ប្រធានាធិបតីអាមេរិកលោក Donald Trump កំពុងទាមទារឲ្យរដ្ឋាភិបាលស៊ីរី រុស្ស៊ី និងអ៊ីរ៉ង់ បញ្ឈប់ការទម្លាក់គ្រាប់បែកលើខេត្ត Idlib នៃប្រទេសស៊ីរី។
លោក Trump បានបញ្ជាក់នៅលើ Twitter កាលពីល្ងាចថ្ងៃអាទិត្យម្សិលមិញថា ការទម្លាក់គ្រាប់បែកនេះបាន «សម្លាប់ជនស៊ីវិលធម្មតាជាច្រើនដោយមិនរើសមុខ»។ លោកបានសរសេរបន្តថា៖ «ពិភពលោកកំពុងតាមដានមើលការវាយប្រហារគ្នានេះ។ តើវាយប្រហារគ្នាដើម្បីអ្វី? តើអ្នកបានអ្វីពីការវាយប្រហារគ្នានេះ? បញ្ឈប់ការវាយប្រហារគ្នាទៅ!»។
នៅក្នុងការបញ្ជាក់ប្រាប់អ្នកកាសែតនៅសេតវិមានកាលពីថ្ងៃអាទិត្យម្សិលមិញ លោក Trump ក៏បានលើកឡើងផងដែរ អំពីការអំពាវនាវរបស់លោកកាលពីឆ្នាំមុនឲ្យប្រទេសស៊ីរី និងសម្ព័ន្ធមិត្តរបស់ស៊ីរីធ្វើយ៉ាងណាជៀសមិនឲ្យវាយប្រហារខ្លាំងក្លានៅក្នុងខេត្ត Idlib ដោយសារតែមានការព្រួយបារម្ភផ្នែកមនុស្សធម៌។
ប្រធានាធិបតីរុស្ស៊ីលោក Vladimir Putin ក៏បានលើកឡើងអំពីគំនិតស្រដៀងគ្នានេះដែរកាលពីចុងខែមេសាកន្លងទៅនេះ ប៉ុន្តែ រដ្ឋាភិបាលរបស់លោកក៏បានព្រមានផងដែរថា វត្តមានរបស់ជនសកម្មប្រយុទ្ធនៅក្នុងខេត្ត Idlib កំពុងបំផ្លាញដល់កិច្ចប្រឹងប្រែងដើម្បីបញ្ចប់ជម្លោះរយៈពេល ៨ ឆ្នាំនៅក្នុងប្រទេសស៊ីរី។
ខេត្ត Idlib ស្ថិតនៅភាគពាយ័ព្យប្រទេសស៊ីរីជាប់ព្រំដែនប្រទេសតួកគី។ ខេត្តនេះគឺជាផ្នែកសំខាន់ចុងក្រោយនៃប្រទេសស៊ីរីដែលនៅតែគ្រប់គ្រងដោយពួកឧទ្ទាម ដែលព្យាយាមទម្លាក់ប្រធានាធិបតីស៊ីរីលោក Bashar al-Assad ពីតំណែង។
ក្រុមពួកឧទ្ទាមដែលនៅកាន់កាប់ខេត្ត Idlib នេះ កន្លងមកបានបដិសេធមិនព្រមចុះចាញ់។ ដូចដែលលោក Trump បានបញ្ជាក់អ៊ីចឹង កងកម្លាំងស៊ីរី និងរុស្ស៊ី និងមួយផ្នែកតូចកងកម្លាំងអ៊ីរ៉ង់ បានបង្កើនការទម្លាក់គ្រាប់បែក និងការវាយប្រហារដោយគ្រាប់រ៉ុក្កែតយ៉ាងខ្លាំងក្លាលើខេត្ត Idlib៕
