លោក Donald Trump បេក្ខជនប្រធានាធិបតីស.រ.អាខាងគណបក្សសាធារណរដ្ឋបានឋិតនៅក្នុងរឿងចម្រូងចម្រាសមួយកាលពីថ្ងៃអាទិត្យ បន្ទាប់ពីលោកបាននិយាយថា ការដែលលោកបានបង្កើតការងាររាប់ពាន់ជា «ពលិកម្ម»មួយ បើប្រៀបធៀបនឹងការស្លាប់នៃទាហានអាមេរិកាំងកាន់សាសនាឥស្លាមម្នាក់ ដែលត្រូវបានសម្លាប់នៅក្នុងការប្រយុទ្ធគ្នាក្នុងប្រទេសអ៊ីរ៉ាក់។
លោក Khizr Khan ដែលជាឪពុករបស់លោកអនុសេនីយ៍ឯក Humayun Khan នៃកងទ័ពជើងគោកស.រ.អាបាននិយាយប្រាប់បណ្តាញទូរទស្សន៍អាមេរិកាំងCNN ថា លោក Trump «មិនសក្តិសមជាអ្នកដឹកនាំប្រទេសនេះជាដាច់ខាត»។
លោក Khan ដែលជាជនអន្តោប្រវេសន៍ប៉ាគីស្ថានបាននិយាយនៅក្នុងសុន្ទរកថាមួយប្រកបដោយការរំជួលចិត្តនៅក្នុងមហាសន្និបាតជាតិនៃគណបក្សប្រជាធិបតេយ្យកាលពីសប្តាហ៍មុនថា គ្រួសារលោកមិនត្រូវអនុញ្ញាតឲ្យធ្វើចំណាកស្រុកមកកាន់ស.រ.អាជាដាច់ខាតតាមរយៈគោលនយោបាយអន្តោប្រវេសន៍របស់លោក Trump។ លោក Khan បានថ្លែងថា នៅក្នុងមួយជីវិតរបស់លោក លោក Trump មិនបាន «ធ្វើពលិកម្មអ្វីឡើយ និងមិនបានធ្វើពលិកម្មនរណាម្នាក់ទេ»។
នៅក្នុងសេចក្តីសម្ភាសន៍មួយដែលបានត្រូវផ្សាយកាលពីថ្ងៃអាទិត្យក្នុងកម្មវិធី ABC News លោក Trump បាននិយាយថា «ខ្ញុំយល់ថាខ្ញុំបានធ្វើពលិកម្មច្រើន។ខ្ញុំឧស្សាហ៍ធ្វើការណាស់ «ដោយបានបង្កើត» ការងាររាប់ពាន់។ ខ្ញុំគិតថា ទាំងនេះជាពលិកម្ម ពីព្រោះខ្ញុំអាចឲ្យមនុស្សរាប់ពាន់នាក់មានការងារធ្វើ គិតគូរអំពីការសិក្សាអប់រំរបស់ពួកគេ គិតគូរអំពីកិច្ចការច្រើន»។
បេក្ខជនប្រធានាធិបតីខាងគណបក្សសាធារណរដ្ឋរូបនេះបានសួរថាហេតុដូចម្តេចបានជាភរិយាលោក Khan គឺអ្នកស្រី Ghazala ឈរនៅជិតប្តីអ្នកស្រីនៅពេលលោកនិយាយទៅកាន់មហាសន្និបាត ហើយអ្នកស្រីមិននិយាយអ្វីសោះ ដោយលោកបានថ្លែងថាក្នុងឋានៈជាស្ត្រីម្នាក់កាន់សាសនាឥស្លាម «ប្រហែលជាអ្នកស្រីមិនបានត្រូវអនុញ្ញាតឲ្យនិយាយអ្វីសោះឡើយ»។
គូប្រជែងរបស់លោក Trump នៅក្នុងការបោះឆ្នោតជាតិក្នុងខែវិច្ឆិកាខាងមុខនេះគឺលោកស្រីអតីតរដ្ឋមន្ត្រីការបរទេសស.រ.អា Hillary Clinton បានមានប្រសាសន៍ប្រាប់ការជួបជុំមួយកាលពីថ្ងៃសៅរ៍នៅក្នុងរដ្ឋ Ohio នាតំបន់កណ្តាលខាងលិចនៃប្រទេសអាមេរិកថា លោក Trump «បានវាយប្រហារដោយពាក្យសម្តីលើឪពុកដ៏ថ្លៃថ្នូររបស់ទាហានម្នាក់ដែលបានពលីជីវិតរបស់លោកដើម្បីកងឯកភាពរបស់លោកគឺលោកអនុសេនីយ៍ឯក Khan»។ កាលពីពេលមុននោះលោកស្រីបានមានប្រសាសន៍ថា លោកស្រី«រំជួលចិត្តណាស់ដោយឃើញអ្នកស្រី Ghazala Khan ឈរដោយក្លាហាននិងប្រកបដោយសេចក្តីថ្លៃថ្នូរក្នុងការគាំទ្រកូនប្រុសអ្នកស្រី» នៅលើវេទិកានៃមហាសន្និបាត។
លោក Paul Rieckoff អ្នកបង្កើតអង្គការក្រុមទាហានជើងចាស់អាមេរិកាំងក្នុងសង្គ្រាមអ៊ីរ៉ាក់និងអាហ្វហ្គានីស្ថានបាននិយាយថា ការដែលលោកTrump ប្រៀបធៀប «ពលិកម្ម» របស់លោកក្នុងការបង្កើតការងារទៅនឹងនរណាម្នាក់ ដែលបានបាត់បង់កូនប្រុសម្នាក់ក្នុងការប្រយុទ្ធក្នុងប្រទេសអ៊ីរ៉ាក់ «ជាការប្រមាថមើលងាយ ចោលម្សៀត និងល្ងង់ខ្លៅ»៕