ប្រទេសថៃនឹងបន្ថែមពេលនៃការដាក់ប្រទេសក្នុងភាពអាសន្នទាក់ទិននឹងវិបត្តិជំងឺកូវីដ១៩ រហូតដល់ចុងខែឧសភា ប៉ុន្តែនឹងពិចារណាអំពីការបន្ធូរបន្ថយការដាក់កំហិតមួយចំនួនលើកន្លែងអាជីវកម្ម និងសកម្មភាពសាធារណៈនានា នៅពេលដែលចំនួនឆ្លងថ្មីនៃជំងឺកូវីដ១៩ បានថយចុះ។ នេះបើតាមការបញ្ជាក់របស់អ្នកនាំពាក្យរដ្ឋាភិបាល។
នៅថ្ងៃចន្ទនេះ ប្រទេសថៃបានរាយការណ៍ថា មានករណីឆ្លងថ្មីចំនួន ៩ នាក់ និងមិនមានការឆ្លងថ្មីនៅក្នុងទីក្រុងបាងកកជាលើកដំបូង តាំងពីជំងឺនេះបានផ្ទុះរាលដាលឡើងតាំងពីខែមករាមក។ ប្រទេសថៃបានបញ្ជាក់ថា ករណីឆ្លងសរុបនៃជំងឺកូវីដ១៩ មានចំនួន ២.៩៣១ នាក់ និងករណីស្លាប់មានចំនួន ៥២ នាក់ ចំណែកឯអ្នកជាសះស្បើយមានចំនួន ២.៦០៩ នាក់។
ដោយសារតែមានការព្រួយបារម្ភខ្លាចមានរលកទីពីរនៃការឆ្លងរាលដាលជំងឺនេះ បានជាមជ្ឈមណ្ឌលគ្រប់គ្រងស្ថានការណ៍ជំងឺកូវីដ១៩ របស់រដ្ឋាភិបាលថៃ បានស្នើបន្ថែមពេលដាក់ប្រទេសក្នុងភាពអាសន្ន។
រដ្ឋាភិបាលថៃក៏បានស្នើផងដែរឲ្យបន្តដាក់កំហិតលើការធ្វើដំណើររវាងខេត្តនានា និងដាក់កំហិតលើសកម្មភាពសាធារណៈទ្រង់ទ្រាយធំ ដោយពន្យារបន្ថែមនូវគោលនយោបាយធ្វើការពីផ្ទះ និងពន្យារថ្ងៃឈប់សម្រាករបស់រដ្ឋចំនួន ៤ នៅក្នុងខែឧសភា។
វិធានការថ្មីទាំងនេះគឺរងចាំការអនុម័តពីគណៈរដ្ឋមន្ត្រីនៅថ្ងៃអង្គារស្អែក៕