គណបក្សភឿថៃ ដែលជាគណបក្សប្រឆាំងដ៏សំខាន់នៅប្រទេសថៃ បានឲ្យដឹងថា គណបក្សនេះបានចូលរួមជាមួយនឹងគណបក្សតូចៗ ចំនួន ៦ទៀត ដើម្បីឲ្យបានកើនអាសនៈភាគច្រើននៅក្នុងរដ្ឋសភា និងដើម្បីអាចបង្កើតរដ្ឋាភិបាលថ្មីមួយ។
លោកស្រី Sudarat Keyuraphan បេក្ខនារីនាយករដ្ឋមន្រ្តីនៃគណបក្សភឿថៃ បានប្រកាសពីការចូលរួមជាមួយគណបក្សទាំងនោះ នៅទីក្រុងបាងកក នៅថ្ងៃពុធនេះ ដោយលោកស្រីអះអាងថា គណបក្សបានឈ្នះអាសនៈយ៉ាងហោចណាស់ ២៥៥កៅអីនៅក្នុងសភាដែលមាន ៥០០អាសនៈ ដែលត្រូវបានបោះឆ្នោតប្រកួតប្រជែងកាលពីថ្ងៃអាទិត្យកន្លងទៅនេះ។
គិតត្រឹមថ្ងៃចន្ទដើមសប្តាហ៍នេះ លទ្ធផលរាប់សន្លឹកឆ្នោតបឋមបានបង្ហាញថា គណបក្សភឿថៃ បានឈ្នះអាសនៈចំនួន ១៣៧ ហើយគណបក្សដែលគាំទ្រដោយរបបយោធា គឺគណបក្ស Phalang Pracharat បានឈ្នះអាសនៈចំនួន៩៧។
ក៏ប៉ុន្តែបើទោះបីជាគណបក្សភឿថៃ បានទទួលអាសនៈភាគច្រើននៅក្នុងរដ្ឋសភាបន្ទាប់ពីចេញលទ្ធផលផ្លូវការក៏ដោយ ក៏គណបក្សនេះមិនអាចបង្កើតរដ្ឋាភិបាលនៅក្រោមរដ្ឋធម្មនុញ្ញថ្មីបានដែរ ដែលរដ្ឋធម្មនុញ្ញនោះត្រូវបានបង្កើតឡើងដោយរដ្ឋប្រហារយោធា។
រដ្ឋធម្មនុញ្ញថ្មីនេះបានចែងថា សមាជិកព្រឹទ្ធសភា ២៥០នាក់ ដែលត្រូវបានតែងតាំងដោយរបបរដ្ឋប្រហារនឹងចូលរួមជាមួយនឹងសមាជិករដ្ឋសភា ៥០០នាក់ ដែលឈ្នះអាសនៈនៅក្នុងការបោះឆ្នោត ដើម្បីបោះឆ្នោតជ្រើសរើសនាយករដ្ឋមន្រ្តី។ គណបក្ស Phalang Pracharat ក៏បានអះអាងថា នឹងបង្កើតរដ្ឋាភិបាលថ្មី ដោយសារលទ្ធផលបឋមបង្ហាញថា គណបក្សនេះបានទទួលសន្លឹកឆ្នោតសរុបច្រើនជាងគណបក្សភឿថៃ៕