ពីរថ្ងៃផ្ទួនៗគ្នា លោកប្រធានាធិបតីសហរដ្ឋអាមេរិក Donald Trump បានប្រកាសប្រឆាំងពួកអន្តោប្រវេសន៍ខុសច្បាប់ ដែលបានឆ្លងចូលមកក្នុងសហរដ្ឋអាមេរិក តាមព្រំដែនភាគខាងត្បូងជាមួយនឹងប្រទេសម៉ិកស៊ិក ដោយលោកបានអះអាងថា ពួកជនអន្តោប្រវេសន៍ទាំងនោះបានកេងប្រវ័ញ្ជផលប្រយោជន៍ពីសហរដ្ឋអាមេរិក។
លោកបានត្អូញត្អែរអំពីចំនួនមនុស្សប្រហែល១១០០នាក់ដែលបានដើរឆ្ពោះទៅទិសខាងជើងឆ្លងកាត់តាមប្រទេសម៉ិកស៊ិក ដើម្បីគេចចេញពីភាពក្រីក្រនិងអំពើហិង្សានៅក្នុងតំបន់អាមេរិកកណ្តាល ដោយមានបំណងស្វែងរកសិទ្ធិជ្រកកោននៅក្នុងសហរដ្ឋអាមេរិក។ លោកបានបង្ហោះសារនៅលើ Twitter ថា «ប្រទេសម៉ិកស៊ិកមានអំណាចគ្រប់គ្រាន់ដើម្បីទប់ស្កាត់កុំឲ្យមនុស្សទាំងនោះចូលទៅក្នុងប្រទេសរបស់ពួកគេ។ ពួកគេត្រូវតែរារាំងមនុស្សទាំងនោះនៅច្រកព្រំដែនភាគខាងជើង ដែលពួកគេអាចធ្វើបានតាមរយៈច្បាប់ព្រំដែនដែលមានប្រសិទ្ធភាពរបស់ខ្លួន ដើម្បីកុំឲ្យមនុស្សទាំងនោះអាចឆ្លងចូលមកក្នុងសហរដ្ឋអាមេរិក ដែលច្បាប់ព្រំដែនគ្មានប្រសិទ្ធភាពនោះ។
តាមរយៈសារនៅក្នុង Twitter របស់លោកកាលពីថ្ងៃចន្ទ លោកបាននិយាយថា «សភាត្រូវតែអនុម័តច្បាប់ព្រំដែនជាបន្ទាន់ ដើម្បីបញ្ឈប់ការហូរចូលថ្នាំញៀន និងពួកជនអន្តោប្រវេសន៍ខុសច្បាប់ទាំងនោះ»។ លោកបាននិយាយថាប្រទេសម៉ិកស៊ិកបានទទួលផលប្រយោជន៍ពីកិច្ចព្រមព្រៀងពាណិជ្ជកម្មសេរីនៅក្នុងតំបន់អាមេរិកខាងជើង ដែលបានបង្កើតឡើងកាលពីឆ្នាំ១៩៩៤ រវាងសហរដ្ឋអាមេរិកនិងកាណាដាដែលនាពេលបច្ចុប្បន្នកំពុងតែធ្វើការចរចាឡើងវិញ៕