កងកម្លាំងឧទ្ទាមដែលរុលចូលលឿនដូចផ្លេកបន្ទោរក្នុងប្រទេសស៊ីរីមានគោលបំណងផ្តួលរំលំរបបគ្រប់គ្រងរបស់ប្រធានាធិបតីស៊ីរីលោក Bashar al-Assad។ នេះបើយោងតាមមេដឹកនាំអ៊ិស្លាមនិយមរបស់ក្រុមនេះដែលបាននិយាយក្នុងបទសម្ភាសន៍មួយចេញផ្សាយកាលពីថ្ងៃសុក្រ ហើយដែលត្រូវបានរាយការណ៍ដោយទីភ្នាក់ងារសារព័ត៌មាន AFP។
ការវាយលុករបស់ពួកឧទ្ទាមដែលដឹកនាំដោយក្រុមអ៊ិស្លាមនិយមជ្រុលបានចូលដល់ទីក្រុង Homs ដែលជាទីក្រុងទី ៣ ហើយក្នុងប្រទេសស៊ីរីកាលពីថ្ងៃសុក្រ ក្រោយពីក្រុមនេះបានដណ្ដើមកាន់កាប់តំបន់ផ្សេងៗនៃប្រទេសនេះពីការត្រួតត្រារបស់លោកប្រធានាធិបតី Assad។
ក្នុងពេលដំបូងៗនៃសង្គ្រាមស៊ីវិលនេះ ដែលបានបង្កឡើងដោយការបង្ក្រាបលើបាតុកម្មទាមទារលទ្ធិប្រជាធិបតេយ្យនៅឆ្នាំ ២០១១ ទីក្រុង Homs ត្រូវបានប្រសិទ្ធនាមថាជា «រដ្ឋធានីបដិវត្តន៍» ដោយក្រុមសកម្មជនដែលប្រាថ្នាចង់បានប្រទេសស៊ីរីមួយរួចផុតពីការត្រួតត្រារបស់លោក Assad។
ក្នុងពេលតែជាងមួយសប្តាហ៍ប៉ុណ្ណោះ ការវាយលុកចូលទីក្រុង Aleppo ដែលជាទីក្រុងទី ២ របស់ស៊ីរី និងទីក្រុងយុទ្ធសាស្ត្រ Hama បានធ្វើឲ្យក្រុមឧទ្ទាមដណ្តើមការគ្រប់គ្រប់ពីលោក Assad ជាលើកដំបូងតាំងពីសង្គ្រាមស៊ីវិលបានចាប់ផ្តើមនៅឆ្នាំ ២០១១ មក។
លោក Abu Mohammed al-Jolani ដែលជាមេដឹកនាំសម្ព័ន្ធក្រុមឧទ្ទាម HTS (Hayat Tahrir al-Sham) ថាគោលដៅនៃការវាយលុកចូលនេះគឺដើម្បីផ្តួលរំលំរបបគ្រប់គ្រងរបស់លោក Assad។
លោក Jolani បាននិយាយក្នុងបទសម្ភាសន៍មួយជាមួយទូរទស្សន៍ CNN ថា៖ «ពេលយើងនិយាយអំពីគោលបំណង គោលដៅនៃបដិវត្តន៍នេះគឺនៅតែដដែលដែលនោះគឺការផ្តួលរំលំរបបនេះ។ វាជាសិទ្ធិរបស់យើងក្នុងការប្រើប្រាស់គ្រប់មធ្យោបាយដែលយើងមានដើម្បីសម្រេចគោលដៅនេះ»។
សម្ព័ន្ធក្រុមឧទ្ទាមដែលធ្វើការវាយលុកនេះដែលបានចាប់ផ្តើមកាលពីថ្ងៃទី ២៧ ខែវិច្ឆិកាកន្លងទៅនេះត្រូវបានដឹកនាំដោយក្រុម HTS ដែលបានចាក់ឬសក្នុងសាខាក្រុមអាល់កៃដា (Al-Qaeda) នៅស៊ីរី តែក្រុមនេះបានព្យាយាមប្រែមុខមាត់ពីអ៊ិស្លាមនិយមជ្រុលក្នុងពេលប៉ុន្មានឆ្នាំថ្មីៗនេះ៕
មេដឹកនាំក្រុមឧទ្ទាមស៊ីរីថាគោលដៅគឺផ្តួលរំលំលោក Assad
ពលរដ្ឋនៅទីក្រុង Hama ដុតរូបប្រធានាធិបតីស៊ីរី Bashar al-Assad កាលពីថ្ងៃទី០៥ ធ្នូ ឆ្នាំ២០២៤។