ប្រធានាធិបតីសហរដ្ឋអាមេរិកលោក Donald Trump និងលោក Joe Biden ដែលជាគូប្រជែងរបស់លោកខាងគណបក្សប្រជាធិបតេយ្យ បានធ្វើយុទ្ធនាការឃោសនាបោះឆ្នោតកាលពីថ្ងៃអាទិត្យម្សិលមិញនៅក្នុងរដ្ឋដែលមានការប្រជែងខ្លាំងមួយចំនួន នៅមុនការបោះឆ្នោតចូលមកដល់នៅថ្ងៃទី ៣ ខែវិច្ឆិកាខាងមុខ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Associated Press។
លោក Trump បានចាប់ផ្តើមយុទ្ធនាការរបស់លោកនៅក្នុងរដ្ឋ Nevada ដោយទៅវិហារគ្រិស្តសាសនា មុនពេលចូលរួមក្នុងពិធីរៃអង្គាសថវិកា និងពិធីជួបជុំឃោសនាបោះឆ្នោតនៅពេលល្ងាចនៅក្នុងទីក្រុង Carson City។ រដ្ឋ Nevada ដែលត្រូវបានគេចាត់ទុកថា ជារដ្ឋដែលមានការប្រជែងខ្លាំងមួយ មិនបានគាំទ្របេក្ខជនគណបក្សសាធារណរដ្ឋចាប់តាំងពីឆ្នាំ ២០០៤ មក។
ការជួបជុំនោះ បានទាក់ទាញអ្នកគាំទ្ររាប់ពាន់នាក់ដែលអង្គុយកៀកៗគ្នា ស្រែកអបអរសាទរលោក Trump និងស្រែកសម្តែងការមិនពេញចិត្តចំពោះលោក Biden និងសារព័ត៌មាន។ អ្នកចូលរួមភាគច្រើនមិនពាក់ម៉ាស់ដើម្បីការពារជំងឺកូវីដ១៩ ទេ ថ្វីបើករណីឆ្លងនៅក្នុងរដ្ឋនោះកំពុងកើនឡើងក៏ដោយ។
លោកប្រធានាធិបតី Trump បានព្រមានថា ប្រសិនបើលោក Biden ឈ្នះការបោះឆ្នោត នោះនឹងនាំឲ្យមានការបិទសកម្មភាពសង្គមបន្ថែមទៀត ហើយពេលខ្លះលោកបានរិះគន់លោក Biden ដែលនិយាយថា នឹងស្តាប់តាមការណែនាំរបស់អ្នកវិទ្យាសាស្ត្រ។
លោក Biden ដែលជាគ្រិស្តសាសនិកនិកាយកាតូលិក បានចូលរួមនៅក្នុងពិធីសាសនានៅក្នុងរដ្ឋ Delaware មុនពេលធ្វើយុទ្ធនាការនៅក្នុងរដ្ឋ North Carolina ដែលនៅទីនោះ គណបក្សប្រជាធិបតេយ្យមិនបានឈ្នះនៅក្នុងការបោះឆ្នោតប្រធានាធិបតីចាប់តាំងពីសម័យលោក Barack Obama នៅឆ្នាំ ២០០៨ មក។
បេក្ខជនទាំងពីរ កំពុងព្យាយាមទាក់ទាញការគាំទ្រនៅក្នុងរដ្ឋទាំងនោះដែលអាចជួយពួកគេឲ្យឈានឆ្ពោះទៅកាន់ជ័យជម្នះ។
លោក Biden មានប្រៀបច្រើនជាងលោក Trump នៅក្នុងការស្ទង់មតិថ្នាក់ជាតិ ប៉ុន្តែសម្រាប់បណ្តារដ្ឋដែលមានការប្រជែងខ្លាំងវិញ លោកនាំមុខលោក Trump បន្តិចបន្ដួចតែប៉ុណ្ណោះ៕