ពួកតាលីបង់បាននិយាយថា កិច្ចព្រមព្រៀងសន្តិភាពរបស់ខ្លួនជាមួយស.រ.អា.នឹងមិនកែប្រែឋានៈនៃមេដឹកនាំកំពូលរបស់ជាមេដឹកនាំត្រឹមត្រូវតាមច្បាប់នៃប្រទេសអាហ្វហ្គានីស្ថានទេ។
ពួកគេនិយាយថា មេដឹកនាំរបស់គេមានកាតព្វកិច្ចតាមសាសនាដើម្បីបង្កើត«រដ្ឋាភិបាលឥស្លាម»មួយនៅក្រោយពួកទាហានបរទេសដែលកាន់កាប់ប្រទេសអាហ្វហ្គានីស្ថាន ចាកចេញពីប្រទេសនេះ។
សេចក្តីប្រកាសថ្មីៗបំផុតនេះរបស់ពួកតាលីបង់បង្កើនភាពមិនទៀងទាត់ដល់កិច្ចព្រមព្រៀងរវាងស.រ.អា.និងពួកតាលីបង់ដែលបានត្រូវចុះហត្ថលេខាកាលពីមួយសប្តាហ៍មុននេះនៅក្នុងប្រទេសកាតា។ សេចក្តីប្រកាសនេះក៏មានឡើងមួយថ្ងៃក្រោយពីបណ្តាញផ្សាយព័ត៌មានអាមេរិកាំងមួយបានរាយការណ៍ថា រដ្ឋាភិបាលស.រ.អា.មានព័ត៌មានខាងការស៊ើបការសម្ងាត់ដែលថា ពួកបះបោរជ្រុលនិយមនេះមិនចង់ធ្វើតាមការសន្យាដែលពួកគេបានធ្វើនៅក្នុងកិច្ចព្រមព្រៀងសន្តិភាពកាលពីថ្ងៃទី២៩ខែកុម្ភៈទេ។
សេចក្តីថ្លែងការណ៍មួយរបស់ពួកតាលីបង់កាលពីថ្ងៃសៅរ៍និយាយទទូចថា នៅពេលមានវត្តមាននៃ Emir ត្រឹមត្រូវតាមច្បាប់ម្នាក់ មិនអាចមានអ្នកគ្រប់គ្រងម្នាក់ទៀតនៃប្រទេសអាហ្វហ្គានីស្ថាន ទេ ដោយនិយាយយោងដល់លោក Mullah Haibatullah Akhundzada ប្រធានរបស់ពួកគេ។
សេចក្តីថ្លែងការណ៍នេះបាននិយាយថា៖ «នៅពេលដែលសង្គ្រាមសាសនា១៩ឆ្នាំនេះប្រឆាំងនឹងការកាន់កាប់របស់បរទេសបានត្រូវធ្វើនៅក្រោមការបញ្ជារបស់ Emir ត្រឹមត្រូវតាមច្បាប់ម្នាក់ កិច្ចព្រមព្រៀងស្តីពីការបញ្ចប់ការកាន់កាប់នេះមិនមែនមានន័យថា ការគ្រប់គ្រងរបស់លោកបានត្រូវបញ្ឈប់ឡើយ» ដោយនិយាយយោងដល់កិច្ចព្រមព្រៀងជាមួយរដ្ឋាភិបាលក្រុងវ៉ាស៊ីនតោន។
ក្រុមចម្រុះយោធាអន្តរជាតិមួយដឹកនាំដោយស.រ.អា.បានចូលលុកលុយប្រទេសអាហ្វហ្គានីស្ថាន តែប៉ុន្មានអាទិត្យក្រោយការវាយប្រហារភេរវកម្មដ៏ប្រល័យកាលពីខែកញ្ញាឆ្នាំ២០០១ លើប្រទេសអាមេរិកហើយបានបណ្តេញពួកតាលីបង់ពីអំណាចដោយសារពួកនេះបានឱ្យពួកមេដឹកនាំ al-Qaida ដែលបានត្រូវចោទប្រកាន់ថាធ្វើការសម្លាប់រង្គាលនេះ ជ្រកកោននៅក្នុងប្រទេសនោះ។
កិច្ចព្រមព្រៀងគួរកត់សម្គាល់ជាប្រវត្តិសាស្ត្រនេះរវាងស.រ.អា.និងពួកតាលីបង់ដែលបានត្រូវចុះហត្ថលេខាដោយមានវត្តមានពួកឥស្សរជនជាន់ខ្ពស់តំណាងប្រទេសជាតិរាប់សិបបើកឱ្យរដ្ឋាភិបាលក្រុងវ៉ាស៊ីនតោន បញ្ចប់សង្គ្រាមយូរបំផុតរបស់ខ្លួន និងនាំមកផ្ទះវិញនូវទាហានប្រមាណ១ម៉ឺន៣ពាន់នាក់ក្នុងរយៈពេល១៤ខែខាងមុខនេះ។
ជាថ្នូរនឹងការដកទ័ពនេះ កិច្ចព្រមព្រៀងនេះអំពាវនាវដល់ពួកតាលីបង់កុំឱ្យទទួលពួកភេរវជនឱ្យស្នាក់ជ្រកកោនក្នុងប្រទេសអាហ្វហ្គានីស្ថាន ហើយចូលរួមក្នុងដំណើរការផ្សះផ្សាគ្នាខាងនយោបាយជាមួយភាគីអាហ្វហ្គានីស្ថាន ឯទៀតៗ ដោយមានរួមបញ្ចូលទាំងសង្គមស៊ីវិលផងដែរ ដើម្បីធ្វើការចរចាគ្នាឱ្យមានកិច្ចព្រមព្រៀងសន្តិភាពជាតិ និងបែងចែកអំណាចគ្នាប្រកបដោយចីរភាព៕