ភ្ញៀវទេសចរភាគច្រើនបានលុបចោលការធ្វើដំណើរទេសចរណ៍របស់ខ្លួនមកកម្ពុជា ជាពិសេសមកកាន់ខេត្តសៀមរាប បន្ទាប់ពីមានការផ្ទុះមេរោគកូរ៉ូណាវីរុសថ្មី។
នៅក្នុងអំឡុងពេលផ្ទុះមេរោគកូរ៉ូណាវីរុសថ្មីនេះ សណ្ឋាគារនៅខេត្តសៀមរាបយ៉ាងហោចណាស់ចំនួន១០ត្រូវបានបិទទ្វារ។ នេះបើតាមការអះអាងប្រធានសមាគមទីភ្នាក់ងារទេសចរណ៍កម្ពុជា។ ហើយក្រុមហ៊ុនទេសចរណ៍ធំៗចំនួនពីរដែលមានភោជនីយដ្ឋានរបស់ខ្លួនចំនួន៨ មានហាងលក់វត្ថុអនុស្សារិ៍យក៏បានប្រកាសបិទទ្វារជាបន្ទាន់កាលពីចុងខែមករានេះដែរ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានប្រាប់ VOA ថា ចាប់តាំងពីមានមេរោគកូរ៉ូណាវីរុសផ្ទុះឡើង ភ្ញៀវទេសចរប្រមាណជាង៦០ភាគរយបានលុបចោលការធ្វើដំណើររបស់ខ្លួនមកកាន់កម្ពុជា។
លោកស្រីមានសណ្ឋាគារមួយ នៅក្នុងខេត្តសៀមរាបដែលមាន១២០បន្ទប់។លោកស្រីថា នៅមុនការផ្ទុះមេរោគកូរ៉ូណាវីរុសនេះកើតឡើង មានភ្ញៀវកក់ប្រមាណជា១០០បន្ទប់ ក្នុងមួយថ្ងៃ ប៉ុន្តែបច្ចុប្បន្ននេះ មានភ្ញៀវមកស្នាក់នៅ ចន្លោះពី១០ទៅ១៥បន្ទប់ប៉ុណ្ណោះជារៀងរាល់ថ្ងៃ។
លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ថ្លែងនៅក្រសួងទេសចរណ៍។ (ធីតា វីន/VOA)
«រៀងរាល់ថ្ងៃនេះ គឺមានការលុបចោលភ្ញៀវដែលបានកក់ហើយនៅតាមសណ្ឋាគារក៏ដូចជានៅតាមទីភ្នាក់ងារទេសចរណ៍ ហើយនិងរមណីយដ្ឋាន ភោជនីយដ្ឋាន។ ក្នុង១ថ្ងៃ១០០បន្ទប់ហើយ ឥឡូវវានៅសល់ត្រឹម១០បន្ទប់ ១៥បន្ទប់ គេលុបចោលអស់។ [ខ្ញុំ] ព្រួយបារម្ភមែនទែន ខ្លាចនៅតែបន្តការធ្លាក់ចឹងទៅ វាធ្វើឲ្យប៉ះពាល់ទៅដល់ជីវភាពរបស់ប្រជាពលរដ្ឋរបស់យើងទូទាំងប្រទេសតែម្តង»។
អ្នកស្រីបន្តថា រដ្ឋាភិបាលគួរតែមានវិធានការបង្ហាញឲ្យភ្ញៀវទេសចរជឿជាក់ ថា ការធ្វើដំណើរមកកម្ពុជាទទួលបានសុវត្ថិភាពជាជាងគ្រាន់តែធ្វើការប្រកាសតែប៉ុណ្ណោះ។
«មិនមែនធ្វើដើម្បីតែប្រជាពលរដ្ឋជឿជាក់ទេ គឺត្រូវធ្វើឲ្យទេសចរណ៍ទូទាំងសាកលលោកហ្នឹង គាត់ជឿជាក់ដែរថា កម្ពុជាអត់អីទេ ចឹងគួរតែធ្វើអ្វីមួយបន្ថែមទៀតឲ្យការរឹតបន្តឹងនៅតាមច្រកចេញចូលហ្នឹងគឺជារឿងសំខាន់»។
មេរោគកូរ៉ូណាវីរុសដែលមានប្រភពក្នុងខេត្តហ៊ូយបេ ទីក្រុងវូហាននៃប្រទេសចិនបានឆ្លងរីករាលដាលដល់មនុស្សយ៉ាងហោចណាស់ប្រមាណជាង៣ម៉ឺននាក់ និងបានសម្លាប់មនុស្សជាង៦០០នាក់ទូទាំងប្រទេស។ ប្រទេសកម្ពុជាក៏បានរកឃើញអ្នកកើតមេរោគកូរ៉ូណាវីរុសថ្មីជាជនជាតិចិនម្នាក់ កាលពីថ្ងៃទី២៧ ខែមករានេះ នៅក្រុងព្រះសីហនុ។
លោកស្រី ឆាយ ស៊ីវលីន ជាអ្នកប្រកបរបរលើវិស័យទេសចរណ៍នេះជាង២០ឆ្នាំកន្លងមកហើយ។ អ្នកស្រីមានសណ្ឋាគារធំចំនួន២ ក្នុងខេត្តសៀមរាប មានក្រុមហ៊ុនទេសចរណ៍និងក្រុមហ៊ុនលក់សំបុត្រយន្តហោះ។
លោកស្រីបានឲ្យដឹងថា ផលប៉ះពាល់នៃមេរោគកូរ៉ូណាវីរុសថ្មីក្នុងអំឡុងពេលនេះមកលើវិស័យទេសចរណ៍មានសភាពធ្ងន់ធ្ងរជាងការផ្ទុះជំងឺ SARS កាលពីឆ្នាំ២០០៣ ទៅទៀត។
ភ្ញៀវទេសចរណ៍ដើរទស្សនាផ្សាររាត្រីមួយកន្លែងនៅខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
ក្រុមសមាគមទេសចរណ៍នៃវិស័យឯកជនបានជួបពិភាក្សាគ្នាដើម្បីរកវិធានការទប់ទល់នឹងការធ្លាក់ចុះនៃភ្ញៀវទេសចរ។ ក្នុងអំឡុងពេលនេះ ក្រុមសមាគមទាំងនោះព្យាយាមបញ្ចុះតម្លៃលើកញ្ចប់សេវាទេសចរណ៍មកកាន់ប្រទេសកម្ពុជាប្រមាណ៥០ភាគរយ។
កាលពីសប្តាហ៍មុន ក្រសួងទេសចរណ៍ក៏បានធ្វើការប្រជុំដាក់នូវវិធានការមួយចំនួនដើម្បីជួយជំរុញដល់ទេសចរណ៍ក្នុងស្រុកដូចជា កញ្ចប់សេវាទស្សនកិច្ចមានតម្លៃថោក ពង្រឹងគុណភាពសេវាកាន់តែល្អ ផលិតវីដេអូផ្សព្វផ្សាយអំពីសក្តានុពលទេសចរណ៍កម្ពុជាជាដើម។
លោក លូ ម៉េង ប្រធានសហព័ន្ធទេសចរណ៍កម្ពុជាបានឲ្យដឹងថា ឥទ្ធិពលនៃមេរោគកូរ៉ូណាវីរុសនេះធ្វើឲ្យភ្ញៀវទេសចរបន្តលុបចោលគម្រោងមកកាន់ប្រទេសកម្ពុជា ជាពិសេសខេត្តសៀមរាប។
លោកបានបញ្ជាក់ថាពេលនេះវិស័យឯកជន និងមន្ត្រីជំនាញរបស់រដ្ឋាភិបាលគួរតែសហការគ្នាដើម្បីជួយដល់វិស័យទេសចរណ៍ក្នុងប្រទេសកម្ពុជា។
លោក លូ ម៉េង ប្រធានសហព័ន្ធទេសចរណ៍កម្ពុជា ថ្លែងនៅក្រសួងទេសចរណ៍។ (ធីតា វីន/VOA)
«ឲ្យឯកជនទាំងអស់គ្នា ធ្វើការជាមួយគ្នា។ គឺយើងហៅថាសំឡេងតែមួយហើយធ្វើការជាមួយក្រសួងទេសចរណ៍ ឬក៏ក្រសួងពាណិជ្ជកម្ម។ តើយើងត្រូវធ្វើដូចម្តេចជំរុញយុទ្ធនាកាថា យើងមានសុវត្ថិភាពទេ យើងមានផលិតផលល្អៗ ជាពេលវេលាយើងត្រូវផ្សព្វផ្សាយ ធ្វើម៉េច ឲ្យគេដឹង ទាំងអស់គ្នាអង្គុយធ្វើការជាមួយគ្នា ប្រមូលថវិកាផ្សព្វផ្សាយឲ្យបានត្រឹមត្រូវ ការផ្សព្វផ្សាយយើងឲ្យមាំ»។
យោងតាមស្ថិតិរបស់ក្រសួងទេសចរណ៍បានឲ្យដឹងថា នៅក្នុងឆ្នាំ២០១៩កន្លងទៅ ភ្ញៀវទេសចរចូលមកទស្សនាប្រទេសកម្ពុជាមានចំនួន៦.៦លាននាក់ ក្នុងនោះភ្ញៀវទេសចរជនជាតិចិនមានចំនួន២.៣លាននាក់ ដែលចំនួននេះធ្វើឲ្យភ្ញៀវទេសចរជនជាតិចិនឈរក្នុងលំដាប់ថ្នាក់លេខ១ ពោលគឺស្នើ៣៥ភាគរយនៃភ្ញៀវទេសចរសរុបក្នុងចំណោម១១០សញ្ជាតិ។
លោក ទៀ សីហា អភិបាលខេត្តសៀមរាប បានប្រសាសន៍ដែរថា ភាគច្រើនភ្ញៀវទេសចរជនជាតិចិនបានលុបចោលការមកទស្សនាក្នុងប្រទេសកម្ពុជា ដែលកំពុងបង្កឲ្យមានការព្រួយបារម្ភជាខ្លាំង ក្នុងអំឡុងពេលផ្ទុះមេរោគកូរ៉ូណាវីរុសថ្មីនេះ។
«ជាក្រុមហ៊ុនទេសចរណ៍មួយដោយគាត់មានទំនាក់ទំនងដូចជាកក់យន្តហោះមួយទាំងមូល មកចុះនៅខេត្តសៀមរាបយើង ក៏មានការលុបចោលជើងហោះហើរ ក៏ដូចជាការលុបចោលបន្ទប់ជាច្រើនដែរ ទាំងសេវាកម្ម ក៏ដូចជាអូតែលអីឥឡូវនេះជឿជាក់ថា មានផលប៉ះពាល់យ៉ាងខ្លាំង ក៏ប៉ុន្តែកំពុងរៀបចំកម្មវិធីមួយចំនួននៅក្នុងខេត្តសៀមរាបរបស់យើង ជាពិសេសគឺកម្មវិធីចូលឆ្នាំប្រពៃណីខ្មែរយើងផងដែរ»។
តាមការណ៍ឲ្យដឹងស្រដៀងៗគ្នាពីក្រុមអ្នកប្រកបរបរអាជីវកម្មលើវិស័យទេសចរណ៍បានត្អូញត្អែរថា បើមានការអូសបន្លាយនៃការរីករាលដាលមេរោគកូរ៉ូណាវីរុសនេះ ប្រហែលជា៣ខែបន្តទៅមុខទៀត សណ្ឋាគារនៅក្នុងខេត្តសៀមរាបជាច្រើនត្រូវប្រឈមមុខបិទទ្វារជាមិនខាន។
ខណៈចំនួនភ្ញៀវទេសចរណ៍ធ្លាក់ចុះ សណ្ឋាគារ ភោជនីយដ្ឋាន ហាងលក់វត្ថុអនុស្សាវរីយ៍ ត្រូវបានដាក់ជួល ឬលក់ នៅក្នុងខេត្តសៀមរាប កាលពីថ្ងៃទី៩ ខែវិច្ឆិកា ឆ្នាំ២០១៩។ (ធីតា វីន/VOA)
ប្រជាពលរដ្ឋរស់នៅក្នុងខេត្តសៀមរាបភាគច្រើនប្រកបរបរពឹងផ្អែកលើវិស័យទេសចរណ៍ដូចជាមគ្គុសទេសក៍ទេសចរណ៍ អ្នកលក់វត្ថុអនុស្សាវរីយ៍ សណ្ឋាគារ ផ្ទះសំណាក់ ភោជនីយដ្ឋានជាដើម។
ខេត្តសៀមរាបមានមគ្គុសទេសក៍ទេសចរណ៍ចំនួនជាង៥០០០នាក់ ភាគច្រើនជាមគ្គុសទេសក៍ទេសចរណ៍ភាសាអង់គ្លេស និងចិន។
លោក ខៀវ ធី ជាប្រធានសមាគមមគ្គុសទេសក៍ទេសចរណ៍អង្គរនិងមគ្គុសទេសក៍ទេសចរណ៍ភាសាអង់គ្លេស បានឲ្យដឹងថា សមាគមលោកមានការព្រួយបារម្ភជាខ្លាំងចំពោះការលុបចោលរបស់ភ្ញៀវទេសចរមកលេងខេត្តសៀមរាប ក្រោយពីមានការផ្ទុះមេរោគកូរ៉ូណាវីរុសនេះ។
«ស្ថានភាពភ្ញៀវទេសចរនៅខេត្តសៀមរាបមានការលុបចោលច្រើន សូម្បីជនជាតិអាមេរិកាំងក៏ដោយ លុបចោលដោយសារគាត់បារម្ភ ពីជំងឺកូរ៉ូណាវីរុសហ្នឹងឯង លុបចោលមួយចំនួនធំ»។
លោកបន្តថា៖ «ហើយជនជាតិចិនអត់មកសោះតែម្តង។ ខ្លួនបងផ្ទាល់គេលុបអស់២ក្រុមមគ្គុសទេសក៍ដទៃទៀត ក៏គេលុបដែរ មិត្តភក្តិបងគេនិយាយប្រាប់បងថា គេលុបដែរបើជំងឺកូរ៉ូណាវីរុស គេមិនអាចបង្ក្រាបវាបាន នៅតែសាយភាយរីករាលដាលច្រើនឡើងៗនោះ ប្រាកដជាគេឈប់មកហើយ បារម្ភណាស់ចេះតែបារម្ភ»។
លោក តុប សុភ័ក អនុរដ្ឋលេខាធិការនិងជាអ្នកនាំពាក្យនៃក្រសួងទេសចរណ៍ បានមានប្រសាសន៍ថា ការប៉ះពាល់លើវិស័យទេសចរណ៍ដោយសារមេរោគកូរូណាវីរុសនេះ គឺជាបញ្ហាដែលពិបាកគ្រប់គ្រងពីព្រោះវាជាបញ្ហាសាកល។
ហេតុដូច្នេះលោកបានឲ្យដឹងថា មានតែជំរុញភ្ញៀវទេសចរក្នុងស្រុកឲ្យកាន់តែខ្លាំងនៅក្នុងអំឡុងពេលនេះ ដើម្បីទ្រទ្រង់វិស័យទេសចរណ៍នេះ។
«ពេលវេលាដ៏លំបាកនេះ គឺយើងចូលរួមទាំងអស់គ្នាជាពិសេសជាមួយអាជ្ញាធរដែនដី និងប្រតិបត្តិករទេសចរណ៍ទាំងអស់។ បើកាលណាយើងអត់មានចលនាទេសចរណ៍ក្នុងស្រុក ចឹងអាជីវកម្ម ទេសចរណ៍មួយចំនួនពិតណាស់ជួបការលំបាក ប៉ុន្តែនៅខណៈពេលនេះគឺយើងជួបការលំបាកទាំងអស់គ្នាទាំងកម្ពុជាយើងក៏ដូចជាប្រទេសផ្សេងៗទៀត ជាពិសេសប្រទេសដែលទទួលបានទេសចរណ៍ចិនច្រើន គឺយើងមានការថមថយទេសចរណ៍» ។
យោងតាមស្ថិតិរបស់ក្រសួងទេសចរណ៍ នៅក្នុងខេត្តសៀមរាបមាន សណ្ឋាគារចំនួន ២៣៤ គិតជាបន្ទប់មានប្រមាណជាង១៤០០០បន្ទប់ ផ្ទះសំណាក់ ៣១០ គិតជាបន្ទប់ ជាង ៤៦០០បន្ទប់ និងភោជនីយដ្ឋានមានចំនួន១៩៦។
ខេត្តសៀមរាបគឺជាខេត្តមួយដែលស្រូបទាញភ្ញៀវទេសចរជាតិនិងអន្តរជាតិច្រើនជាងគេនៅក្នុងប្រទេសកម្ពុជា។ ជារៀងរាល់ឆ្នាំ ភ្ញៀវទេសចរប្រហែលជាង២លាននាក់ធ្វើដំណើរកម្សាន្តនៅខេត្តនេះ ដែលអាចផ្តល់ចំណូល ប្រហែល១០០លានដុល្លារក្នុងមួយឆ្នាំ៕