ស្ថិតក្នុងវ័យ៣៤ឆ្នាំ Jenabou Abbo ស្តាប់យល់ និងចេះនិយាយតែភាសា Fulfulde ដែលជាភាសាទូទៅនៅភាគខាងជើងនៃប្រទេសកាមេរូនប៉ុណ្ណោះ។ គាត់និយាយថា គាត់ជាស្រ្តីដំបូងដែលធ្វើការនៅកន្លែងយកថ្មស្ថិតនៅជាយក្រុង Maroua កាលពីប្រាំបីឆ្នាំមុន។ កាលនោះ ពួកបុរសបានធ្វើបាតុកម្មជំទាស់នឹងការចូលរួមរបស់គាត់ ក្នុងការងារនេះ ដែលធ្លាប់តែជាការងារសម្រាប់បុរស។ Jenabou រៀបរាប់ថា កាលគាត់ទើបតែចាប់ផ្តើមធ្វើការ គាត់ជាអ្នកជញ្ជូនគ្រួសតែប៉ុណ្ណោះ ប៉ុន្តែឥឡូវ គាត់ជាអ្នកជីកគាស់ និងបំបែកថ្ម។
Habbibba Hajara ជាស្រ្តីម្នាក់ទៀតក្នុងចំណោមស្រ្តីទាំងប្រាំបីនាក់ដែលប្រឡូកក្នុងអាជីពបំបែកថ្មនេះ។ នាងនិយាយថា ក្រោយពីរៀបការបានប្រាំឆ្នាំ ស្វាមីរបស់នាងកើតជំងឺស្ពឹក ហើយកម្រើកលែងបាន។
នាងនិយាយថា នាងចាប់ផ្តើមបំបែកថ្មតាំងពីឆ្នាំមុន ព្រោះស្វាមីរបស់នាងបាត់បង់ការងារ ហើយមិនអាចបញ្ជូនកូនៗទៅរៀននៅសាលា មិនអាចចិញ្ចឹមកូន មិនអាចទិញសម្លៀកបំពាក់ឲ្យកូនៗ និងផ្គត់ផ្គង់គ្រួសារបាន។ នាងនិយាយថា នាងអាចរកបានមួយដុល្លារក្នុងមួយថ្ងៃពីការប្រមូលគ្រួសលក់។
ស្រ្តីដែលជាអ្នកបំបែកថ្មអាយុច្រើនជាងគេនៅទីនេះ គឺ Doudou Abba ដែលមានអាយុ៤៣ឆ្នាំ។ គាត់និយាយថា ការងារបបែកថ្មនេះ ជាការងារតែមួយគត់ដែលគេណែនាំឲ្យគាត់ បន្ទាប់ពីគាត់បាត់បង់ប្តីទីមួយ ហើយទ្រព្យសម្បត្តិទាំងអស់ ត្រូវបានគួ្រសារប្តីគាត់រឹបអូសយក។
គាត់និយាយថា គាត់ក្រលំបាក ហើយបានចាប់អារម្មណ៍ថាគាត់ក៏អាចរកប្រាក់ចំណូលពីការកាប់គាស់ថ្ម ដូចស្ត្រីផ្សេងៗបានធ្វើមុនគាត់ដែរ។ គាត់និយាយថា ក្តីបារម្ភចំបងរបស់គាត់គឺការចិញ្ចឹម កូន និងបញ្ជូនពួកគេឲ្យទៅរៀន។
ប្តីទីពីររបស់ Doudou Abba លោក Abdoul Bello និយាយថា ដោយសារតែប្រពន្ធរបស់គាត់ ទើបពួកគេអាចផ្គត់ផ្គង់គ្រួសាររបស់ពួកគេបាន។ លោកបានបន្តថា អ្វីដែលលោកភ័យខ្លាច គឺការងាររបស់ប្រពន្ធលោកជាការងារផ្សងនឹងគ្រោះថ្នាក់ច្រើន។
លោកនិយាយថា ចាប់តាំងពីប្រាំឆ្នាំមុន ដែលប្រពន្ធលោកចាប់ផ្តើមធ្វើការ កូនៗរបស់ពួកគាត់អាចហូបចុកបានគ្រប់គ្រាន់ ទៅសាលារៀន និងអាចទៅព្យាបាលជំងឺនៅមន្ទីរពេទ្យពេលឈឺថ្កាត់ម្តងៗ។ លោកនិយាយថា លោកមានអារម្មណ៍ភ័យខ្លាច ដោយសារពេលខ្លះប្រពន្ធគាត់ត្រលប់មកពីធ្វើការដោយមានរបួស។ លោកនៅអាចចាំបានថ្ងៃដែលដុំថ្មធ្លាក់មកសង្កត់លើកម្មករម្នាក់នៅកន្លែងយកថ្ម ហើយជើងរបស់ជនរងគ្រោះនោះត្រូវបានកាត់ចេញ។
រដ្ឋមន្រ្តីក្រសួងលើកតម្កើងតម្លៃស្រ្តីនៃប្រទេសកាមេរូន លោកស្រី Marie Theres Abena Ondouបានសម្តែងការលើកទឹកចិត្តចំពោះកិច្ចខិតខំប្រឹងប្រែង ដែលលោកស្រីយល់ថាបានធ្វើឲ្យស្រ្តីមានឯករាជ្យភាពជាជាងពឹងផ្អែកលើប្តីរបស់ពួកគេ។
«ពួកគេមិនគួររាថយទេ ហើយយើងនឹងបន្តធ្វើការដើម្បីឲ្យលក្ខខណ្ឌការងាររបស់ពួកគេបានប្រសើរឡើង ហើយពួកគេត្រូវតែខិតខំប្រឹងប្រែងស្តាប់ រៀនសូត្រ និងយល់ដឹងពីសិទ្ធិរបស់ពួកគេ ថែមទាំងប្រមូលអារម្មណ៍ រក្សាស្ថេរភាពគួ្រសារ និងចិញ្ចឹមថែរក្សាកូនៗឲ្យបានល្អ។ ពួកគេគួរតែបញ្ជូនកូនទៅសាលារៀន។ ពួកគេត្រូវអប់រំកូនឲ្យបានត្រឹមត្រូវ ដើម្បីឲ្យក្លាយជាពលរដ្ឋកាមេរូនដ៏ល្អ»។
រដ្ឋាភិបាលកាមេរូនកំពុងយកឱកាសថ្ងៃនៃស្រ្តីអាហ្រ្វិកនេះ ដើម្បីអប់រំស្រ្តីពីសិទ្ធិរបស់ពួកគេ និងជួយពួកគេជម្នះឧបសគ្គ ដូចជាអំពើហឹង្សាលើស្រ្តី និងការផ្លាស់ប្តូរអាកាសធាតុ។ ស្រ្តី Marouaដែលជាអ្នកបំបែកថ្ម ត្រូវបានលើកឡើងជាឧទាហរណ៍មួយអំពីស្រ្តីដែលជួបនឹងឧបសគ្គ ហើយបានជួយជាកម្លាំងដល់ការអភិវឌ្ឍផងដែរ៕
ប្រែសម្រួលដោយ វិញ សុជាតា