្រាក់ដើម្បីឲ្យសេដ្ឋកិច្ចរីកចម្រើននេះលែងត្រូវការទៀតហើយ។ ដូច្នេះ ថ្នាក់ដឹកនាំធនាគារកណ្ដាលបានសម្រេចដំឡើងការប្រាក់ជាបន្តបន្ទាប់ឡើងវិញ ដោយសារតែពួកគេព្រួយបារម្ភថា ការជំរុញឲ្យសេដ្ឋកិច្ចរីកចម្រើនច្រើនជ្រុលអាចបណ្ដាលឲ្យមានអតិផរណា៕
