កាសែត New York Times របស់អាមេរិកបានរាយការណ៍នៅថ្ងៃពុធថា ថ្វីបើប្រធានាធិបតីសហរដ្ឋអាមេរិក Donald Trump មិនបានជួបពិភាក្សាដេញដោលគ្នាដោយទល់មុខ ជាមួយគូប្រជែងរបស់លោក គឺលោក Joe Biden នៅរាត្រីថ្ងៃព្រហស្បតិ៍ ដូចដែលបានត្រៀមទុកពីដំបូងមកនោះក៏ដោយ ក៏បេក្ខជនទាំងពីរនៅតែធ្វើការតទល់គ្នាឆ្លើយសំណួរដូចទល់មុខគ្នាដែរ ក្នុងព្រឹត្តិការណ៍ដាច់ដោយឡែកពីគ្នាក្នុងយប់តែមួយ។
សារព័ត៌មាននេះផ្សាយឲ្យដឹងថា ទូរទស្សន៍ NBC បានបញ្ជាក់នៅថ្ងៃពុធថា ខ្លួននឹងផ្សព្វផ្សាយព្រឹត្តិការណ៍ជួបប្រជុំរបស់លោក Trump ជាលក្ខណៈវេទិកាសាធារណៈ ឬហៅថា town hall ក្នុងម៉ោងផ្សាយសំខាន់របស់ខ្លួន នៅថ្ងៃព្រហស្បតិ៍ វេលាម៉ោង៨យប់ ម៉ោងក្នុងសហរដ្ឋអាមេរិក ពីទីក្រុង Miami រដ្ឋ Florida ដែលត្រូវនឹងម៉ោង៧ព្រឹកថ្ងៃសុក្រម៉ោងក្នុងប្រទេសកម្ពុជា។ លោក Trump នឹងទទួលឆ្លើយសំណួរពីអ្នកបោះឆ្នោតក្នុងរដ្ឋ Florida នៅក្នុងពិធីនោះ។
កិច្ចប្រជុំរបស់លោក Trump នេះ បានធ្វើឡើងចំពេលតែមួយផងដែរ ជាមួយគូប្រជែងរបស់លោក គឺលោក Joe Biden ដែលបានគ្រោងទុករួចហើយជាមួយទូរទស្សន៍ ABC ដែលថានឹងផ្សាយផ្ទាល់នូវកម្មវិធីប្រហាក់ប្រហែលគ្នានេះ ចេញពីទីក្រុង Philadelphia រដ្ឋ Pennsylvania ដែលចាប់ផ្តើមក្នុងពេលដំណាលគ្នានោះ។
ការជួបប្រជុំរបស់លោក Biden ក្នុងលក្ខណៈជាវេទិកាសាធារណៈ town hall នេះ ត្រូវបានកក់ទុកតាំងពីសប្តាហ៍មុនម្ល៉េះ ក្រោយពីលោកត្រាំ ដែលពេលថ្មីៗនេះបានឆ្លងជំងឺកូវីដ១៩ បដិសេធមិនចូលរួមការពិភាក្សាដេញដោលជាលើកទី២តាមប្រព័ន្ធអនឡាញនោះ ដែលនេះបានធ្វើឲ្យការជួបជាលើកទី២នោះ ត្រូវបានគេលុបចោល។
ទាំងលោក Biden និងលោក Trump ក្នុងសប្តាហ៍នេះកំពុងធ្វើការឃោសនានៅតាមបណ្តារដ្ឋដែលអាចមាននិន្នាការនយោបាយអាចប្រែប្រួលដូចជារដ្ឋ Florida និង Pennsylvania៕
