លោកប្រធានាធិបតីដូណាល់ត្រាំកាលពីថ្ងៃព្រហស្បតិ៍បានហៅព្រឹត្តិការណ៍នៃចំនួនអ្នកស្លាប់ពីជំងឺកូវីដ១៩នៅសហរដ្ឋអាមេរិកដែលបានកើនលើស១០០.០០០នាក់ថាជាដំណាក់កាលដ៏គួរឲ្យសោកសៅយ៉ាងខ្លាំង។
កាលពីដើមឆ្នាំនេះ លោកប្រធានាធិបតីតែងបានមើលស្រាលការគំរាមកំហែងពីវីរុសកូរ៉ូណាដែលបង្កជំងឺកូវីដ១៩ ដោយលោកអះអាងពេលនោះថាចំនួនករណីឆ្លងវីរុសនៅសហរដ្ឋអាមេរិកនឹងធ្លាក់ចុះឆាប់រហ័សរហូតដល់សូន្យ។
ប៉ុន្តែនៅក្នុងសារមួយតាមបណ្តាញTwitter កាលពីថ្ងៃព្រហស្បតិ៍លោកត្រាំបានទទួលស្គាល់តួលេខអ្នកស្លាប់១សែននាក់នេះដែលជាចំនួនច្រើនជាងចំនួនពលរដ្ឋអាមេរិកដែលបានស្លាប់នៅក្នុងសង្គ្រាមវៀតណាមនិងកូរ៉េបូកបញ្ចូលគ្នា។
នៅក្នុងសារដដែលនោះលោកប្រធានាធិបតីថ្លែងយ៉ាងដូច្នេះថា៖ «ជូនចំពោះគ្រប់ក្រុមគ្រួសារនិងមិត្តទាំងអស់នៃអ្នកដែលបានចែកឋានទៅ ខ្ញុំសូមចូលរួមរំលែកទុក្ខនិងរំឭកដល់សេចក្តីស្រឡាញ់និងគុណសម្បត្តិទាំងអស់ដែលតំណាងឲ្យបុគ្គលដ៏ល្អទាំងនោះ។ សូមព្រះជាម្ចាស់នៅជាមួយអ្នក»។
ខណៈដែលសហរដ្ឋអាមេរិកមានចំនួនអ្នកស្លាប់ពីកូវីដ១៩កើនលើស១សែននាក់ក្នុងរយៈពេលតិចជាង៤ខែ អ្នកតាក់តែងច្បាប់អាមេរិកទាំងនៅក្នុងរដ្ឋសភានិងព្រឹទ្ធសភាបានធ្វើសំណើផ្សេងៗគ្នាឲ្យមានការរំឭកវិញ្ញាណក្ខន្ធជនរងគ្រោះតាមរយៈការស្មឹងស្មាធិ៍ ឬការស្ថាបនាបូជនីយដ្ឋានទៀតផង។
ចំនួនអ្នកស្លាប់ពីកូវីដ១៩ក្នុងមួយថ្ងៃៗនៅសហរដ្ឋអាមេរិកបានថយចុះវិញហើយ ប៉ុន្តែចំនួននេះនៅតែមានកម្រិតខ្ពស់ ហើយកាលពីថ្ងៃពុធចំនួនអ្នកស្លាប់បានរហូតដល់១.៤០០នាក់។
នៅជុំវិញពិភពលោកចំនួនអ្នកស្លាប់សរុបដោយកូវីដ១៩បានកើនឡើងដល់ជាង៣៥៦.០០០នាក់ និងមានអ្នកឆ្លងវីរុសកូរ៉ូណាចំនួន៥,៧លាននាក់ ដោយជិត៣០%ស្ថិតនៅក្នុងសហរដ្ឋអាមេរិក៕