នៅថ្ងៃពុធនេះ នាយករដ្ឋមន្ត្រីចក្រភពអង់គ្លេសអ្នកស្រី Theresa May បានទទួលស្វាគមន៍ប្រធានាធិបតីសហរដ្ឋអាមេរិកលោក Donald Trump ក៏ដូចជាមេដឹកនាំ និងអ្នកតំណាងផ្សេងៗទៀតមកពីប្រទេសចំនួន ១៤ នៅក្នុងទិវា D-Day នៅក្នុងទីក្រុង Portsmouth ភាគខាងត្បូងចក្រភពអង់គ្លេស។
ការិយាល័យរបស់អ្នកស្រី May បានចេញសេចក្ដីប្រកាសមួយលើកឡើងអំពីទិវា D-Day ដែលជា «កិច្ចសហប្រតិបត្តិការអន្តរជាតិជាប្រវត្តិសាស្ត្រ» នេះ។ ទិវានេះរំឭកដល់មហាប្រតិបត្តិការពង្រាយទ័ពនៅតំបន់ Normandy ប្រទេសបារាំង នៃច្រកសមុទ្រ English Channel ដើម្បីកម្ចាត់ពួក Nazi អាល្លឺម៉ង់នៅសម័យសង្គ្រាមលោកលើកទីពីរ។
អ្នកស្រី May បាននិយាយថា៖ «ស្របពេលដែលយើងរួមគ្នាសម្ដែងនូវការដឹងគុណចំពោះ [កងកម្លាំងសម្ព័ន្ធមិត្ត] ដែលភាពក្លាហាន និងការពលីរបស់ពួកគេនៅឯឆ្នេរសមុទ្រនៃតំបន់ Normandy បានបង្ហាញអំពីចំណុចរបត់នៅក្នុងសម័យសង្គ្រាមលោកលើកទីពីរ ពួកយើងសន្យាថានឹងមិនបំភ្លេចគុណរបស់ពួកគេនោះទេ។ សាមគ្គីភាព និងការប្ដេជ្ញារបស់ពួកគេនៅក្នុងការការពារសេរីភាពរបស់ពួកយើងគឺនៅតែជាមេរៀនសម្រាប់យើងទាំងអស់គ្នាដដែល»។
ព្រះមហាក្សត្រីយានី Elizabeth នៃចក្រភពអង់គ្លេស ក៏បានយាងចូលរួមនៅក្នុងពិធីនោះដែរ។
គម្រោងរបស់លោក Trump នៅថ្ងៃពុធនេះ មានដូចជាការជួបពិភាក្សាបន្ថែមជាមួយនឹងទាហានអាមេរិកាំង មុនពេលលោកធ្វើដំណើរបន្តទៅកាន់ប្រទេសអៀរឡង់ ដើម្បីជួបពិភាក្សាជាមួយនាយករដ្ឋមន្ត្រីអៀរឡង់លោក Leo Varadkar។
កាលពីថ្ងៃអង្គារម្សិលមិញ លោក Trump បានបញ្ជាក់ថា សហរដ្ឋអាមេរិកប្ដេជ្ញាសម្រេចឲ្យបាននូវ «កិច្ចព្រមព្រៀងពាណិជ្ជកម្មដ៏អស្ចារ្យ» មួយ ជាមួយអង់គ្លេស ស្របពេលដែលអង់គ្លេសត្រៀមចាកចេញពីសហភាពអឺរ៉ុប៕