ប៉ុន្តែបទបញ្ជាឲ្យនៅផ្ទះនេះបានជំរុញឲ្យម្នាក់ៗស្វែងរកវិធីផ្សេងដើម្បីពិគ្រោះយោបល់បញ្ហាសុខភាពជាមួយនឹងវេជ្ជបណ្ឌិតរបស់ពួកគេ ដោយនិយាយតាមទូរស័ព្ទ សារអេឡិចត្រូនិច ឬអ៊ីម៉ែល ឬនិយាយឆ្លើយឆ្លងតាមវីដេអូជាដើម។ នេះបើយោងតាមការសិក្សាថ្មីមួយដែលបានរកឃើញ។
បច្ចុប្បន្ននេះ ៣០ភាគរយនៃអ្នកជំងឺពិគ្រោះយោបល់បញ្ហាសុខភាពជួបគ្រូពេទ្យតាមទូរស័ព្ទ ឬវីដេអូ ដែលនេះកើនពីក្រោម១ភាគរយកាលពីដើមខែមីនា។ នេះបើយោងតាមក្រុមអ្នកស្រាវជ្រាវនៅសាកលវិទ្យាល័យ Harvard និងក្រុមហ៊ុនបច្ចេកវិទ្យាថែរក្សាសុខភាព Phreesia។
លោក Ateev Mehrotra សាស្ត្រាចារ្យមួយរូបនៅសាលាពេទ្យនៃសាកលវិទ្យាល័យ Harvard និងជាអ្នកស្រាវជ្រាវក្នុងការសិក្សាមួយនេះផងដែរបានថ្លែងថា៖ «នេះជាការផ្លាស់ប្តូរខ្លាំងមួយ។ ការផ្លាស់ប្តូរនេះយើងរំពឹងថានឹងកើតមានឡើងក្នុងពេលមួយទសវត្សរ៍ មិនមែនក្នុងរយៈពេលតែប៉ុន្មានសប្តាហ៍ប៉ុណ្ណោះទេ»។
ការរង់ចាំបដិវត្តន៍នៃការពិនិត្យសុខភាពតាមទូរស័ព្ទ ឬវីដេអូ
ការប្រាស្រ័យទាក់ទងគ្នាតាមប្រព័ន្ធអេឡិចត្រូនិចជាមួយនឹងវេជ្ជបណ្ឌិតមិនមែនជារឿងថ្មីនោះទេ។ ជាមួយនឹងអ្នកជំនាញសើស្បែកនិងបញ្ហាផ្លូវចិត្ត ការជួបជាមួយនឹងពេទ្យតាមទូរស័ព្ទ ឬវីដេអូគឺជារឿងធម្មតា។
នៅក្នុងសហគមន៍តាមជនបទនានាក្នុងសហរដ្ឋអាមេរិក ដែលយើងឃើញចំនួនមន្ទីពេទ្យនិងគ្រូពេទ្យមានការធ្លាក់ចុះនោះ ការជួបពេទ្យតាមទូរស័ព្ទ និងវីដេអូក្លាយជាការចាំបាច់។
ប៉ុន្តែទាក់ទងនឹងការជួបគ្រូពេទ្យប្រចាំកាយវិញ ក្រុមវេជ្ជបណ្ឌិត អ្នកជំងឺនិងអ្នកតាក់តែងច្បាប់ទំនងជាប់គាំងគ្មានដំណោះស្រាយដើម្បីស្វែងរកវិធីពិគ្រោះឬពិនិត្យសុខភាពណាក្រៅពីការជួបផ្ទាល់ជាមួយនឹងអ្នកជំងឺ។
វេជ្ជបណ្ឌិតមួយចំនួនថ្លែងថា ការណាត់ជួបតាមវីដេអូអាចពិនិត្យបានច្រើន។
លោកវេជ្ជបណ្ឌិត Edward Lee វេជ្ជបណ្ឌិតទូទៅនិងជានាយកផ្នែកព័ត៌មាននៅសហព័ន្ធមន្ទីពេទ្យ Kaiser Permanente ដែលមានអ្នកជំងឺ ឬសមាជិកជាង១២លាននាក់បានថ្លែងថា៖ «ការពិនិត្យមើលស្បែកកន្តួលរមាស់ ប្រជ្រុយនៅលើដៃ យើងអាចពិនិត្យបានយ៉ាងល្អតាមវីដេអូ (telehealth)»។
លោកបានថ្លែងថា៖ «ប្រសិនបើយើងត្រូវចាក់ថ្នាំ ឬព្យាបាល (វះកាត់) បន្តិចបន្តួច យើងមិនអាចធ្វើបានតាមទូរស័ព្ទ ឬវីដេអូនោះទេ។ ហើយក្នុងស្ថានភាពដែលចាំបាច់ យើងត្រូវឲ្យអ្នកជំងឺមកជួបយើងនៅមន្ទីរពេទ្យ»។
លោក Mehrotra សាស្ត្រាចារ្យនៅឯសាកលវិទ្យាល័យ Harvard ថ្លែងថា ក្រុមវេជ្ជបណ្ឌិតនិងអ្នកជំងឺកំពុងព្យាយាមប្រើប្រាស់ការពិគ្រោះបញ្ហាសុខភាពតាមទូរស័ព្ទនិងវីដេអូ ប៉ុន្តែវាមានកំណត់។
លោកបានថ្លែងថា៖ «បើយោងតាមអ្វីដែលយើងឮពីគ្រូពេទ្យដែលបានសាកល្បងជួបអ្នកជំងឺតាមទូរស័ព្ទ ឬវីដេអូ ខ្ញុំគិតថានិន្នាការនេះនឹងបន្តកើនឡើងក្រោយជំងឺរាតត្បាតនេះបញ្ចប់។ ប៉ុន្តែខ្ញុំក៏ឮពីវេជ្ជបណ្ឌិតជាច្រើនផងដែរថា ពួកគេចូលចិត្តការពិគ្រោះសុខភាពតាមទូរស័ព្ទ ឬវីដេអូ ប៉ុន្តែពួកគេនៅតែចូលចិត្តការជួបអ្នកជំងឺដោយផ្ទាល់ជាង។ ពួកគេថាមិនអាចពិនិត្យសុខភាពឲ្យបានពេញលេញតាមទូរស័ព្ទ ឬវីដេអូនោះទេ»។
តម្លៃជួបគ្រូពេទ្យតាមវីដេអូស្មើនឹងតម្លៃជួបដោយផ្ទាល់
ការសម្រេចខាងគោលនយោបាយនេះក៏កំពុងជំរុញឲ្យមានការកើនឡើង ការពិគ្រោះបញ្ហាសុខភាពតាមទូរស័ព្ទ ឬវីដេអូផងដែរ។ នៅមុនការរាតត្បាតនៃកូវីដ១៩ ទីភ្នាក់ងាររដ្ឋាភិបាល និងក្រុមហ៊ុនធានារ៉ាប់រងសុខភាពចំណាយតិចជាងពាក់កណ្តាលនៃចំនួនដែលពួកគេចំណាយជាធម្មតា ពេលគ្រូពេទ្យពិគ្រោះបញ្ហាសុខភាពតាមទូរស័ព្ទ ឬវីដេអូ។ ឥឡូវពួកគេបានបង្កើនការបង់ថ្លៃសេវាពិគ្រោះតាមទូរស័ព្ទឬវីដេអូឲ្យស្មើនឹងតម្លៃការជូបពិគ្រោះផ្ទាល់ នេះបើតាមគេហទំព័រព័ត៌មានសុខភាព Kaiser Health News។
អ្នកតាក់តែងច្បាប់សហព័ន្ធក៏បានផ្អាកបណ្តោះអាសន្នក្នុងការគោរពទៅច្បាប់ឯកជនភាពរបស់អ្នកជំងឺ។ ការធ្វើដូច្នេះក្រុមវេជ្ជបណ្ឌិតអាចប្រើប្រាស់កម្មវិធីបច្ចេកវិទ្យាដូចជា Skype FaceTime និង Whatsapp ជាដើម។ នេះបើយោងតាមអង្គការ Consumer Reports។ វីធីមួយផ្សេងទៀតសម្រាប់មន្ទីរពេទ្យនិងក្រុមវេជ្ជបណ្ឌិតគឺស្វែងរកក្រុមហ៊ុនដែលផ្តោតលើការប្រាស្រ័យទាក់ទងជាមួយអ្នកជំងឺដែលអាចផ្តល់ការហៅទូរស័ព្ទ ឬវីដេអូដែលមានសុវត្ថិភាព។ ប៉ុន្តែវាអាចចំណាយពេលយូរបន្តិច។
លោក Mehrotra មិនប្រាកដថា ការកើនឡើងនៃការពិគ្រោះបញ្ហាសុខភាពដោយប្រើប្រាស់ទូរស័ព្ទ និងវីដេអូក្រោយការរាតត្បាតនេះជាមាគ៌ាត្រឹមត្រូវសម្រាប់ប្រព័ន្ធសុខាភិបាលអាមេរិកទេ។
ប៉ុន្តែលោកថ្លែងថា កន្លែងមួយដែលការពិគ្រោះបញ្ហាសុខភាពអាចត្រូវការពេលយូរនោះគឺនៅតាមតំបន់ជនបទនៃប្រទេសកំពុងអភិវឌ្ឍ ទីដែលការជួបគ្រូពេទ្យអាចមានការលំបាក។
លោកថ្លែងថា៖ «នៅតំបន់ទាំងនេះ ការពិនិត្យសុខភាពតាមទូរស័ព្ទនិងវីដេអូមានសក្តានុពល។ វាអាចជួយសង្គ្រោះជីវិតបាន»៕
ប្រែសម្រួលដោយ ស្រេង លក្ខិណា