នៅចន្លោះឆ្នាំ ១៩៨៥ និងឆ្នាំ ១៩៩៤ អាជីវកម្មរបស់ប្រធានាធិបតីអាមេរិកបច្ចុប្បន្នលោក Donald Trump បានខាតបង់ថវិកាជាង ១ ពាន់លានដុល្លារ ដោយធ្វើឲ្យលោកអាចមិនបង់ពន្ធសហព័ន្ធអស់រយៈពេល ៨ ឆ្នាំ ក្នុងចន្លោះពេល ១០ ឆ្នាំនោះ។ នេះបើយោងតាមសេចក្ដីរាយការណ៍របស់កាសែត The New York Times កាលពីថ្ងៃអង្គារម្សិលមិញ។
លោក Trump បានបង្ហាញខ្លួនលោកថាជា សហគ្រិនដ៏ជោគជ័យ និងជាអ្នកចរចាដ៏ស្ទាត់ជំនាញ។
ប៉ុន្តែលោកបានខាតបង់ថវិកាពីមួយឆ្នាំទៅមួយឆ្នាំជាងពលរដ្ឋអាមេរិកាំងដែលបង់ពន្ធប្រាក់ចំណូលជូនរដ្ឋទាំងអស់។ នេះបើយោងតាមការផ្សាយរបស់កាសែត The New York Times។ កាសែតនេះរាយការណ៍អំពីរឿងនេះដោយប្រើព័ត៌មានដែលផ្ដល់ឲ្យដោយអ្នកដែលមានសិទ្ធិមើលឯកសារប្រកាសពន្ធរបស់លោក Trump។
ថវិកាដែលខាតបង់របស់លោក Trump នៅក្នុងអំឡុងពេលនោះ គឺបានមកពីអាជីវកម្មចម្បងរបស់លោក ដែលក្នុងនោះមានដូចជាអាជីវកម្មសណ្ឋាគារ កាស៊ីណូ និងកន្លែងអាជីវកម្មលក់រាយនៅក្នុងអាគារស្នាក់នៅ។
ការខាតបង់ទាំងនោះក៏មានបញ្ចូលផងដែរនូវការវិនិយោគមិនបានជោគជ័យលើក្រុមហ៊ុនអាកាសចរណ៍លើក្រុមបាល់ឱបអាមេរិកាំង និងគម្រោងអភិវឌ្ឍអចលនទ្រព្យដែលមិនទាន់បញ្ចប់រួចរាល់ជាដើម។
បើយោងតាមកាសែត The New York Times លោក Trump នៅតែអាចរស់នៅក្នុងជីវិតដ៏ប្រសើរអស្ចារ្យនៅពេលនោះ ដោយសារតែថវិកាភាគច្រើនរបស់លោកគឺបានមកពីធនាគារ និងវិនិយោគិនដែលវិនិយោគនៅក្នុងអាណាចក្រអាជីវកម្មរបស់លោក ក៏ដូចជាទ្រព្យសម្បត្តិរបស់ឪពុករបស់លោក។
ប៉ុន្តែវាបានបង្ហាញថា លោក Trump មិនបានរំលោភច្បាប់សហព័ន្ធណាមួយទេ ដោយសារតែច្បាប់ពន្ធដារសហរដ្ឋអាមេរិកអនុញ្ញាតឲ្យពលរដ្ឋកាត់កងថវិកាដែលខាតបង់ច្រើនក្នុងអាជីវកម្មពីពន្ធលើប្រាក់ចំណូលរបស់ពួកគេ៕